1. Sorvsoktivont Sorvesporachem utor mhaka oxem ailem:
2. Sorvsoktivont Sorvespor oxem mhonntta: Hanv Siona pasot premaxen lastam, tachê khatir zolltea premaxen Hanv lastam.
3. Sorvespor oxem sangta: Hanv Sionak portun ietam ani Jerusalea modem tthikann kortolom. Jerusaleak Visvaxi Xar mhonnttolim ani Sorvsoktivont Sorvesporachea porvotak Povitr Porvôt mhonn nanv poddtolem.
4. Sorvsoktivont Sorvespor oxem sangta: Mhatare dadle ani mhatareô bailô Jerusaleachea moidanancher bostolim; tanchê utar piraiek lagun zonn-ekleachea hatant boddi astoli.
5. Ani xarachim moidanam thoim khelltolea cheddeam-cheddvamnim bhòrtolim.
6. Sorvsoktivont Sorvespor oxem sangta: Hê porjechea tea disamnim urlolea zomeak hem ek vismit disot zalear-ui, Mhaka-i tem toxench ek vismit distolem kai? Uloita to Sorvsoktivont Sorvespor!
7. Sorvsoktivont Sorvespor oxem mhonntta: Polleiat, Hanv Mhojê porjek udentechea desantli ani ostomtechea desantli soddoitolom.
8. Hanv tankam porot haddtolom ani tim Jerusaleant jietolim; ani tim zatolim Mhoji porza, ani Hanv zatolom tancho visvaxi ani nitivont Dev.'
9. Sorvsoktivont Sorvespor oxem mhonntta: "Sorvsoktivont Sorvesporachea Mondirachi buniad ghaltana tem bandon ietolench mhonn provadiamnim kel'leô bhasavnniô tumi atam aikotat; tôr kalliz ghôtt dhôrat!
10. Tôr aiz porian mon'xank tancho muxaro diunk na ani toxench mon'zatim khatir kãich farik korunk na; ani dusmana pasot konnakuch bhair-bhitôr sorunk surokxa nasli; karonn Hanvem soglleank ekamekacher add korun sôddlolim.
11. Punn Hanv adim vaglolom toso atam hê porjechea urlolea zomea thaim anink vagcho na. Uloita to Sorvsoktivont Sorvespor!
12. Atam tim xantint aplim xetam roitolim; dakvêl aplim follam ditoli; bhuim aplem utpon'n ditoli, ani mollob dôv ghaltolem. Him sogllim dennim hê porjechea urlolea zomeacher Hanv varoitolom.
13. Judachea Ghorannea ani Israelachea Ghorannea, zoxem tumi raxttram modem êk xirap zaun asleat, toxench Hanv tumkam suttka ditolom, ani tumi axirvad zatoleat. Bhieum nakat. Kalljidar zaiat!"
14. Tôr Sorvsoktivont Sorvespor oxem mhonntta: "Zoxem tumchea purvozamnim Mhozo rag pettoilo tedna Hanvem tumkam xikxa lavunk tharailem ani kaklut keli na - uloita to Sorvsoktivont Sorvespor! -
15. toxench Hanvem atam Mhojem mon bodôl'lam, ani Jerusaleak ani Judachea Ghoranneak borem korunk Hanvem nirnnoi ghetla. Bhieum nakat!
16. "Heô vostu tumi korunk zai: ekameka kodde sot uloiat, tumchea darvontteanr nitiche ani xanti-somadhanak pavoitat tosle nirnnoi gheiat;
17. ekamekacher add guptim vaitt ievzum nakat ani lottik govai dium nakat; kiteak hea sogllea vostuncho Hanv dvês dhôrtam. Uloita to Sorvespor! " '
18. Sorvsoktivont Sorvesporachem utor mhaka oxem ailem:
19. Sorvsoktivont Sorvespor oxem sangta: "Chovthea mhoineacho upas, panchvea mhoineacho upas, ani tosoch satvea ani dhavea mhoineancho upas, Judachea Ghoranneak anondacho, sontosacho ani khuxal porbancho kall zauncho. Mhonnttôch sotacho ani xanticho môg korat!" '
20. Sorvsoktivont Sorvespor oxem mhonntta: "Zaite lôk ani sobar xaranchim nagrikam fuddarak ietolim;
21. ani eka xarant ravpi dusrea xarant vetolim ani oxem mhonnttolim: dubava vinnem Sorvesporachi mozôt vinovunk vochum-ia ani Sorvsoktivont Sorvesporak sôdum-ia; hanv-ui vetam.'
22. Hôi, puskôll lôk ani podvedar raxttram, Sorvsoktivont Sorvesporak sôdunk ani Sorvesporachi mozôt magunk, Jerusalea ietolim."
23. Sorvsoktivont Sorvespor oxem sangta: "Tea disamnim, sogllea bhasanchea raxttrantle dha dadle eka Judevachea mangak dhôrtole ani mhonnttole: Tujê borabôr vochunk amkam zai kiteak tumchê sovem Dev asa mhonn ami aikolam." '
