1. Polle, Sorvesporacho dis ieuncho zalo; tedna tujê koddcho ghetlolo lutticho mhal tumchêch modem vanttcho asa.
2. Karonn Jerusaleacher add zhuzunk sogllea raxttrank Hanv ektthaim kortolom. Tim Xar aplea tabeant ghetolim, ghoram lutt'tolim ani bailancher bolatkar kortolim. Xarantlo ordo lôk pordesant vetolo, punn urlolea lokak xarantlo bhair ghalche nant.
3. Tedna Sorvespor fuddem sortolo ani, eka zhuzachea disa To zhuzta toso, To tea raxttrancher add zhuztolo.
4. Tea disa, Tache pãi Zoitunanchea Dongrar thartole; ho Dongôr Jerusaleachê udentek asa; ani Zoitunancho Dongôr udentek thaun tem ostomtek porian doxim futt'tolo ani modem ek mottem-vhoddlem falkem ghoddon ietolem. Dongrachem ord ut'tore vatten ani dusrem ord dokhinnê vatten koddsortolem,
5. Ani dongram modlem falkem bhoron ietolem, mhonngê Jasol porian tem bond zatolem ani, Uzias Judachea razachea kallar dhornkamp zaun ghòddlolem toxem, tem falkem bhoron ietolem. Ani Sorvespor mhozo Dev ietolo ani Tachê borabôr sogllim Tachim bhagevont chakram.
6. Tea disa, uzvadd ascho na, nhoi mhonn thonddi vô dhukem.
7. Dis ani rat nastana, to zatolo êk nirontôr dis: ho dis Sorvesporak tthavo. Sanz pavtôch porian uzvadd astolo.
8. Tea disa, jivim udkam Jerusaleantlim vhanvtolim: tantlim ordim udentichea somdirant ani dusrim ordim ostomtechea somdirant dhanvtolim; gimant toxim hinvalleant tim chaluch astolim.
9. Tedna Sorvespor sogllea sonvsaracho raza zatolo; tea disa Sorvespor zatolo ekloch eklo, ani Tachem nanv ekuch nanv.
10. Ak'kho dês Geba thaun tem Negebant aslolea Rim'mona porian sopatt zomin zatolo. Punn Jerusalem aplea zagear unch ubarlolem astolem ani lokan bhòrlolem, Benjaminachea darvonttea thaun tem adlea darvontteachea zagea porian, ani tea fuddem Konnxeachea Darvonttea porian, ani Hananelachea gopura thaun razachea kollombiam porian.
11. Ani tantum lôk aplim ghoram bandtolo. Nisonttonacho xirap somptolo; Jerusalem surokxit astolem.
12. Ani jeô porza Jerusaleacher add zhuzloleô, tea soglleancher Sorvespor heô pidda dhaddtolo: ozun aplea pãiancher ubim astana tanchem mas kustolem, tanche dolle tanchea poklliamnim kustole, ani tancheô jibô tanchea tonddamnim kustoleô.
13. Ani ghoddeancher, kochrancher, unttancher, gaddvancher ani tea fouzamnim aslolea sogllea mon'zatincher oslich pidda poddtoli.
14. Tea disa, tancher Sorvesporacho motto thorthoro poddtolo; tedna dôr-êk monis aplea peleacho hat ghôtt dhôrtolo ani te ekameka lagim zhuztole.
15. Juda legit Jerusaleacher add zhuztolo. Bhonvtonnchea sogllea raxttranchê girestkaiechi êk ras zatoli: khub bhangar, rupem ani vostram.
16. Tea uprant, Jerusaleacher add zhuzleant tea sogllea raxttramnim jim konn vanchun urtit, tim vorsachea vorsa Jerusaleak choddun vochun Razak, Sorvsoktivont Sorvesporak, bhôztolim ani Tombuncho Utsôv somarombhtolim.
17. Ani sonvsarantlea zatim modlem zôr khoinchem-i ek kull, Razak, Sorvsoktivont Sorvesporak, bhôzunk Jerusaleak choddun vochona zait, tôr tacher paus poddcho na.
18. Ani zôr Ejiptachem kull choddun vochona zait ani apli bhett korina zait, tôr ji pidda Tombuncho Utsôv somarombhunk choddun vochonant tea raxttrancher Sorvespor dhaddtolo, tich pidda tacher-ui poddtoli.
19. Ejiptak ani Tombuncho Utsôv somarombhunk choddun vochonant tea sogllea raxttrank hi khast favo zatoli.
20. Tea disa, ghoddeanchea ghanttliancher legit oxem boroil'lem astolem: 'Sorvesporak sonvskarlolim', ani Sorvesporachea ghorantlim randpachim aidonam vedi mukhar xitoddeak astolea aidonam itlim povitr zatolim.
21. Hôi, Jerusaleant ani Judant aslolem randpachem dôr-ek aidon Sorvsoktivont Sorvesporak sonvskarlolem zatolem. Ani iôdn bhettounk ietolim tim somest tim aidonam ghetolim ani tantum aplem randop kortolim. Ani to dis pavtôch, anink kednanch Sorvsoktivont Sorvesporachea Mondirant veapari asche nant.
