1. Tuje darvontte ugôdd, Lebanona, ani tujea devdarank uzo girasum!
2. Vilap kôr, soru-rukha, kiteak devdar poddlo, xrextt-thor rukhanchem nisontton zalem! Bashanachea xindhur rukhamnô, vilap korat, kiteak datt ran katrun uddoilem!
3. Gonvlliancheô hueli aikat! Tanchea thorponnacho nas zala. Aikat tornneam xinvache goroz! Jordanachem gorv moddon gelem!
4. Sorvespor mhozo Dev oxem sangta: 'Marunk dovorlolea hinddak tum chorvak vhor;
5. tim menddram viktim ghetat te tankam martat ani tori tankam khast na; tankam viktat te oxem mhonnttat: "Devak argam, hanv girest zalom!" ani tanchea gonvlliank tanchi kaklut na.
6. Hea khatir hea desant ravtoleanchi Hanv anink doia korcho na - uloita to Sorvespor! Hachê bodlek, tankam ek-ekleak aplea xezariachea tabeant ghaltolom, tankam razachê adhin kortolom. Te dês chidd'ddun uddoitole, ani tanchea chopkeantlim Hanv tankam soddouncho na.'
7. Tedna, marunk dovorlolea hinddak hanv chorvak vhorunk laglom, khorench durdoivi zal'lea hea xelliam-menddrank. Hanvem don dandde ghetle; ekleak hanvem nanv dilem 'Boreponn' ani dusreak 'Ekvôtt'; menddrank hanvench choroilim.
8. Eka mhoinea bhitôr tegam gonvlliank hanvem bhair ghale. Punn tanchê thaim hanvem sõsnnikai dhôrli na, ani tãnnim-i mhozo dvês kelo.
9. Tedna hanvem mhollem: 'Hanv tumkam anink chorvak vhorcho na; morchim asat tankam morum-di; zancho nas zauncho asa, tancho nas zaum-di; ani urloleank ekamekak girasum-di.'
10. Hanvem mhozo danddo 'Boreponn' ghetlo, ani to môddun tachim hanvem don ordam kelim; oso, 'zo korar Hanvem sogllea porzam lagim kel'lo, to Hanvem môddlo.'
11. Jea disa to danddo hanvem môddlo, tea disa mhojer dollo dovrun asle te odik durdoivi menddre hem khoreponnim Sorvesporachem ek utor mhonn somzole.
12. Tedna hanvem tankam sanglem: 'Tumkam sarkem dista zalear, mhozo muxaro diat; na tôr, asum di.' Tãnnim mhozo muxaro koso rupeache tis nanne zokhun mêzle.
13. Tedna Sorvesporan mhaka sanglem: 'Ti mozuri bhanddarant ghal - Mhojem mol tharaun Mhaka tãnnim dili ti unch mozuri.' Dekhun hanvem te rupeache tis nanne ghetle ani, Sorvesporachea Mondirant, bhanddarant te uddoile.
14. Uprant mhozo dusro danddo 'Ekvôtt' môddun tachim hanvem don ordam kelim; oso Judas ani Israel hanchê modem bhavponnacho sombond môddun uddoilo.
15. Magir, Sorvesporan mhaka oxem sanglem: 'Hê pavtti, eka nirupeôgi gonvlliachem samonn ghe.
16. Tôr desant Hanv êk gonvlli upzoitolom; to nas zal'leanchi porva korchoch na, vô vatt chukloleank sôdunk vecho na, vô ghaiel'leank borim korcho na, vô borim asloleancho poramôs korcho na, punn mottea menddreanchem to mas khatolo, tanche khur porian ôddun kaddtolo.
17. Aplo hindd sanddta tea gonvlliachem kottakotta! Tachea bavllear ani tachea uzvea dollear torsad pôddum! Tacho bavllo sukun vochum, tacho uzvo dollo sarko kudd'ddo zaum!'
