1. Darius Razachea chovthea vorsa, nnovea mhoineachea, mhonngê Kislêv mhoineachea, chovthea disa, Zekariak Sorvesporachem utor ailem.
2. Bethelachea lokan Sharejerak ani Regem'-Melekhak tanchea mon'xam borabôr Sorvesporachi mozôt magunk dhaddle.
3. Ani Sorvsoktivont Sorvesporachea Mondirachea iadnikank ani provadiank oso vichar korunk lailo: 'Zoxem itlim vorsam ami korun aileanv, toxench panchvea mhoineant ami dukh ani upas korunk zai?'
4. Tedna Sorvsoktivont Sorvesporachem utor mhaka oxem ailem:
5. Desachea sogllea lokak ani iadnikank oxem vichar: "Tumi panchvea ani satvea mhoineamnim, hea gel'lea sot'tôr vorsam upas ani dukh kortaleat, tedna tumi khorench Mhojê pasot upas kortaleat?
6. Ani jedna tumi jevtaleat ani pietaleat, tedna tumi tumchêch pasot jevtaleat ani pietaleat, hem khorem nhoi?
7. Adlea kallar jedna Jerusalem ani toxench tachê bhonvtonnchim nogram lokan bhòrlolim aslim ani tancher bore dis ail'le, ani jedna Negeb ani soklatteche ganv lokan bhòrlole asle, tedna Sorvesporan Aplea provadiam vorvim porgott kel'lim utram hinch mhonn nokllot tumi?" '
8. Zekariak Sorvesporachem oxem utor ailem:
9. Sorvsoktivont Sorvespor oxem sangta: "Niti pormannem kaide laiat, ekameka thaim kaklutchar ani doiall kallzachim zaiat.
10. Vidvank ani onathank, videxiank ani goribank chirddi-nakat; ani ekamekacher add kallzant kãich vaitt ievzum nakat."
11. Punn tim aikunk kobul na zalim; fituraien tãnnim apli patt portili; aikona zaunk tãnnim aple kan dhample.
12. Magam Sorvsoktivont Sorvesporan Aplea Atmeachea bollan provadiam udexim dil'le kaide ani utram tãnnim aikun gheunk nant ani tankam pallo diunk na; portench zalear, tãnnim aplim kallzam darunn kelim. Hea pasot Sorvsoktivont Sorvesporacho krôdh tancher pettlo.
13. Oxem astam, zoxem Hanvem ulo marlo tedna tãnnim aikolem na, "toxench tãnnim ulo marlo tedna Hanvem tanchem aikunk na", mhonntta Sorvsoktivont Sorvespor,
14. "punn tim vollkhonaslim tea raxttram modem vadollachea nettan Hanvem tankam ximpddailim. Oxem, tim bhair sorun gelea uprant, tancho dês itlo osadd zalo ki konnuch thoim ietim-vetim naslim. Sukh-sontôs haddpi dês tãnnim padd korun sôddlo." '
