1. Vosontachea kallar Sorvespora lagim paus magat. Sorvesporuch vadollachim kupam zomoita. Toch mon'xank pausacho dhoddko dita; ani zonn-ekleak ap-aplea xetant tonn upzoita.
2. Kudde dèv pixeponnam uloitat ani parkhi khotteô kurvô polletat; tanchim sopnam fosoitat ani tim ditat ti buzvônn polki. Heach pasot porza xelliam bhaxen vatt chukon bhonvtat-firtat, ani, tika rakhnno na zaun, ti gondhollak sampoddlea.
3. Mhozo rag gonvlliancher pettla ani Hanv to hinddachea fuddariancher ôt'tolom. Sorvsoktivont Sorvespor Aplea hinddacho, Judachea Ghoranneacho, samball kortolo; To taka Aplo zhuzacho raiall ghoddo kortolo.
4. Tantuntlo bhair sortolo Konnxea-sondhicho Fatôr ani Tombuchi Khuntti, tanchê modlo upzotolo zhuzak toiar kel'lo dhonnu, tantuntle sogllea vorgache fuddari.
5. Vangdda te bollixtt viram porim zatole, loddai kortana rosteanchi mati mostitole. Zhuzak vetat tedna, ghoddesvarancho porian te duspôtt kortole, kiteak Sorvespor tanchê sovem asa.
6. Tedna Hanv Judachem Ghorannem mozbut ani Juzechem Ghorannem zoitivont kortolom. Tanche Mhaka churchure distat dekhun, Hanv tankam portun haddtolom, ani Hanvem tankam kodinch poro ghalunk naslolê porim tim ghôtt zatolim; kiteak Hanv Sorvespor tancho Dev ani tanchea magnneak Hanv zobab ditolom.
7. Efraim' eka zhuzaria sarko zatolo. Sorean zal'lê porim tanchim kallzam khuxal zatolim. Tanchim bhurgim hem polletolim ani sontostolim, tanchim kallzam Sorvespora khatir murgott'tolim.
8. Hanv tankam xivnni ghaltolom ani zoma kortolom, kiteak Hanvem tankam suttka dilea; ani adim asli toxich tanchi sonkia vaddtoli;
9. veg-vegllea lokam modem Hanv tankam ximpddaitolom, tori tea poixilea desamnim tim Mhozo ugddas kortolim, aplea bhurgeank lhan-vhodd kortolim ani magir portun ietolim.
10. Ejipta thaun Hanv tankam portun haddtolom, ani Assiriê thaun tankam zoma kortolom; Gileadant ani Lebanonant Hanv tankam vhortolom, tori tankam svat pavchi na.
11. Ejiptachea somdirantlean tim poltodd martolim ani doriachim lharam futt'tolim ani Nodicho tthav suktolo. Assiriechem gorv khala poddtolem ani Ejiptacho mukutt sorun vetolo.
12. Hanv tankam khud Sorvesporachea bollan ghôtt kortolom ani Tachea nanvan tim choltolim - uloita to Sorvespor!
