1. Uprant Tannem mhaka porom'-iadnik Joshua dakhoilo; to Sorvesporachea duta mukhar ubo aslo, ani tacher garannem korunk Soitan tachea uzvea hata ubo aslo.
2. Sorvesporachea devdutan Soitanak mhollem: 'Sorvespor tuka bobatt korum, Soitana! Zannem Jerusaleak Aplem mhonn vinchun kaddlam, toch Sorvespor tuka bobatt korum! Ho monis êk ujeantlo kaddlolo zollto ingllo nhoi?'
3. Tôr Joshua devduta mukhar ubo aslo tedna, to mhellim vostram nesun aslo.
4. Tachê hujir ube aslole tankam devdutan sanglem: 'To nhesla tim mhellim vostram kaddat ani taka sobit-zhogzhogit vostram nhesoiat, ani tannem mhollem: ‘Polle, hanvem tujem khotteponn kaddun uddoilem.’
5. ani tachea mathear êk nitôll munddaso ghalat.' Mhonnttôch tachea mathear êk nitôll munddaso tãnnim ghalo, ani nitoll vostram taka nhesoilim; tea mhonnosôr Sorvesporacho dut thoim ubo aslo
6. Tedna Sorvesporachea dutan Joshuak khochit sanglem:
7. Sorvsoktivont Sorvespor oxem sangta: "Mhojeô vattô tum dhôrxi ani Mhoje nivadde samballxi zalear, tum Mhojem ghor choloitoloi, Mhojim angnnam rakhtoloi ani hanga seva kortat tanchê modem tuka zai toso provês korunk Hanv tuka odhikar ditolom.
8. "Tôr, porom' iadnika Joshua, atam aik; tum ani zanchê modem tum bostai te tuje sangati, tumi soglle aikat! Karonn atam ieuncheô asat tea ghòddnnianchi xubhxubh khunna tumi. Atam Hanv êk Fantto upzounk vetam, Mhozo sevôk to.
9. Joshua mukhar Hanvem êk fatôr dovorla, tacher sat dolle asat; hea fatracher Hanv tacho namlêkh kantoitolom, uloita to Sorvsoktivont Sorvespor!". Ani ekach disa bhitôr hea desacho guneanv Hanv kaddun uddoitolom.
10. Tea disa, - uloita to Sorvsoktivont Sorvespor! - tumi ekamekak ap-aplea dak-velim khal ani anjiranchea zhaddam khal tumchea vangdda bosunk apoitoleat." '
