1. Zekaria provadi (Berekiacho put) Id'docho put aslo. Dariusachea dusrea vorsa, atthvea mhoineant, taka Sorvesporachem oxem utor ailem:
2. Tumchea purvozam kodde Sorvespor ekdom' ragar zal'lo.
3. Dekhun tankam oxem sang: "Sorvsoktivont Sorvespor oxem sangta: Mhojê-xim portun ieiat - uloita to Sorvsoktivont Sorvespor! - ani Hanv tumchê-xim portun ietolom, mhonntta Sorvsoktivont Sorvespor.
4. Tumchea purvozam bhaxen zaum nakat; tankam adlea provadiamnim oxi bobatt kel'li: Sorvsoktivont Sorvespor oxem sangta: Tumchea khottea chalink ani tumchea khottea kortubank patt korat! Punn tãnnim Mhojem aikolem na vô Mhaka chit diunk na. Uloita to Sorvespor!
5. Tumchim purvozam atam khoim asat? Ani provadi mhonn, te ozun jive asat kitem?
6. Tori sangat: Mhojea sevokam provadiank Hanvem Mhoje sondêx ani nivadde tumchea purvozank kollounk formail'lem; hea sondexamnim ani nivaddeamnim tumchea purvozanchi patt dhôrli mum?" ' Hea pasot tãnnim dukh dhôrun mhollem: 'Zoxem Sorvsoktivont Sorvesporan tharail'lem, ani amchê chalik ani kornniank favo aslem, toso To amchê sorim vaglo.'
7. Ikravea mhoineachea (Shebat mhoino) chovisavea disa, Dariusachea dusrea vorsa, Zekaria provadiak, (Berekiachea putak,) Id'dochea putak, Sorvesporachem utor oxem ailem;
8. Rat zal'li ani hanvem oxem ek dorxon pollelem: tambddea ghoddear boslolo êk monis falkeant sugondhi zhaddam modem aslo; tachê pattlean anink ghodde asle - tambdde, kallxe ani dhove.
9. Tedna hanvem mhollem: "He konn, mhojea dhonia?" Mhojê lagim uloitalo tea devdutan mhaka sanglem: "Te konn te hanv tuka dakhoitolom."
10. Sugondhi zhaddam modem ubo aslo tea mon'xan oso zobab dilo: "Sorvesporan ak'khea sonvsarar gôst korunk dhaddleat tech te."
11. Ani tãnnim sugondhi zhaddam modem aslolea Sorvesporachea dutak oxi khobor dili: "Ami ak'khea sonvsarar gôst korun aileanv, ani sogllo sonvsar xant ani somadhan asa."
12. Tedna Sorvesporachea devdutan mhollem: "Sorvsoktivont Sorvespora, gel'lea sot'tôr vorsam-bhôr Jerusaleacher ani Judachea xarancher Tum ragar asloi; tôr kedna porian Tum tanchi kaklut korunk ravtoloi?"
13. Ani tedna Sorvesporan Mhojê kodde uloitalo tea dev-dutak dulôb ani buzvonn-divpi utramnim zobab dilo.
14. Mhojê lagim uloitalo tea devdutan tedna mhaka mhollem: "Oxi porgôttnni kôr: Sorvsoktivont Sorvespor oxem sangta: Jerusalea ani Siona sorim Hanv premaxen lastam,
15. punn atam sust jietolea raxttrancher Mhozo rag zollta; kiteak adim Hanv [Jerusaleacher ani Sionacher] matso ragar aslom, punn tãnnim hancher dhaddlolem noxtt vaddoilem.
16. Hea pasot Sorvespor oxem mhonntta: doia dhôrun Hanv Jerusaleak porot ailam; tantum Mhojem Mondir novean bandon ietolem - uloita to Sorvsoktivont Sorvespor! - ani Jerusaleacher map gheunchi dori vistartole.
17. Oxi-i porgôttnni kôr: Sorvsoktivont Sorvespor oxem sangta: Mhojea xarank novean bhov bore dis ietole. Sorvespor Sionak portun buzvônn ditolo ani Jerusaleak novean venchun kaddtolo." '
18. Tedna mhoje dolle ubarun aniek dorxon hanvem pollelem; tem oxem aslem: char xingam aslim.
19. Mhojê lagim uloitoleak devdutak hanvem mhollem: "Him kitem?" Tannem mhaka oso zobab dilo: 'Judak (Israelak) ani Jerusaleak ximpddaileant tim xingam him.'
20. Tedna Sorvesporan mhaka char kamar dakhoile.
21. Ani hanvem vicharlem: 'He kitem korunk aileat?' Tannem zobab dilo: 'Hea xingamnim Judak itlo nigut ximpddailo ki konnacheanuch apli tokli porian ubarunk zainaslem; punn tim tankam bhenkddaunk aileant, jea raxttramnim Judak ximpddaunk aplim xingam ubarlolim, tea raxtranchim xingam môddun uddounk aileant.'
