1. Tedna hanvem mhoje dolle ubarun aniek dorxon pollelem. Tem oxem aslem: map gheunchem sut hatant gheun êk monis aslo.
2. Hanvem taka vicharlem: 'Khoim vetai tum?' Tannem mhollem: 'Hanv Jerusaleachem map gheunk vetam, tachi rundai ani lambai kaddunk vetam.'
3. Tedna, mhojê lagim uloitalo to devdut vochunk laglo, ani dusro êk devdut taka mellunk fuddem ailo.
4. Hannem taka mhollem: 'Dhanvun voch ani tea tornnatteak oxem sang: "Jerusaleak durgam-kottam aschim nhoi, kiteak thoim khub lôk ani gorvam zomlolim astolim.
5. Khorench Hanvuch taka zatolom tachê sobhonvtim ek ujeachem kott - uloita to Sorvespor! - ani tachê bhitôr Hanv zatolom tachi Mhoima." '
6. Utthat! Cholat! Ut'torechea desantlim pollun vochat! - Uloita to Sorvespor! - Kiteak ontralla velea char-ui vareanchê dixen Hanvem tumkam ximpddaileant - uloita to Sorvespor!
7. Chol, Siona! Babiloniechê dhuvê sorxim atam jietai ti, pollun voch!'
8. Tachê Mhoimen mhaka hem kam' dilam dekhun, Sorvsoktivont Sorvespor tumkam luttleant tea raxttram vixim oxem sangta: 'Jim konn tuka hat laitat, tim Mhojea dolleantlê bavlek hat laitat.
9. Atam polle, Hanv tancher Mhozo hat haloitolom, ani zankam tãnnim aplim gulamam kel'lim, tinch tankam lutt'tolim.' Tedna Sorvsoktivont Sorvesporan mhaka dhaddla mhonn tumkam gomun ietolem!
10. Sionachê dhuvê, gitam-gaionam kôr ani khuxal za; kiteak, polle, Hanv ietam, tumchê modem tthikann korunk Hanv ietam - uloita to Sorvespor!
11. Ani tea disa zaitim raxttram Sorvesporak ektthovtolim. Hôi, tim Mhoji porza zatolim, ani Hanv tumchê modem tthikann korun ravtolom.' Tedna Sorvsoktivont Sorvesporan mhaka tumchê-xim dhaddla mhonn tumkam tthavem zatolem.
12. Sorvespor Judak Povitr Desant Aplem daiz mhonn Apnnachê adhin kortolo, ani Jerusaleak novean Aplem mhonn venchun kaddtolo.
13. Sogllea porzamnô, Sorvesporachea mhoreant oginch ravat; kiteak To Aplea Povitr Tthikanna thaun utthun ieta.
