1. Ekbatana ganvant bhitôr pavtôch, Tobìasan mhollem, `Azarìas bhava, amchea bhava Raguelager mhaka vhor.' Ani tannem rokddich Raguelachea ghorachi vatt dhôrli. To bhair darvonttea-xim bosun aslo. Ta-nnim taka poilo solam' kelo. Tannem-i tankam solam' kelo ani aplea ghorant bhitôr haddle.
2. Tannem aplê bailek, Ednak mhollem `Ho tornatto sarkoch Tobit mhojea bhava bhaxen dista.'
3. Ed-nan tankam vicharlem, `Tumi khoim thaun aileat?' Tannim zobab dilo, `Ninevehnt nirvaxit zalole ami Naftaliche put.'
4. Tinnem tankam mhollem, `Tumi mhojea bhavak Tobitak vollkhotat?' Tannim zobab dilo, `Hôi, ami vollkho-tanv.' Tinnem vicharlem, `To koso asa?' Tannim zobab dilo,
5. `To jivo asa ani to boro asa.' Ani Tobiasan anink sanglem `To mhozo bapui.'
6. Tedna Raguel sott korun ubo ravlo ani taka veng marli ani roddunk laglo.
7. Ani tannem mhollem, `Mhojea puta, Dev tujer axirvad ghalum. Tum unch kulliecho ani borea bapaicho put.' Tobitachi nodor geli mhonn aikun taka khub dukh zalem ani to roddunk laglo ani tannem mhollem, `Itlo proma-nnik ani borea kornniamnim bhorlolo monis koso kudd'ddo zalo?' Oxem mhunnun to aplea soirea Tobiasachê gom'tter poddlo ani roddunk laglo.
8. Tachi potin Edna ani tachi dhuv Sara toxinch roddunk laglim.
9. Raguelan aplea hinddantlo êk menddro marlo ani tannem ani tachê bailen, Ednan, tankam borem jevonn korun dilem. Aple hat dhuun te jevnnak bosle. Tedna Tobìasan Rafaelak mhollem, `Azarìas bhava, Sarak, mhojê bhoinnik, mhoji potin korunk tum Raguela kodde magxi?'
10. Raguelak tim utram somzolim ani tannem tornnatteak mhollem, `Borem jev ani pie ani khuxalkaien hi sanz kadd; tujê bhair, mhojea bhava, anink konnak Sara mhoji dhuv mellchi na: anink konnak ticher hôk'k na. Ani mhojê vatten zalear, anink konnachich potin tika korunk mhaka sot'tia na, kiteak tum ticho lagxilo soiro. Punn, puta mhojea, hanvem tuka ukteponnim kitem sangchem asa.
11. Amchea soiream modem tika novro sodunk sat pavtti hanv vavurlom, punn êk-eklo poilêch rati tichê sorxim gelo tedna melo. Punn atam, puta, tum jev ani pie. Sorvespor tuka Apli mozôt ani xanti ditolo.' Tobìasan mhollem, `Mhojê vixim tunvem nirnnoi ghetlea bogor, hanv kaich khauncho na ani pieuncho na.' Raguelan oso zobab dilo, `Borem tôr, Moizesachea Pustokar boroil'lem asa tea pormannem, hanv tika tujê adhin kortam: Sorgachean, ti tuji. Dekhun tujê bhoinnik tujea hatant hanv ghaltam. Hê ghoddiek thaun tum ticho bhav, ani ti tuji bhoinn. Aiz thaun sodankal tika tujê adhin kelea. Mhojea puta, sorgin-cho Sorvespor aiz rati tumkam pavum ani Apli mozôt ani xanti tumkam dium.'
12. Raguelan Sara aplê dhuvek apoili ani tichea hatak dhôrun tika Tobìasachê svadin keli, oxem mhonnun, `Hanv tika tujea hatant ghaltam; Moizesachea Pustokantle kaide ani nem' tika tuji potin koxi tuka ditat. Ghe tika; ani borea monan tujea bapaichea ghora tika vhor. Sorgincho Dev solamoti ani xantin tumkam ghora pavoum.'
13. Uprant tichê avoik polleun tannem tika ek kagod haddunk lailem. Moizesachê Somurtint-lea nema pormannem tannem aplê dhuvek Tobìasachi potin korun dili ti koblat tannem boroun kaddli.
14. Uprant tim jevunk boslim.
15. Ra-guelan aplê bailek Ednak apoili ani mhollem, `Mhojê bhoinni, dusro nhidpa kudd toiar kôr ani tika thoim vhor.'
16. Ti geli ani apnnak sanglolem toxem tea kuddant khatt toiar keli ani aplê dhuvek thoim vheli. Aplê dhuvechea buzar ti roddli, uprant aplim dukham puslim ani mhollem `Dhuvê, dhir ghe, Sorvespor tujim dukham sukhant bodlum! Kalljivont za!' Ani ti bhair geli.
