1. obit ekxem bara vorsanchê piraiecho zatôch, xant'taien hea sonvsarak ontorlo ani vhôdd manan taka purlo.
2. Basotth (62) vorsanchê piraier to kudd'ddo zalolo. Ani boro zalea uprant sovost-kaien to jielo, bhik ghaltalo ani sodanch Devak dhin'vastalo ani tachem thor-ponn vornnitalo.
3. mornnacho vêll pavot ailo tedna tannem Tobias aplea putak apoilo ani taka hi xikounn dili:
4. `Mhojea puta, tujea bhurgeank ghe ani Media ganvant pollun voch. Jem Devan Nahum provadiachê tonddim Nineveh vixim sanglam tem ghoddtolem mhonn hanv sotman'tam. Assiria ani Nineveh vixim jem Sorvesporachea dutamnim, Israelachea provadiamnim bhakit kelam, tem sogllem khorem zatolem ani ghoddtolem. Tanchem ek punn utor nirfoll zaunchem na. Ap-aplea vellar sogllem ghoddon ietolem. Assiria vô Babilonia ganvant nhoi punn Media ganvant tum odik surokxit astoloi. Jem Devan sangun dovorlam tem gho-ddun ietolem mhonn hanv zannom ani sotman'tam. Hê porim provadianchem ek tori utor nirfoll zaunchem na.`Israel desant ravtolea amche bhav soglleak ximpoddtole ani tankam aplea khaxea desantlim nirvaxi kortole. Israe-lacho sogllo dês padd zatolo, Samaria ani Jerusalem osadd zatolim, ani Devachem Mondir hulpaitole ani thoddo kall tem toxench padd urtolem.
5. Punn anink êk pautt Dev tanchi doia kortolo ani tankam Israelachea ganvant portun haddtolo. Te tachem Mondir porte bandtole punn poilea von tachi sobitai unni astoli ani kall bhoro porian tem togtolem. Punn tea uprant sogott nirvaxit portun ietole ani soglle tachê mhoimen Jerusalem xar novean bandun haddtole, ani Israelachea provadiamnim sangun dovorlam toxem, tachê bhitôr Devachem ghor portun bandtole.
6. Ani sonvsarantlim sogllim onbhavarthi mon-bodoltolim ani sotan Sorvespora Devak bhôztolim. Ani kuddea devank patt volltolim, ani sasnnachea Devak vakhann'tolim.
7. Tea disamnim suttka zoddlole Israelit kallzan thaun Deva-cho ugddas kortolim. Tim ietolim ani Jerusaleak ektthaim zatolim ani tea up-rant Abravank dilolea desant suroxiktpo-nnim jietolim, ho dês tancho zatolo. Ani jim khoreponnim Devacho môg kortat tim dhadoxi zatolim. Ani patok ani khotteponn adartolim prithvê voilim nanch zatolim.
8. `Ani atam mhojea bhurgeamnô, hanv tumkam ho kaido ghaltam: Visvaxipo-nnan Devachi chakri korat, ani taka mandta tem sogllem adarat. Promannik-ponnim cholunk, bhik ghalunk, sodam Devacho ugddas korunk ani sodankal Tachem Nanv khoreponnim ani sogllea bollan vornnunk, tumchea putam-dhu-vank adnia diat.
9. `Mhonnttôch, mhojea puta, Nineveh sandd, hanga ravum naka.
10. Jea disa tum tujê avoik mhojê kuxik matiek laitoloi, teach disa, kednai tem zaum, anink anink hea ganvant vêll kaddi naka, hanga hanv khotteponn ani lobaddi lojê viret voir ailolim dekhtam. Puta, koxê porim Nadab aplea poskea-bapui Ahikara sovem chol'lo tacho ugddas kôr. Zorui Ahikar jivo asa tannem lipon ravchem poddlem. Punn Nadabachem vaitt Devan tacheruch portilem, ani oso Ahikar uzvaddant bhair sorlo punn Nadab Ahikarak jivexim marunk sôdtalo dekhun sasnnachea kallokant gelo. Aplea borea kortubank lagun Ahikar Nadabachea naddgeponnantlo suttlo ani Nadab apnnench ghal'lea fasak sampoddlo.
11. Mhonnttôch mhojea bhurgeamnô, bhik ghalear kitem ieta ani khotteponn adarlear kitem mellta tem polleiat; khotteponn mornnak pavoita. Atam mhojean anink svas gheunk zaina.'Tannim taka khattir add ghalo; to melo ani manan taka matiek lailo.
12. Avoi meli tedna Tobiasan tika aplea bapaichê kuxik purli. Uprant, aplê bailek ani bhurgeank gheun to Media gan-vant gelo. To aplea sasrea Raguelager Ekbatana xarant ravlo.
13. To aplê baile-chea zanntteam avoi-bapai sovem moi-pasan ani manan chol'lo. Xekim mellon tannem tankam Ekbatana Media gan-vant matiek lailim. Aplea bapaichem toxench Raguelachem daiz Tobiasak poddlem.
14. Vhôdd man bhôgun to ekxem sotra vorsanchê piraiek pavlo.
15. Morchê adim tannem Ninevehchem nisontton dekhlem. Koxê porim Me-diachea Siaxares nanvachea patxaian Ninevehchea lokak nirvaxit korun vhelim hem tannem pollelem. Sorvesporan Nineveh ani Assiriechea lokam add kel'lea sogllea khatir, tannem Sorves-porak dhin'vaslo. Morchê adim, Nineveh sovem ghoddlam tem polleun to sontoslo ani tannem Devak dhin'vaslo sasnnachea sasnnak. Amen.
