1. Itlea mhonnosôr, Tobiasak vochpak ani ievpak kitle dis lagtole asle tem Tobit mejit aslo. Dis sorle, torui put ghora ailo na tem polleun,
2. tannem mhollem, `Taka kallav kiteak zalo kai? Ghoddiê Gabael melo ani taka duddu diunk konn na zait!'
3. Ani taka husko zaunk laglo.
4. Tachi bail An'na oxi udgarli, `Mhozo put melo. To anink jiveam modem na.' Ani ti roddun, vilapunk lagli,
5. `Mhojea puta, mhojea dolleanchea uzvadda, tuka hanvem vochunk kednanch diunk favo naslem!'
6. Ani Tobitan tika mhollem, `Bhoinni mhojê, xant rav, bhienaka, to surôkxit asa. Ravonaslolo koslo tori vavr tankam poddla astolo. Tacho sangati patieum ieta toslo, tea bhair to amcho soiro. Bhorvanso sôddum naka, mhojê bhoinni!
7. To rokddoch hanga pavtolo.' Punn tinnem portipallun mhollem, `Puro kôr Mhaka anink fottoum naka. Mhozo put morun gelo.' Disachi ti bhair vetali ani sogllo dis bhôr put gel'lo tê vatten polletali. Anink ti konnachench aikonasli ani kaich khainasli. Dis dharer poddtôch, ti ghora porot ietali ani ak'khi rat roddnem kortali ani nhidonasli.Raguelan aplê dhuvechea lognachea utsovak chovdha dis tharailole, he somptôch Tobias tachê-xim gelo ani taka mhollem, `Mhaka vochum-di. Mhojea avoi-bapain mhaka jivo polleuncho bhorvanso sôddla astolo. Mhonnttôch, bapa, hanv tujê lagim magtam, mhojea bapaichea ghora mhaka portun vochum-di. Hanv bhair sorun ailam tedna koxê porim to sontaptalo tem hanvem tuka sanglam.'
8. Raguelan Tobiasak mhollem, `Mhojê sovem rav, mhojea puta, Tujea bapaik, Tobitak, Tuji khobor diun hanv mon'xank dhaddun ditam.'
9. Punn Tobiasan agro dhôrlo ani mhollem, `Mhaka mhojea bapaichea ghora vochum di.'
10. Anink kallav kori-nastana, Raguelan, Sara, aplê dhuvek Tobiasachea tabeant keli. Tannem Tobiasak aplê gireskaiechem ord dilem, mhonngê dadle ani bailô, chakor ani chakorni, gorvam ani xelliô, gaddvam ani unttam, kopdde ani duddu ani gho-racheô vostu.
11. Borem anvddeun tannem tankam vochunk dilem. Xevttim, Tobiasak veng marun tannem mhollem, `Borem korun voch, mhojea puta. Tuji vatt surokxit zaum. Ani Sorvespor, tujer ani tujea potini Saracher subham' axirvad ghalum. Ani hanv morchê adim, mhaka tumchim bhurgim polleunk mellum.'
12. Uprant tannem aplê dhuve-cho umo gheun, tika mhollem, `Tujea sasreank man di. Jê porim ami tuka jivit ditolim avoi-bapui, têch porim tim-i tujim avoi-bapui zatolim. Mhojê dhuvê, xantin voch. Hanv jivo aso-sor tujê vixim fokot borem aikunk ravtam.' Ani tankam sogllem borem anvddeun, tannem tankam vochunk dilem.Edna aplê vatten Tobiasak mhollem, `Dev tuka borê bhaxen porot haddum. Tujim ani Sara mhojê dhuvechim bhurgim polleunk, Dev mhaka lamb auk dium. Sorvespora hujir, hanv mhojê dhuvek tujê adhin kortam. Tum jivo aso-sor, tika kednanch dukh dium nakai. Xantin voch mhojea puta. Aiz thaun hanv tuji avoi ani Sara tuji potin. Sogllea amchea jivitant ami sodanch khuxal asum.' Tinnem dogaikui veng marli ani tankam sogllem borem anvddelem.
13. Khuxalkaien ani sontosan bhôrun, Tobias Raguelachea ghorantlo bhair sorlo. Aplem poinn iesesvi zalem dekhun, tannem Sorvesporak, sorga ani sonvsarachea razak dhin'vaslo. Tannem Raguelak ani tachê bailê Ednak vakhann'lim ani mhollem, `Mhojea ak'khea jivitant tumkam favo to man diunk, mhaka sontôs bhôgum.'
