1. Nineveh samkar aslolea, Kaserina lagsar pavtôch,
2. Rafaelan mhollem, `Tujea bapaik koslea bhesar ami sôddun aileanv, hem tum zannoi.
3. Ami tujê potini fuddem ia ani tim vatt cholta mhonnosor aminch ghor toiar korum-ia.'
4. Te dog-ui fuddem gele, (Rafaelan Tobiasak pint ghe mhunn formailem), ani sunnem tanchea pattlean gelem.
5. Tea disamnim An'na bosun aplea putachi vatt polletali.
6. Konn-eklo ieta to aplo put mhonn tika rokddich khatri zali; ani tinnem bapaik mhollem, `Polle, tuzo put ieta, ani tacho sangati tachê borabor asa.'
7. Bapai-xim pavchê adim Rafaelan Tobìasak mhollem, `Tujea bapaiche dolle ukte zatole mhonn hanv tuka khatri ditam.
8. Hem masllechem pint tujea bapaichea dolleank tunvem lavunk zai; hea vokhdan tache dolle sonn-sonntole, punn tem tachea dolleantlim dhovim fulam kaddun uddoitolem; ani tujea bapaik novean nodor ietoli ani taka distolem.'
9. Avoi dhanvun aili ani aplea putak veng marli ani tinnem mhollem, `Mhojea puta, atam mhojean morum-ieta, kiteak hanvem tuka pollelo.' Ani tim roddlim.
10. Tobit ubo ravlo ani angnnanchea darantlean vetana addkhôllun poddlo. Tobìas tachê-xim ailo.
11. (Tachea hatant masllechem pint aslem.)
12. Taka ghôtt bosoun ani tachea dolleancher funk marun tannem mhollem, `Bhieum naka, bapa.' Hem mhonnun tannem taka vokhod lailem,
13. thoddo vêll tem toxench dovorlem ani magir don-ui hatamnim tachea dolleantli sai oddun kaddli. Tedna bapui tachea gomtteak veng marun
14. roddlo. Tannem mhollem, `Mhojea puta, tum mhojea dolleanchi bavli, tuka hanvem dekhlo!' Ani uprant tannem mhollem:Devak vakhann'nni!Tachea thôr Nanvak vakhann'nni!Sogllea Tachea povitr dutank vakhann'nni!Tachea thôr Nanvak vakhann'nnisasnnachea sasnnak!
15. Tannem mhaka koxttailo,punn atam mhoje churchure keleani Tobìas mhojea putak hanv polletam.Khuxalkaien vhoddlea tallean Devak dhin'vaxit, Tobit ghorant bhitôr gelo. Aplem poinn konn bhaxen iesesvi zalem, konn porim apnnem duddu porot haddle, koxê porim Raguelachê dhuvê Sara kodde apnnem logn kelem, koxi ti pattlean ietali ani Ninevehchea dar-vontte koddsun pois nasli, hem sogllem Tobiasan aplea bapaik sanglem.
16. Khuxalkaien Devak dhin'vaxit, Tobit aplê sunnek mellunk Ninevehchea dar-vonttea-xim gelo. Jedna Ninevehchea lokan, to adlê bhaxen, adara viret cholta tem pollelem, tedna tankam ojap dislem.
17. Koxê porim Devan apli doia keli ani aple dolle ugôddle hem Tobitan tankam sangun dilem. Uprant to Sara, aplea puta Tobiasachê bailek mell'llo ani hea utramnim tika axirvad dilo, `Mhojê dhuvê, ievkar tuka! Tuka amchê-xim dhaddlea dekhun, Tujea Devak vakhann'nni. Axirvad tujea bapaicher, axirvad Tobias mhojea putacher, axirvad tujer mhojê dhuvê. Khuxalkaien ani sontosan, tujeach ghorant bhitôr sor. Bhitôr ie, mhojê dhuvê.' To dis, Nine-vehchea Judevank khuxalkaiecho zalo,
18. ani Ahikar ani Nadab tache soire Tobitachea khuxalkaient vantto gheunk aile.
