Tedna Tobiasan aplea bapaik Tobitak zap diun mhollem, `Bapa, tunvem formailam toxem hanv kortolom.
2. Punn hanv tachê lagchem rupem koxê porim portun ghetolom? To mhaka vollkhona ani hanv-ui taka vollkhona. Tannem sotman'cheak ani rupem mhaka dinvcheak, kosli khunna mhojean tuka dium-iet? Tea bhair Media vochpachi vatt mhaka kollona.'
3. Tedna Tobitan aplea putak Tobiasak oso portipall kelo, `Ami dogaimnim amchi soi potrar ghalea, ani zonn eklean, ek-ek ord dovorchê khatir, tea potrachim don ordam keleant; ek ord a mhojê lagim asa ani dusrem ord tachê-xim dovorlolea rupea-xim asa. Hanvem tem rupem tachê kodde dovor-lear vis vorsam sorlim, oso mhaka ugddas ieta. Mhojea puta, poinn korunk êk visvaxi sangati sôdun kadd - ami tacho disvoddo portun ietôch farik korcho - ani voch ani tem rupem Gabae-la koddchem portun ghe.'
4. Tobias apnna borabor Media vochunk vatt zanno toslo monis sôdunk gelo. Bhair gelo zalear, tachê hujir dut Rafael ubo aslo, to Devacho dut mhonn taka koll'lem na.
5. Tannem taka mhollem, `Ixtta, tum khoincho?' Dutan portipall kelo, `Hanv tuzo êk Israeli bhav. Hanv hê vatten vaur sôdunk ailam.' Tobiasan mhollem, `Tum Media vechi vatt zannoi?'
6. Dutan mhollem, `Dubhavinn hanv zannom, sobar pavtti hanv thoim gelam, mhaka tê svatechi vollok asa ani hanv teô vattô chol'lam. Sobar pavtti hanv Media pavlam ani amchea eka Gabael nanvachea bhava sorxim vostek ravlam, to Rhages Media ganvant ravta.' Ekbatana thaun Rhages pavcheak sumar don dis lagtat; Rhages dongracher poddta ani Ekbatana molla modem poddta.'
7. Tobiasan mhollem, `Ixtta mhaka rav, hanv vochun mhojea bapaik kolloitam. Mhojea sangata ieupak mhaka tuji goroz asa. Tuzo disvoddo hanv tuka farik kortolom.'
8. Tannem mhollem `Borem asa, hanv tuka ravtam, punn chôdd vêll korum naka.'
9. Tobias bhitôr gelo, ani aplea bapaik mhollem, `Mhaka amcheach soiream modlo êk Israelit mell'lla.' Ani bapain mhollem `Taka mhojê-xim hadd, to khoinchea ghoranneacho ani kulliecho, tem hanv zanno zaunk sôdtam. Mhojea puta, tujê borabor poinn korunk to khatrecho zalear, mhaka polleunk zai.' Mhonnttôch Tobias bhair gelo ani bhitôr apoun taka mhollem, `Ixtta, mhozo bapui tuka mellunk sôdta.'
10. Dut ghorant bhitôr ailo. Tobitan taka noman kelo ani tannem taka upott sukh anvddeun, portipall kelo. Tobitan mhollem, `Mhaka anink sukh urlam? Ho polle, hanv kudd'ddo zalam, sorgacho uzvadd mhaka anink dixtti poddona; anink-anink uzvadd dixtti poddona toslea mel'leam porim mhoji gôth. Hanv jivo asam khorom punn melam. Lôk uloita tem mhaka aikunk ieta punn tim mhaka dixtti poddonant.' Dutan mhollem, `Dhir ghe, thoddeach vellan Dev tuka boro kortolo. Kalljidar za.' Tobitan mhollem, `Mhozo put Tobias Media vochunk sôdta. Taka tum vatt dakhoixi? Bhava, hanv tuzo disvoddo farik kortolom.' Tannem mhollem `Borê khuxen hanv tachea sangata vetolom. Hanv soglleô vattô zannom, ani zaitê pavtti hanv Media gelam. Thoinchim sorvoi mollam ani dongor hanv bhonv-lam ani sogllea thoinchea rosteanchi mhaka vollok asa.'
11. Tobitan mhollem `Bhava, tum khoinchea ghoranneacho ani kulliecho tem mhaka sangxi?'
12. Du-tan mhollem, `Mhojê kulliechi khobor tum kiteak zanno zaunk sôdtai?' Tobitan mhollem, `Tujem kull ani tujem nanv mhaka dubavavinn kollonk zai.'
13. Du-tan mhollem, `Hanv Azarias, vhodda Ananiasacho put, to tuzo soiro poddta.'
14. `Ievkar ani svagôt tuka, mhojea bhava! Tujem nanv ani tujê kulliechi khobor vicharli dekhun tuka vait disum noiê; tum mhozo soiro ani bore ani manadik sonstecho mhunn mhaka kollon ailem. Ananias ani Nathan mhojê vollkiche, te dog Shemaiache put zaun asat. Te mhojea sangata Jerusaleak vetale; thoim ami borabor nomoskar kela ani tannim nitt rosto kednanch sôddunk na. Tuje bhav manache monis, ani tum borê kulliecho tuka ieukar!'
15. Uprant tannem mhollem, `Hanv tuka disak êk drakma farik kortolom tea bhair tuzo ani mhojea putacho khorch. Mho-jea puta sangata poinn xarthi pavoi,
16. ani hanv tuka tea-von ogllem ditolom.' Dutan mhollem `Hanv tachea sangata poinn xarthi pavoitolom. Kainch bhieum nakai. Vetana toxench portotana, sogllem borem vetolem kiteak rosto surôkxit asa.'
17. Tobitan mhollem, `Dev tujer axirvad ghalum.' Uprant tannem aplea putak mhollem, `Mhojea puta, poinnek goroz tem toiar kôr, ani hea tujea soirea bori voch. Sorgincho Dev vatter tumchi rakhonn korum ani tumkam borê bhaxen porot haddum ani tumchê surokxê khatir tacho dut tumkam sangat dium!'Aplea bapaik ani avoik veng marun, Tobias bhair sorlo. Tobitan mhollem, `Borê bhaxen vochun ieiat.'
18. Punn tachi avoi An'na roddunk lagli ani tinnem Tobitak mhollem, `Mhojea putak tunvem kitea pasot pois dhaddunk zai? Amchê mukhar bhair-bhitôr sortana to amchea hatancho danddo nhoi?
19. amchea bhurgea mukhar poixeanchem mol kitem?
20. Khoreanich jem kitem Devan amkam dilam, tem amkam jieunk puro.'
21. Tannem mhollem, `Oslem chintop monant haddinaka. Tachem vochop ani ievop surokxit zatolem. To borê bholaiken portun ieta to, tum tujeach dolleamnim polletoli. Mhojê bhoinni, oxem anink chintum naka, tanchê pasot husko korum naka.
22. Ek boro dut tachea sangata vetolo; tacho provas boro zatolo ani to borê bholai-ken amchê-xim porot ietolo.'
