1. Tea disamnim, lognacho utsôv somptôch, Tobitan aplea puta Tobìasak apoun mhollem, `Mhojea puta, tujea sangata vochun aila taka tunvem kitem farik korunk tharailai? Tharailolea-von taka odik di.'
2. Tannem zobab dilo `Bapa, hanvem taka kitlem mhunn diunchem? Tannem mhojê bori haddlolea daizachem ord porian taka dilear, mhaka kaich unnem zanvchem na
3. tannem mhaka surokxitponnim portun haddlo, mhojê bailek tannem bori keli, tannem duddu-i porot haddle, tukai tannem boro kelo. Hea sogllea khatir kitlem ogllem hanvem taka diunchem?'
4. Tobitan mhollem, `Jem kitem tannem haddlam, tachem ord, taka favo kôr.'
5. Mhonnttôch Tobìasan aplea sanga-tiak apoun sanglem, `Tunvem kelam tea soglleachi mozùri koxi, tunvem portun haddlam tachem ord tuka dovôr ani xantin voch.'
6. Tedna Rafaelan tankam dogank-ui kuxin vhorun mhollem, `Devachi vakhann'nni korat ani tumchê pasot tannem kelam titlea-i khatir sogllea rochnnam hujir Tachi tust korat. Tachem Nanv vakhannat ani voir kaddat. Sogllea mon'xam mukhar favo tê porim Devachim kortutvam porgôtt korat, ani taka argham diunk kednanch visrum nakat.
7. Razacho gutt samball'lear boro, punn Devachim kortutvam porgôttunk êk vorto kaido. Favo tê porim Taka argham diat, borem tem korat ani tumcher kai vaitt ieunchem na.
8. `Addgam-naddgam korun girestkai ektthaim korchê svater, upas korun magnnem kelear ani promannikponnan jieun bhik ghalear odik borem. Bhangar punzaunchê svater bhik ghalear odik vortem.
9. Bhik mornnantlim vattaita ani sogllea patkantlim nitoll korta. Bhik ghaltat tankam bhorpur jivit melltolem;
10. patok kortat ani vaitt margar choltat tim apnnankuch luskan kortat.
11. `Kaich lipoinastana hanv tumkam sogllem sot tem sangtam. Razacho gutt samball'lear boro, punn favo tê porim Devachim kortutvam porgôttunk êk vorto kaido; hem tumkam hanvem êk pavtt sanglam.
12. Tum ani Sara magnnim kortaleat tim hanvem Sorvesporachea voibhova mukhar pavoilim ani vachlim mhonn zanno zaiat; tum mel'leank nikhipitaloi ti-i khobor hanvem pavoili.
13. Jedna jevnnavelo utthun mel'leank purunk vochunk tum pattim sorunk naim,
14. tedna tuji porikxa korunk Devan mhaka dhaddlo, ani toxench tuka ani tujê sunek borim korunk mhaka patthoilo.
15. Hanv Rafael, Sorvespo-rachea voibhova mukhar bhitôr sorunk toiar asat ani bhoktanchim magnnim Deva mukhar pavoitat tea dutam modlo eklo.'
16. Bhirantin bhôrun te dogui zomnir poddle.
17. Punn dutan mhollem, `Bhienakat, xanti tumchê sovem, sodam sorvodam Devak dhin'vasnni diat.
18. Mhojê vatten, hanv tumchê-xim aslom tedna mhojê ostongim nhoi punn Devachê khuxê pormannem hanv vavurtalom. Mhonnttôch tachi stuti dôr disa gaiat.
19. Tumchê nodrê mukhar, hanv khatam-pietam so dislom. Punn toxem nhoi. Tem fokt ek dorxonn.
20. Ani atam prithumer Sorvesporachi vakhann'nni korat ani Devak argam diat. Mhaka dhaddlolo Tachê-xim vecho mhozo vêll pavlo. Sogllem ghoddlam titlem-i boroun dovrat.' Ani to voir cho-ddun gelo.
21. Te zomnivele utthle ted-na, to tankam anink-anink dixtti poddlo na. Aplea dutak dhaddun, Sorvesporan apnna khatir kel'lim vortim kortutvam tannim vollkhun ghetlim. Te Devak dhin'vaxit ani tachi stuti korit ravle.
