1. Israela, mouza korum naka, dusrea porzam bhaxen kuxali korum naka! Karonn xindollki korunk tunvem tujea Devak sôddun diloi, dôr-eka khollar xindollkechi mozuri gheunk tuka sontôs bhòglo.
2. Kholl ani kollombi tankam pôschimnant; novo soro tankam pieunk mellcho na.
3. Sorvesporachea desant tim anink jieunchim nant; Efraimak portun Ejiptak vechem poddtolem ani Assirient mhellem jevonn tankam jevchem poddtolem.
4. Tim anink Sorvesporak soreacheô bhettovnniô korchim nant, ani tanchim bolidanam Sorvesporak man'chim nant. Tim tankam zatolim dukh kortoleanchem jevonn, tantlem jevtat titlim-i mhellim zatolim; kiteak tanchem jevonn Sorvesporachea ghorant bhitôr sorchem na, fokot tanchem pott bhôrunk tem upkartolem.
5. Dobajik porbê-disa, Sorvesporachea utsovachea disa, kitem mhonn kortoleat tumi?
6. Kosli mhonn desvatt apnnam pattlean dovorlea tãnnim! Atam Ejipt tankam dhôrun koidi kortolo, Mem'fis tankam purtolem, tanchim xetam-mollam khatkutliamnim bhoron ietolim, ani kantteriô tanchea tombumnim rigun vostoleô.
7. Xikxeche dis pavle, farikponn ghevpache dis he: Israelak hachi bori khobor asa. 'Ho provadi piso zala! atmeachê preronnen ho uloita khoim! tachi môt firlea!' Khorench vhôdd tuzo guneanv, dekhunuch odik vhôdd tuji dusman'kai!
8. Efraimacher dollo dovrunk ho provadi mhojea Devacho parekar. Punn sogllea tachea vattamnim suknneank dovortat tosle taka fas manddleat; ani tachea Devachea ghorant porian dusman taka ravtat.
9. Adlea kallar Gibeak ghòddlolem toxem, bhov vhôdd zala hea mon'xancho bhroxttachar. Sorvespor tanchea khotteponnacho ugddas kortolo, tanchea patkank To khast laitolo.
10. Mhaka Israel mell'llo tedna oronneant dakô mell'lollê bhaxen zalem; tumchea purvozank Hanvem dekhle tedna anjirachim uksar zal'lim poilim follam mell'llolê bhaxen zalem. Punn Baal-Peorak pavlim tedna, tim Lojechi seva korunk laglim, tim môg kortalim têch vostu bhaxen apunnuch kanttalleachi vôst zalim.
11. Efraimachi mhoima eka suknnea bhaxen uddun vetoli: zolm divopna, gorbhest zavop na, gôrb samballop na.
12. Ani bhurgeank zolm diunk tim pavlear porian, him vaddchê adinch Hanv tankam tanchê modlim kaddtolom! Hanvem tankam toxinch sôddlim zalear, kottakotta tanchem!
13. Efraim' Mhaka Tira bhaxen distalo, eka borea mollar roil'lo, punn atam Efraim' aplea bhurgeank gorvam martoleak vhorun ditolo.
14. Sorvespora, di tankam - kitem mhonn ditoloi? - gôrbh dhorunk xokonant tosle kusve ani sukim horddim tankam di.
15. Tanchem sogllem khotteponn Gilgalak dixtti poddlem; thoim Hanv tancho dvês dhôrunk pavlom. Tanchea vaitt kortubank lagun Mhojea ghorantlim tankam Hanv dhanvddaitolom. Hanv tancho anink môg korcho na; tanche fuddari soglle fitur.
16. Efraimak boroch mar ghalo, tanchim pallam sukun gelim, tim anink follam diunchim nant. Ani bhurgeank zolma haddunk tim pavlear legun, tanchea kusveantlea mogachea ballank Hanv marun uddoitolom.
17. Mhojea Devacho tallo tãnnim aikunk na dekhun, To tankam poro ghaltolo ani tim raxttram modem parpoll zaun bhonvtolim.
