1. Israel khub follam dita tosli êk ttokttokit dak-vêl zaunk pavlo; jitlim tachim follam vaddtalim, titlo odik to vedi bandit gelo; jitlo odik tacho dês girest zatalo, title odik to aple povitr khambe girest kortalo.
2. Doxim oddon veta toslem kalliz tanchem; dekhun atam tãnnim hachem farikponn diunchem poddtolem. Sorvespor Apunnuch tancheô vedi môddun uddoitolo ani tanchea povitr khambeanchem nisontton kortolo.
3. Tedna tim mhonnttolim: 'Amkam raza na, kiteak ami Sorvesporachi bhirant dhôrunk na. Punn raza-i zalear amchê pasot kitem mhonn korunk xokta?' Tanchea tonddant polkim utram, khotte soput diun korar kortat!
4. Oxem tanche nitiche nirnnoi khorem mhollear xetantlea kholliamnim vaddta toslo vikari nêr. Beth-Avenachea paddkuleak lagun
5. Samarient ravtat tim kamptolim; thoinsorlo lôk tachem dukh kortolo, toxench tanche puzari-i dukh kortole, kiteak tachi mhoima tachê thaun ubun geli!
6. Xrêxtt Razak manachem dan koxem paddkuleak Assiriek ubarun vhortole. Efraim' lojechim follam khaunk pavtolo ani apnnem bhôzlolê murtichi Israelak loz bhògtoli.
7. Samariecho dis somplo. Zoxem tonn vhanvtea vhallar, toso ticho raza udkachea lottan vhanvon vetolo.
8. Avenachea unchlea zageanchem nisontton zatolem: hench tem Israelachem patok; kantte ani kantteriô tanchea vedincher vaddtolim. Tedna tim porvotank mhonntolim: 'Amkam dhampat!', ani dongrank: Amcher poddat!'
9. Israela, Gibeachea disam thaun tunvem patok keleim. Thoim tim toxinch ravlim, ani zhuz guneanvkaranchi patt Gibeak dhôrchem na kitem?
10. Hanv ietolom ani tankam khast laitolom; tanchea dupett khunnam khatir raxttram tancher zhuzunk zoma zatolim.
11. Efraim' êk borê bhaxen xikoil'li paddi; mollunk taka borem dista; tachê nazuk manicher Hanvem zum ghalunk na. Punn atam Hanv Efraimak kamak laitolom, Judak atam xet nangrunk poddtolem, Jakobak difllam fôddchim poddtolim.
12. Tumchêch khatir promannikponn vompat, ani visvaxi mogachem pik lunvun kaddat; roinastana sôddloli tumchi zomin nangrat: Sorvesporak sôdunk vochpacho vêll ho, magir To ietolo ani doiallaiechea nitivontponnacho tumcher paus ghaltolo.
13. Tunvem kôsleim khotteponn, lunvun kaddlii onit, ani khelim-i fottingponnachim follam. Tujea rothancher tunvem visvas dovorloi ani tuka khub zhuzari asat mhonn tum tancher patieun ravloi dekhun, tujea loka modem gollboll zatole ani sogllea tujea kottanchem nisontton zatolem.
14. Zoxem zhuz pettlem tedna Shalmanan Beth-Arbel osadd korun sôddlem ani tedna avoiank ani tanchea bhurgeank dhornnir apttun tanche kuddke kele,
15. toxench, Bethela, tujea vhodda khotteponna pasot hem sogllem Hanv tuka korunk vetam. Ani fanteaparar Israelacho raza sarko nanch zatolo.
