1. Israel burgo aslo tedna Havem tacho môg kelo, and Mhojea putak Havem Ejiptantlo apoun bhair kaddla.
2. Punn jitlo Hanv tankam apoitalom, titlem odik tim Mhojê sorxilim pois vetalim. Tãnnim Baalak iodn bhettoile and kuddea devam mukhar dhump laslo.
3. Hanvench Efraimak cholunk xikoilem, Hanvench taka Mhojea hatant dhôrlo. Tori Hanv ki tancho poramôs kortalom mhonn tãnnim vollkhunk na.
4. Hanv tankam moipasan dhôrtalom ani mogachea bandpasamnim ôddun vhortalom. Zoxem konn eka ballak aplea polea-xim uklun dhôrta, toxench Hanvem tankam kelem, ani oddôv ghalun taka Hanvem jevonn vaddlem.
5. Mhojê-xim portun ieunk to kobul zalo na dekhun, taka portun Ejiptak vechem poddchem na, punn Assiria tacher razvôtt choloitoli!
6. Tolvar tachea xaranchem ghorttann kortoli, tachea darvontteanche addambe ti môddun uddoitoli, tim guddmêll korit asat mhonnun ti tankam girastoli.
7. Mhoji porza Mhoji beporva korit-korit asa; tankam voir apoin zalear, tanchê modlo eklo monis porian pãi haloina.
8. Efraima, koso mhonn Hanv tuka sôddun dium? Israela, Hanv tuka koso mhonn dusreachê adhin korum? Koso mhonn Hanv tuka Admasa bhaxen vagoum? Jeboimak kelem toxem koso mhonn Hanv tuka-i korum? Hodd'ddeant Kalliz Mojem kollvollta, Hanv soglloch doien tollmolltam.
9. Mhojo khôr rag Hanv tacher kaddcho na, anik êk pavtt Efraimachem nisontton Hanv korcho na, kiteak Hanv monis nohi, Hanv Dev, tumchem modem asa to Ekloch Povitr, ani ragan bhoron Hanv tumchê-xim ieuncho na.
10. Tim Sorvespora pattlean vetolim; eka xinva bhaxem To gorôz ghaltolo, ani To gorozta tedna ostomtek thaun tacheô put-dhuvô kampun-chollbollum ietoleô.
11. Ejipta thaun girbojiam bhaxen kampun-chollbollun ietoleô, Assiriê thaun parveam bhaxen uddun ietoleô, ani Hanv tankam novean tanchea ghoramnim ravunk ditolom - uloita to Sorvespor!
12. Efraim' aplea fottimnim Mhaka veddho ghalta, ani Israelachem Ghorannem aplê fosovnnen. Punn Juda ozun Devachê vatten asa, Povitr Devak to visvaxi ravla.
