1. Tujea onttank kornno lai ani vazoi! Guruda vori Sorvesporachea Ghoracher noxtt denvun ieta, kiteak tãnnim Mhozo korar môddla ani Mhojê Somurtik tim ovisvaxi zaleant.
2. Mhojea Deva! Ami Israel porza, ami Tuka vollkhotanv!' - oxem ulo marun atam tankam kosloch faido na.
3. Israelan borem tem sogllem sôddun dilem. Dusman tanchê pattik lagtolo.
4. Tãnnim razank sodrer bosoile, punn Mhoji maneotai nastana; kunvor nemle, punn Mhaka kãich sanginastana. Aplench rupem ani bhangar gheun nisonttonak nirmil'le tãnnim apnnank kudde dèv kele.
5. Samariê, tujea paddkuleak Hanv kanttalltam! Mhozo rag tancher pettla! Kedna porian tim novean xud'dh zainastana urtolim?
6. Hem kam' Israelachem: eka kolakaran kel'li vôst koxêch bhaxen êk dêv zaum nozo! Dekhun Samariechea paddkuleacho Hanv churo kortolom!
7. Vomptat varem, lunvtolim vadoll-modd! Tanchea gonvak konnsam ieunchim nant, konnsam kednanch pitt diunchim nant, vô, ditit zalear porian, porkim mon'xam tem khatolim.
8. Israelak gillun uddoilo, atam tim raxttram modem sanddleant, konnak naka tosli vôst tim zaleant,
9. kiteak mhollear, eklench poddlolea ran'vott gaddva bhaxen, tim Assiriê pattlean gelim. Mogi zôddun gheunk Efraiman danam dileant.
10. Borem asa; raxttram modle he mogi tim zôddunk pavlim zalear-ui, rokddinch tim hea kunvranchea razacho bhar apnnancher bhôgunk pavtolim.
11. Aplea patkam pasot Efraim' vedi bandit asa, punn heôch vedi mhollear ek patok.
12. Mhojê Somurtintle kitle-i nem' Hanv taka boroun diin zalear, to te apnnak lagoch nant mhonn dhôrta.
13. Mhaka tim bolidanam bhettoitat ani tanchem mas khatat; punn Sorvespor tankam proson’n zaina. Portench zalear, tanchea khotteponnacho To atam ugddas kortolo, ani tanchea patkank khast laitolo; tankam portun Ejiptak vochunk poddtolem.
14. Aplea Rochnnarak visrun Israelan razmhal bandle, Judan ekar-ek kottam-xaram bandlim; punn Hanv tanchea xarancher uzo varoitolom ani tanchea kottancho bhosm kortolom.
