1. Uzia, Jothan, Ahaz ani Hezekia Judant raj choloitale tedna, ani Joashacho put Jeroboam' Israelant raj choloitalo tedna, Hoseak, Beerichea putak, Sorvesporachem utor pavlem.
2. Hosea vorvim Sorvespor poilê pavtti uloilo tedna, Tannem taka oxem mhollem: 'Chol voch ani êkê xindôll bailê kodde logn za ani xindôll bailê koddsun bhurgim zolmak hadd, kiteak mhollear Sorvesporak sôddun diun ak'kho dês êkê xindôll bailê sarko zala.'
3. Mhonnttoch to gelo ani Gomer nanvachê Diblaimachê dhuvê kodde logn zalo; ti gorbhest zali ani tinnem taka êk put zolma haddlo.
4. Tedna Sorvesporan taka mhollem: 'Jezreel mhonn taka nanv ghal, kiteak mhollear thoddea kalla bhitôr, Jehuchea Ghorannean Jezreelak rogot vikrailam dekhun, Hanv taka xikxa laitolom, ani Israelachea Ghoranneachea rajeacho Hanv nas kortolom.
5. To dis pavtôch, Jezreelachea falkeant Hanv Israelacho dhonu môddtolom.'
6. Ti anink êk pavtt gorbhest zali ani êkê dhuvek zolm dilo. Tedna Sorvesporan taka mhollem: 'Tika Lo-Ruhamas mhonn nanv ghal, kiteak fuddarak Hanv Israelachea Ghoranneachi anink doia korcho na, nhoi mhonn tankam bhogsonnem-i diuncho na.
7. Punn Hanv Judachea Ghoranneachi doia kortolom ani tanchem taronn kortolom: dhonuchea, tolvarichea vô ostram-xostranchea bollan nhoi, ghoddeanchê ani ghoddesvaranchê soktin-ui nhoi, punn Sorvespora tanchea Devachê podven Hanv tankam soddoitolom.'
8. Lo-Ruhamasachem dud kaddlea uprant, ti anink êk pavtt gorbhest zali ani tinnem eka putak zolm dilo.
9. Sorvesporan mhollem: 'Lo-Am'mi, oxem taka nanv ghal, kiteak tumi Mhoji porza nhoi, ani Hanv tumcho Dev nhoi.'
10. Tori punn doria lagchê renvechea konniam itli, map gheunk ani hixôb korunk zainaslolea tea konniam itli, Israelachi porza vaddtoli. Jea zagear tankam oxem mhonnlolem: 'Tumi Mhoji porza nhoi', teach zagear tankam mhonnttolim: 'Jivea Devachim bhurgim tumi!'
11. Judeikaram ani Israelkaram novean ekvott'tolim; tim apnnank êkuch fuddari vinchun kaddtolim; ani aplea desa thaun borim pois tim vistaron pavtolim, kiteak bhov vhôdd zatolo to Jezreelacho Dis!
