1. Tedna tumchea bhavank 'Mhoji porza' hea nanvan apoiat, ani 'Tumchi Devan doia keli ' oxem tumchea bhoinnink ulo korat.
2. Tujê avoik bhexttai, bhexttai tika! Ti anink Mhoji potin nhoi, ani Hanv ticho poti nhoi. Tinnem aplea tondda voili apli xindollki bhair uddounchi, ani aplea thanam modlem aplem pordvarponn; na zalear,
3. Hanv tika sarki vinglli korun dakhoitolom, tichea zolma disa ti asli toxich tika vinglli kortolom. Hanv tika eka oronnea sarki kortolom, tika Hanv sukea-korddea desa bhaxen rokhrokhit kortolom, ani tanen tika morunk sôddtolom.
4. Tichea bhurgeancho Hanv doia korcho na, kiteak tim tichê xindollkechim bhurgim.
5. Hôi, tanchi avoi xindollkent jieli; jinnem tankam kusveant samball'lim, tinnem aplench nanv ghannoilem. Tinnem mhollem: 'Mhojea mogiam pattlean hanv vetolim; mhojem lhann-jevonn ani pivonn, mhoji lhonv, mhojim vostram, mhojem tel ani mhozo soro tech mhaka ditole.'
6. Dekhun tichi vatt Hanv kantteamnim addaun dovortolom, ani aplea rosteancher vochona zaunk durig bandun tika veddhun dovortolom.
7. Aplea mogiam pattlean ti dhanvtoli, punn tankam dhôrunk pavchi na. Ti tankam sôdunk vetoli, punn te tika kednanch mellche nant. Tedna ti mhonnttoli: 'Hanv mhojea poilea poti-xim portun vetam; atanchê poros tednanch hanv odik borim aslim.'
8. Tika dhano-gotto, novo soro ani tel ditalo to Hanvuch; ani tim Baalachê sevek vaportalim tem rupem ani bhangar tika diit aslo to Hanvuch; punn hem tinnem adim kednanch vollkhun gheunk naslem.
9. Hea pasot, pikachea vellar, Hanv Mhozo dhano-gotto kann ghetolom ani, dakô toiar zalea uprant, Mhozo novo soro anink diuncho na. Tichem vinglleponn dhampunk Hanv tika ditalom ti Mhoji lhonv ani vostram korpachem sut Hanv kaddun ghetolom.
10. Tichea mogianchea dolleam mukhar Hanv tichi loz dakhoitolom ani tedna Mhojea hatantli konnuch tika suttouncho na.
11. Tichi soglli mouza, ticheô porbô, ticheô Amasô ani tiche Son'var, ani soglle tiche dobajik utsov Hanv bond kortolom.
12. Aplea dakvelinchi ani anjiranchi khobor korun ti mhonnttali:' Mhojea mogiamnim mhaka hi mozuri dilea.' Punn tanchem Hanv ek ran kortolom, ani ran'vott mon'zati tim khaun uddoitoleô.
13. Baalanchea porbanchea disamnim tinnem tankam dhump lasun bhettoil'lo, ani Mhaka visrun aplea mogiam borabôr vochunk kanantlim ani sorpolliô ghalun tinnem apnnakuch xringarloli: hem sogllem Hanv tika farik korunk laitolom - uloita to Sorvespor!
14. Hea pasot Hanv bhuloun-bhuloun tika oronneant vhortolom ani tichê kodde moimogan uloitolom.
15. Thoim tiche dakam-molle Hanv tika portun ditolom ani Akhorachi Khindd Bhorvanxeacho Darvontto kortolom. Zoxem tinnem aplê tornnê piraier kel'lem, zoxem Ejipta thaun bhair sorli tedna tinnem kel'lem, toxem thoim ti Mhaka zobab ditoli.
16. To dis pavtôch - uloita to Sorvespor! - tum Mhaka 'Mhozo Poti' mhonnttolii. Tum Mhaka 'Mhozo Baal' oxem mhonnchi naim.
17. Baalanchim nanvam tichea onttantlim Hanv kaddun uddoitolom, tanchim nanvam anink kednanch ti portun gheunchi na.
18. To dis pavtôch, tanchê pasot Hanv ran'vott mon'zatim kodde, mollba velea suknneam kodde ani zomnir sorpottun choltolea pranniam kodde êk korar kortolom. Hanv bhalo ani tolvar môddtolom, desant anink zhuzam asunk diuncho na, ani tankam sust add poddun nhidunk ditolom.
19. Hanv tuka sasnnak Mhoji potin korun ghetolom, hôi, promannikponan ani neainitin, visvaxi mogan ani doiallaien tuka Hanv Mhoji potin korun ghetolom.
20. Hôi, visvaxiponnan Hanv tuka Mhoji potin korun ghetolom, ani tum Sorvesporak vollkhunk pavtolii.
21. To dis pavtôch - uloita to Sorvespor! - Hanv ontrallak zobab ditolom, ani tem prithumek zobab ditolem,
22. ani prithum' dhanneak, soreak ani telak zobab ditoli, ani tim sogllim Jezreelak zobab ditolim.
23. Ti Mhoji zaunk Hanv tika desant roitolom, Lo-Ruhamasachi Hanv doia kortolom. Lo-Am'mik Hanv oxem mhonntolom: 'Tumi Mhoji porza', ani tim oso zobab ditolim: 'Tum mhozo Dev'.
