1. Israela, Sorvespora tujea Deva-xim portun ie; tujea khotteponnakuch lagun tujem ghortthan zalem.
2. Khorê khonti-dukhichim utram gheun Sorvespora-xim portun ieiat. Taka mhonnat: 'Sogllem amchem khotteponn kaddun uddoi ani borem tench manun ghe. Boilanchê svater ami Tuka amche ontt bhettoitoleanv.
3. Assiriechean amchi soddvônn korunk zaina, ami anink ghoddeancher boschim nanv, vô amcheanch hatamnim kel'lea vostunk "Amchea Deva!" mhonnun ami ulo marchim nanv, kiteak Tujêch sovem onathank mellta kaklut.'
4. Tanchem ovisvaxiponn Hanv pekoitolom, sogllea Mhojea Kallzan Hanv tancho môg kortolom, kiteak Mhozo rag tanchê velo koddsorlo.
5. Dova vori Hanv Israelacher poddtolom, konela bhaxen to fultolo, Lebanonachea devdara bhaxen to pallam ghetolo, tache khande pois-pois vistaron pavtole,
6. taka astoli zoitunam-zhaddachi surupai ani Lebanonacho domdomit pormôll.
7. Tim Mhojê savllê tolla novean jieunk ietolim; tim novean gonv vomptolim, rosroxit zatoli tanchi dak-vêl, Lebanonachea sorea bhaxen nanv vosto zatolo tancho soro.
8. Kuddea devam kodde Efraimak anink koslo sombond? Hanv ki tachem magnnem aikotam ani taka rakhtam. Hanv eka sodam-hirvea soru-rukha sarko, soglli tuji sufollai Mhojêch thaun ieta.
9. Xannim mon'xam him utram somzun gheum, zannar mon'xam tancho ôrth xikum, kiteak Sorvesporacheô vattô nitt-soroll: promannik mon'xam tancher choltat, punn patki mon'xam adllun poddtat.
