1. Jedna Hanv Israelak boro korunk toiar asam, tedna Efraimachem khotteponn ani Samariechem noxtteponn Mhojea dolleam mukhar ietat. Dis-rat lokak fottoun bhonvtat, chor ghoram fôddtat ani movali bhailean dhadd ghaltat.
2. Tanchem sogllem khotteponn Hanv vollkhotam mhonn tim kednanch chintinant. Tori tanchim kortubam tankam veddho ghaltat ani sarkim Mhojea dolleam mukhar tim ubim asat.
3. Tim razak aplea khotteponnan khelloitat ani toxench fuddariank aplea fottimnim.
4. Tim sogllim pordvari; Poderant apoun dovorlolea khorna sarkim tim: pitt môll'lam tedna thaun tem fugon voir soro-sôr toslea khornacho uzo anink perounchi goroz na.
5. Razachea manak moujecho dis monoitat tedna, montri soro pieunk diun taka gorom' kortat, ani apnnacheô moskoriô kortoleancho sotkar raza manun gheta.
6. Tacher guddmêll kortana te khorna bhaxen taplole astat, rat-bhôr tancho krôdh jemeta, magir, sokall pavlo mhonnttoch, to agttea vori pett'ta.
7. Khorench, khorna sarke te soglle taplole asat, ani apnnancher razvôtt choloitoleank girastat. Hê bhaxen soglle tanche raza poddle: eklean porian Mhaka kodinch ulo marunk na.
8. Efraim' raxttram kodde misôll zata. Efraim' êkêch vatten bhazloli polli.
9. Videxiamnim tachem boll khaun uddoilem, punn hachi taka kãi khobor na. Tache kens porian pikot vetat, punn hachi-i taka khoboruch na.
10. Israelak tachench gorv lavun dita, toripunn Sorvespora tanchea Deva-xim tim portun ienant, tim Taka sôdunk vochonant.
11. Efraim' eka pisatt, ogineani parvea sarko: Ejiptak ulo marta, magir Assiriê lagim adar magta.
12. Khoinchê-i vatten tim vochum, Hanv tancher Mhojem zall uddoitolom, mollba veleam suknneam bhaxen Hanv tankam bhuim uddoitolom, tanchea khotteponnak lagun Hanv tankam khast laitolom.
13. Kottakotta tanchem! Mhojê thaun tim koddsorun geleant! Tãnnim Mhaka okman kela, tôr tanchem nisontton zaum! Portun-portun Hanvem tankam sôddoileant, tori tim Mhojê vixim fokot fotti sangtat.
14. Aplea khattincher tim pinrgot asat khorem, punn kallzant thaun Mhaka tim ulo marinant; dhanno ani novo soro apnnank mellchê pasot aplea angak ghave kortat, tori Mhojer tim kolpot asat.
15. Tanchea hatam-pãiank ghottai sokti dili ti Hanvem, tori tim Mhojê add fas manddtat.
16. Nanch tea deva vatten tim vollon vetat, eka ghatkia bhalea sarkim tim. Tanchea mijaxi ulovpak lagun tanche fuddari tolvarin poddtole; Ejiptant lôk kitlo mhonn tankam kenddnniancho mhal korun hanstolo!
