1. Iadnikamnô, hem aikat, Israelachea Ghorannea, haka kan di, Raiall Ghorannea, chit diun aik! kiteak Nit rakhchi tumkam zobabdari dil'li asa, punn tumi zaleant Mizpak manddlolo êk fas, ani Taboracher vistarloli êk rampônn.
2. Shit'timant tãnnim êk khôl fôndd kaddla, dekhun tankam soglleank Hanv khast lavunk vetam.
3. Efraima vixim Hanv sogllem zannom, Israel Mhaka liplolo na. Hôi, Efraima, tum zalai êk xindôll bail, Israel bhoxttol'lo asa.
4. Tanchim kortubam tankam aplea Deva-xim portun ieunk dinant, karonn xindollkechi vondovnni tanchê bhitôr khôl rigloli asa; ani tim Sorvesporak atam anink vollkhonant.
5. Israelachi urmottai takach lavun dita. Israel ani Efraim' apleanch guneanvank lagun khala poddtole ani tanchê borabôr Judas-ui sokla poddtolo.
6. Xelliank ani boilank gheun te Sorvesporak sôdunk bhonvtole, punn To tankam mellpacho na; To tanchê thaun pois gelo.
7. Te Sorvesporak ovisvaxi zaleat, kiteak pottachea bhurgeank tãnnim zolm dila; ani amas pavta mhonnosôr tancho ani tanchea xetam-bhattancho nas zatolo.
8. Gibeak bhongo vazoiat, Ramasak kornno vazoiat, Beth-Avenant zhuzachi halêtt sadoiat: 'Tujê pattlean ami asanv, Benjamina!'
9. Khasticho dis ieta tedna, Efraim' zatolo êk osadd podding zomin. Israelachea kullancher khatren ieunchi asa ti xikxa Hanv porgôtt kortam.
10. Judache fuddari ximeche nis haloitat tosle fotting zaleat. Buddtechea lotta vori Hanv Mhozo krôdh tancher denvo-so kortolom.
11. Efraim' chirddola, tacher poddlam khastichem formonn, tachê khal to chèplolo asa, kiteak zanno zaun to nirupeogi Fotti pattlean gela.
12. Dekhun Hanv Efraimak khorôz koso zatolom, ani Judachea Ghoranneak êk kuslolo ghavo koso.
13. Apunn khorench piddest mhonn Efraiman pollelem tedna ani apnnak ghavo zala mhonn Judan dekhlem tedna, Efraim' Assiriek gelo, Vhoddlea Razacho adar magunk tannem dut pattoile; punn tuka boro korunk ani tuzo ghavo pekounk taka podvi na.
14. Efraimak Hanv eka xinva sarko zatolom, ani Judachea Ghoranneak eka tornnea xinva sarko. Hanvuch tanche kuddkean'-kuddke kortolom ani magir Mhoji fuddli vatt dhôrtolom. Tankam ubarun vhortolom, ani konnacheanuch tankam sôddounk zaunchem na.
15. Aplo guneanv tãnnim vollkhun ghe porian ani Mhaka tim sôdunk vocho porian, aplea dolldirponnant tãnnim Mhaka utsuktaien sôdi porian, Hanv Mhojea nivasant portun vochun ravtolom.
