1. Efraim' uloitalo tedna sogllim kamptalim; Israelant itli taka podvi asli! Punn Baalak bhôzun tannem guneanv kelo tedna, to morun gelo.
2. Atam tim patkar patkam kortat, ani aplea rupeacheô apnnank murti korun ghetat, apnnench ievzun kaddlole kudde dèv te, soglle mellun kolakaranchem kam'. Tim mhonnttat: 'Tankam iodn bhettoiat!' Mon'xam boilancho umo ghetat!
3. Dekhun tim sokallchê dhunvrê sarkim zatolim, rokddoch na zatolea dhova sarkim, kholla velem ubun vetolea pola bhaxen, zonelantlean bhair sortolea dhunvra sarkim.
4. Torui Ejiptant tumi asleat tedna thaun Hanv Sorvespor tumcho Dev. Tedna Mhojê bhair dusrea khoincheach devak tumi vollkhonasleat, kiteak tumkam soddounk anink konn naslo.
5. Oronneant, khoinsoruch udok mellonaslem toslea bhirankull desant, Hanvem tumcho samball kelo. Hanvem tankam chorvak vhelim, ani tim dhadoxi aslim.
6. Êk pavtt dhadoxi zatôch, tanchim kallzam gorvan bhòrlim ani dekhun tim Mhaka visrunk pavlim.
7. Borem tôr, Hanv tankam eka xinva sarko zatolom, rostear doddeak ravlolea bibttea vaga sarko.
8. Aplea ubarun vhel'lea petteank sôdunk bhonvtolea eka ansvela bhaxen Hanv tankam mellunk vetolom ani kat pinzun tanchim kallzam konchoun kaddtolom; ani thoim êkê xinvnni bhaxen Hanv tankam khatolom, eka ran'vott zonavora bhaxen tanche kuddkean'-kuddke kortolom.
9. Israela, tujea adarak Hanv ekloch asam, tori tunvench tujem nisontton korun ghetleim.
10. Tuzo raza, tuka sôddounk to atam khoim asa? Sogllea tujea xaramnim tuka choloitale te fuddari, atam khoim pavle te? Tanchê vixim ulo marun tum mhonnttaloi: 'Mhaka êk raza di, mhaka fuddari di.'
11. Mhojea ragachea vellar Hanvem tuka êk raza dilo, ani Mhozo kinv choddlo tedna Hanvem taka kann ghetlo.
12. Efraimacho guneanv favo tê porim rakhun dovorla, tachem patok borem samballun dovorlam.
13. Zolma ietolea bhurgeache koxtt tacher aileat, punn to êk ginean-naslolo bhurgo; tacho vêll pavlo, torui to kusvo sôddina.
14. Patallachê podventlim Hanv tankam soddoum? Mornnantlim tankam nivarum? Ê Mornna, tujeô pidda khoim? Ê Patalla, tujim sonkoxttam khõi? Churchure dhôrunk Mhaka atam dolle nant.
15. Efraim' aplea bhavam poros odik follam dita zait, tori Udentik thaun varem ietolem, oronneant thaun sutt'tolo Sorvesporacho svas. To tacheô udkacheô zhori sukoitolo, tachea zhoreantlem anink udok vhanvonk diuncho na, molachem asot titlem-i kaddun tache ttheve sarke rite korun sôddtolo.
16. Aplea Devacher kolpoli mhonnun, hea guneanvachem Samaria farikponn ditoli. Tim tolvarin poddtolim, tanchea ballank dhornnir apttun tanche kuddkean'-kuddke kortole, tanchea gorbhest bailancho kusvo chirun ugôddtole.
