1. Israelachea putam-dhuvamnô, Sorvesporachem utor aikat. Sorvespor desantlea lokacher arôp manddta: desant visvaxiponn na, khoro môg na, Devachi vollokh na,
2. asa fokot lottik soput ani fotti, khun, choriô ani pordvar! Tanchê zobordostek xim’-mer na: rogot vikraitat toxem vikraitat;
3. heach pasot dês dukh korta ani thoim jietat tea soglleancho-i jiv virun veta, ran'vott zonavoram ani ontralla velim suknnim, ani doriantli maslli porian nanch zatolim.
4. Khoincheach mon'xan konnacheruch arôp korum noiê, konnakuch bhexttaum noiê; tujer, iadnika, Hanv arôp kortam.
5. Tum, iadnika, disachea uzvadda tum adllun poddtoloi, ani ratchea kallokhant tujê borabôr provadi-i adllun poddtolo, ani Hanv tumchê avoicho nas kortolom.
6. Somurtichi vollokh na zaun Mhojê porjechem nisontton zata. Tunvem (Somurtichi) vollokh soddun dilii dekhun, Hanv-ui tuka Mhozo iadnik mhonn vollkhun gheuncho na; tujea Devachê Somurticher tunvem visôr ghaloi dekhun, Hanv Mhojê pallien tujea bhurgeank visortolom.
7. Jitli tanchi sonkia vaddon geli, titlim chodd zalim Mhojer add tanchim patkam. Zo tanchi Mhoima zaun aslo, Taka sôddun tãnnim Lojechi seva keli.
8. Mhojê porjechea patkan te matleat, tanchem khotteponn vaddlolem polleunk te axetat.
9. Zoxem porjek toxem iadnikank: tanchê vagnnukek lagun Hanv tankam xikxa laitolom, tanchea kortubam pormannem Hanv tankam farik kortolom.
10. Te jevtole punn kednanch dhadoxi zaunche nant, xindollki kortole punn odik bhurgim tankam aschim nant, kiteak, xidollkek lobhdon, tãnnim Sorvesporak sôddun dilo.
11. Xindollki, pornno ani novo soro Mhojê porjechi budhvontkai kaddtat.
12. Tim aplea lottingeachi budh ghetat, tanchi lankddachi boddi tanchea vicharank zobab dita. Xindollkechê vondovnnek lagun tim vatt chuktat, xindollkek lobhdon tim aplea Devak patt kortat.
13. Porvotanchê tenkxer tim iodn bhettoitat, soru, hivôr ani xindur rukhanchea pondak savlli xitoll mhonnun, dongrancher tim dhump lastat. Zorui tumcheô dhuvô xindollkechi vatt dhôrtat ani tumcheô sunô pordvar kortat,
14. torui tumchea dhuvank tanchê xindollkê khatir, ani tumchea sunank tanchea pordvara khatir, Hanv khast lavcho na, kiteak dadle apunnuch xindoll bailam kodde bhonvtat ani devllantlea naikinim sangatim iodn bhettoitat. Oxem budh-nasloli porza ghorttannak pavta.
15. Zorui tum, Israela, xindollkek lobhdolai, torui Judan-ui tench patok korchi koslich goroz na. Gilgalak vochum nakat, Beth Avenak choddun vochum nakat, 'Sorvesporachea Jivachean' soput gheum nakat.
16. Kiteak Israel nibôr manicho, nibôr manichea paddkulea sarko; tôr koso mhonn Sorvespor lamb-rund chorva-moidanar taka chorounk vhortolo?
17. Efraim' kuddea devank chikttun jieta - asum-di taka!
18. Tanchim dhumxannam somplim toxim, tanchi xindollki suru zata; Zo tanchi Vhoddvik aslo Taka sôddun, tanche fuddari Lojechea mogant poddleat.
19. Vadoll tankam zhaddun vhortolem, ani tanchim sogllim bolidanam tankam fokot loz zôddun ghetolim.
