1. Efraim' aplea jevnnak varem gheta, Udentichea varea pattlean dis bhôr to dhanvta, tacheô fosovnniô ani zobordosti vaddot vetat; Assiriê kodde koblat kortat and dusrê vatten Ejiptak zoitunanchem tel dhaddtat.
2. Israelacher virudh Sorvesporacho tokrar asa, Jakobak tachê vagnnukê pormannem To xikxa laitolo ani tachea kornniank favo tosli taka mozuri ditolo.
3. Kusveant tannem aplea bhavak jikhun ghetlo, ani zannto zatôch tannem Deva kodde loddai keli.
4. Devduta kodde to zhogoddlo ani tacher zoitivont zalo; to roddlo and poratun tannem tacho upkar maglo. Magir Bethelant To taka mell'llo and thoim Dev amchê kodde uloilo.
5. Hôi, Sorvespor, Sorvsoktivont Dev, Sorvespor Tachem nanv!
6. Tôr atam tujea Deva-xim portun ie, visvaxi mogachi ani nitichi vatt dhôr ani tuzo visvas sodanch Sorvesporacher dovor.
7. Khotteô tagddiô vaporta toslo veapari to, fottoun chorunk taka ekdom' borem dista.
8. Efraim' mhonntta: 'Kitlo mhonn girest zalam hanv! Hanvem khub girestkai zomoilea. Ani zomoil'lê girestkaient konnakuch koslich chuk vô patok mellchem na.'
9. Punn Ejiptant tumi asleat tedna thaun Hanv Sorvespor tumcho Dev. Zomatichea disamnim ghòddlem toxem, anink êk pavtt Hanv tumkam tombumnim jie-xim kortolom.
10. Hanv provadiam vorvim uloitolom, ekar-ek dorxonam vaddoitolom ani provadiam udexim voparimnim zaitem kollit kortolom.
11. Gilead khotteponnant romblolo asa. Hôi, tankam anink koslench mol na! Gilgalak tim boilank iodn bhettoitat, dekhun tancheô vedi tas ghal'lea xetantlea fatranchea raxim sarkeô zaleat.
12. Jakob Aramachea mollamnim pollun gelo; thoim apnnak êk bail zôddun gheunk Israelan chakracho vavr kelo, êk bail zôddun gheunk tannem xellianchi rakhônn keli.
13. Eka provadia udexim Sorvesporan Israelak Ejiptantlo bhair kaddlo ani eka provadia vorvim Israelachem taronn zalem.
14. Kanttallo haddi-sôr Efraiman Mhaka tiddoila. Tannem vikrai'lem rogot Sorvespor taka bhuzo-xem kortolo, tannem ninda keli, tôr tacho Dhoni taka farik kortolo.
