1. Artashershes, hacho put Darius, zolman Mediani, Kaldeiacho raza zal'lo ani tachê razvôttkechem poilem voros choltalem.
2. Tachê razvôttkechea poilea vorsa, hanv, Daniel, Povitr Pustokam xiktalom ani Sorvesporan Jeremias provadiak dokhol kel'lim tim vorsam mêztalom. Jerusaleachem nisontton sompchê adim, him vorsam, mhonngê sot'tôr vorsam, bollanddun vochunk zai aslim.
3. Sorvespora Devak hanv poratunk laglom: upas korun, sakafotte anang pangrun, gobrar bosun hanv vinovnni korit aslom.
4. Hanvem Sorvespora mhojea Devak vinonti keli ani patkam oxim vollkhun ghetlim: 'Sorvespora, Tum bhov vorto ani bhirankull Dev! Korarak Tum sodanch visvaxi, ani Tuzo môg kortoleank ani Tujeô adnia palltoleank Tum visvaxi môg dakhoitai!
5. Ami patok kelam, ami vaitt kelam, khotteponnachea margar ami chol'leanv; Tujea adniancher ani hukumancher add vochun, tanchê thaun ami koddsorleanv.
6. Tuje sevok provadi Tujea Nanvan amchea razam ani kunvram kodde, amchea purvozam kodde ani amchea desachê ak'khê porjê kodde uloile, punn ami tanchem aikunk na.
7. Tum, Sorvespora, kortai titlem-i sodanch doiallaien ani nitivontponnan kortai, punn ami ki amkanch loz magun ghetlea: loz Judachea lokak, Jerusaleachea nagrikank, ani ak'khê Israel-porjek, lagxileank toxem poixileank, mhonngê Tuka ovisvaxi zal'lean Tunvem desam-desamnim ximpddailoleank, amkam soglleank loz!
8. Sorvespora, amkam soglleank - amchea razank, amchea odhikariank ani amchea purvozank - loz ani beman favo, kiteak ami Tujer add patok kelam.
9. Punn Tannench, Sorvespora amchea Devan, amchi kaklut korchi ani bhogsonnem diunchem, kiteak Tacher ami kolpoleanv,
10. ani Sorvespora amchea Devacho tallo ami aikunk na, nhoi mhonn Aplea sevokam provadiam udexim Tannem dil'leô adnia ami pallunk nant.
11. Sogllê Israel porjen Tujê Somurtichi beporva kelea ani, Tujea talleak kan diunk kobul na zaun, Tujê thaun ti koddsorlea, ani Tujea chakra Moizesachê Somurtint boroil'lo asa to sogllo xirap ani birmôt amcher denvun aileant, karonn ami Tacher patok kelam.
12. Jeô dhomkavnniô Tannem amkam ani amcher razvôttki choloitoleank dil'leô, teô Tannem atam xarthi pavoileô; mhonngê iedem vhoddo druxtt Apunn amcher dhaddtolo, ki Jerusaleak zatolem tem anink khoincheach xarak ak'khea ontralla sokla zal'lem mellchem na: oxi Tachi dhomkavnni asli.
13. Ani, Moizesachê Somurtint boroil'lem asa toxem, he soglle sonkoxtt amcher atam aile, torui amchea guneanvank patt korun ani Tujem sot vollkhun gheun Sorvespora amchea Devachem boreponn ami zôddunk na.
14. Amcher sonkoxtt dhaddunk, Sorvesporan vêll sôdun kaddla, karonn Sorvespor amcho Dev sogllea Tachea kornniamnim nitivont, punn ami Tachea talleak kan diunk na.
15. Ani atam, Sorvespora amchea Deva, Tujea bollixtt hatan Tunvem amkam Egiptantlim bhair kaddlim-i tedna ji kirti Tunvem zôddloli, ti ozun togta; ami patok kelam, ami vaitt kelam.
16. Sorvespora, Jerusalem Tujem Xar, Tuzo povitr Dongôr; tôr sogllea Tujea soddvônn ditolea doiall ani nitivontponnachea kornniam pormannem, tachê thaun Tuzo rag ani krôdh pois kaddun uddoi, kiteak amchea patkank lagun ani amchea purvozanchea odhormi kornniank lagun, amchea bhonvtonnchea lokank Jerusalem Xar ani Tuji porza kenddnniancho mhal zaleant.
17. Ani atam, amchea Deva, Tujea chakrachem magnnem ani vinonti aikun ghe. Tujêch khatir, Sorvespora, Tujea padd zal'lea Devmondiracher Tujea mukhamollacho porzôll novean poddum-di.
18. Aik, Deva mhojea, aik amkam; Tuje dolle ugôdd ani koslê doxer ami pavleanv' polle, ami ani Tujem Nanv aslolem Xar. Amchea promannik kornniancher nhoi, punn Tujê vhôdd kakluticher patieun, ami Tuka amchi vinonti kortanv.
19. Sorvespora, aik! Bhogôs, Sorvespora! Sorvespora, aik ani kamak lag! Tujêch khatir, Deva mhojea, kallav korin aka! - Karonn Tujea Xarak ani Tujê porjek Tujem Nanv dil'lem asa.'
20. Hanv oso uloit aslom, hanv magnnem korit aslom, hanv mhojim ani mhojê Israel porjechim patkam vollkhun gheit aslom, ani Sorvespora mhojea Devachea fuddeant mhojea Devachea povitr Dongra pasot vinonti korit aslom;
21. tedna, hanv ozun uloit astana, magnnem korit astana, zaka hanvem dorxonant poilo pollel'lo toch Gabriel sanjechea iodnachea vellar mhojê-xim uddun denvun ailo.
22. To ailo, to uloilo, tannem mhaka oxem mhollem: 'Atam, Daniel, hea dorxonachi sarki somzonni tuka diunk hanv denvun ailam.
23. Tunvem tuji vinonti suru kelii tedna, ek utor ucharlolem hanvem aikolem ani hanv tem tuka sangunk ailam. Tum kherit bhaxen venchun kaddlolo monis. Hea utracho ôrth bariksannen somzun ghe, dorxonnacho ôrth xik:
24. Tujê porjê ani tujea povitr Xara pasot sot'tôr satollim nemlolim asat: tedna sogllê toreche opradh somptole, patkacho bhosm zatolo, sogllea khotteponnachem bhogsonnem melltolem, sodam togpachem promannikponn sthapon ietolem, dorxonam ani bhakitam purnn zatolim, porom'-povitracho obhixêk zatolo.
25. Hea pasot, hem tum zanno za ani somzun ghe: "Portun ie ani Jerusalem novean bandun kadd" - ho sondêx bhair sorlo tea vella thaun 'Obhixikt' ie-sôr sat satollim ani basôtth (62) satollim bollanddtolim, ani hem sonkoxttachea kallar zatolem. Xar bandon ietolem, novean bandon ietole Tache chovk ani kil'leancheô vonnti.
26. Basôtth (62) satollim somplea uprant, tachea guneanva virêt, eka Obhixiktak jivexim martole. Ieuncho asa to razkunvôr Xar ani Devmondir bhosmun uddoitolo. Punn tea razkunvracho xevôtt zatolo nisontton, ani xevôtt porian zhuz astolem, ani soglleacho nas zauncho mhonn Devachem formonn asa.
27. Ek satollem-bhôr zaitea fuddariam kodde to êk thir kôtt kortolo; ani ordem satollem iôdn ani bhettovnniô to bond dovortolo, ani Devmondirachê kuxik, xevôtt porian, ghorttann kortoleacho Devan formail'lo nas zai porian, bhirankull sotianasacho kanttallo vostolo.'
