1. 31 (1) ani Mediekar Darius hannem basôtth (62) vorsanchê piraier raj aplea hatant ghetlem.
2. Ak'khea rajeacho karbhar cholounk Darius razan ekxem-vis razpal nemle,
3. ani tanchê voir teg mhamontri; hantlo eklo Daniel aslo. Razacho hitsombond borê toren rakhchê khatir, razpalamnim hea tegam mhamontriank aplea karbharacho hixôb diuncho aslo.
4. Punn Daniel ojapanchê budhin bhòrlolo monis aslo dekhun, to her mhamontriam ani razpalam poros itlo odik ut'tom' aslo, ki raza ak'khea rajeacho karbhar cholounk Danielak nemunk ievjitalo.
5. Dekhun her razpal ani mhamontri, Daniel aplea karbharache kaide koso pallta tachê vixim, koslem-i tori tacher add garannem korchê khatir ek nimit sôdun kaddunk proitn korunk lagle: punn tokrar korunk tankam koslench karonn mellona zalem. Kiteak mhollear Daniel itlo promannik monis aslo, ki tachea razkarbharant tankam êk-ui chuk mellona zali, nhoi mhonn koslich besarmai.
6. Hea mon'xamnim tedna oxem chintlem: 'Tachea Devachea kaidea vixim tacher add kitem-i sôdun kaddlea xivai, hea Danielacher add garannem korunk amkam kãich mellpachem na.'
7. Mhonnttôch he mhamontri ani razpal borabôr raza-xim gele. Tãnnim taka mhollem: 'Darius raza, tum hozar vorsam jieum!
8. Ami soglle, tujea rajeacho karbhar choloitanv te -- mhamontri, razpal, up-razpal, ani her odhikari -- amam-somestanchem ek mot oxem zalam ki razan ho kaido ghalun oxem formonn bhair kaddchem: 'Fuddlea tis disam bhitôr tujê bhair, Mharaza, dusrea khoinchea-i devak vô mon'xak konn-ui magnnem korit tôr, taka xinvanchê khonddint uddouncho.'
9. Maharaza, hea dakhleacher tuji nixanni marun, ho hukum' rokddoch monzur kôr; Mediani ani Parxi lokanchea kaidea pormannem tacher kãi bodlop korunk zaina, nhoi mhonn to rôd'd korunk zaina, toso to kaido kôr.'
10. Sanglolê pormannem hukum' boroun aslo tea dakhleacher Darius razan apli nixanni marli.
11. Darius razan dakhleacher nixanni marli mhonn Danielan aikolem tedna, to aplea ghora gelo. Malloier aslolea tachea kuddachim zonelam Jerusalea vatten ugòddtalim. Sodam korun ail'lo tê bhaxen, dôr-disa tin pavtti to dimbier poddun magnnem kortalo ani Devak vakhanntalo.
12. Te monis zoma zaun aile, ani Daniel prarthon kortalo ani Devak vinoitalo to tankam mell'llo. Uprant raza-xim vochun tãnnim taka raiall hukumacho ugddas kelo. Tãnnim mhollem: 'Mharaza, tis dis tujê bhair khoincheach devak vô mon'xak konnench magnnem korchem nhoi mhonn ani oxem kortoleak xinvanchê khonddint uddouncho mhonn nixanni korun tunvem hukum' ghalunk naim?' Razan zobab dilo: 'Ghetlolo nirnnoi chalu asa; Mediani ani Parxi lokanchea kaidea pormannem to kaddunk zaina.'
13. Tedna tãnnim razak mhollem 'Maharaza, Judeiantlea nirvaxitam modlo Daniel tuji ani tunvem nixanni kel'lea hukumachi beporva korta; disak tin pavtti to magnnem korta.'
14. Hem aikun raza ekdom' khontovlo ani tannem Danielak sôddounk ievjilem; kosli-i tori manddnni ievzun kaddunk dis darir poddo-sôr tannem apli tokli zhoroili.
15. Punn te monis razacher boll korit ravle; te mhonnttale: 'Maharaza, Mediani ani Parxi lokanchea kaidea pormannem êk pavtt razan hukum' vô kaido porgôtt kortôch, to anink bodlunk zaina mhonn ugddas dhôr.'
16. Tedna razan Danielak dhôrun xinvanchê khonddint uddounk formailem. Razan Danielak mhollem: 'Jea Devachi seva itlea visvaxiponnan tunvem kelea, toch Dev tuka soddoitolo.'
17. Tedna êk fatôr haddli ani khonddachea darar ôddli ani aploch ani aplea sordarancho xik'ko marun razan tem dar bond kelem; hê porim Daniela vixim ghetlolo nirnnoi anink bodlunk zauncho naslo.
18. Raza aplea razmhalant portolo ani upas korun tannem ti rat sarli, ani khoinchê-i aplê up-potinik apnna-xim gheunk to kobul zalo na. Ani taka bilkul nhid poddunk na.
19. Bhov sokallim fantear raza utthlo ani taktin xinvanchê khonddi-xim gelo.
20. Thoim pavtôch, dukhest tallean tannem Danielak ulo marlo: 'Daniel, jivea Devachea sevoka! Itlea visvaxiponnan tum seva kortai tea Deva kodde tuka xinvanchea chopkeantlo soddounk ghòddlam mum?'
21. Danielan zobab dilo: 'Mharaza, hozar vorsam tum jieum!
22. Mhojea Devan Aplea dutak dhaddlo ani tannem xinvanchim dhaddam bond kelim ani tãnnim mhaka kãich vaitt korunk na, kiteak Tachê mukhar hanv niropradhi, ani hanvem tuka, mharaza, koslench vaitt korunk na.'
23. Raza ekdom' khuxal zalo ani Danielak tê khonddintlo bhair kaddunk tannem formailem. Danielak khonddintlo bhair kaddlo, ani taka kãich vaitt zaunk na mhonn soglleamnim pollelem, kiteak tannem aplea Devacher visvas dovorlolo.
24. Danielacher arôp ghal'lo tankam razan apounk dhaddle ani tankam, tanchea bailank ani bhurgeank tê khonddint uddoilim; tim khonddichê khorik pavchê adinch xinvamnim tankam dhôrlim ani tanchea haddanche kuddkean'-kuddke kele.
25. Darius razan prithumecher jietolea sogllea raxttranchea mon'xank, porzank ani soglleô bhasô uloitolea lokank oxem boroilem: 'Subham' xanti tumkam!
26. Ho mhozo hukum': Ak'khea mhojea rajeant soglleamnim Danielachea Deva mukhar bhirantin kampchem, kiteak Toch jivo Dev, To sodankal jieta, Tachea rajeachem kednanch nisontton zaunchem na, ani Tachi razvôttki togtoli sodam-sorvodam.
27. To taronn dita, suttka dita, ontrallar ani prithumer To ojapam ani vismitam korta; xinvanchea chopkeantlo Tannem Danielak soddoilo.'
28. Darius ani Persiecho Sirus hea razanchê razvôttkent ho Daniel sukh-sontosan jielo.
