1. Nebukadnezzar razan êkbhangarachi murti keli. Tichi unchai nnovod hat ani rundai nnov hat. Tannem ti murti Babiloniechea prantant, Dura nanvachea moidanar ubarli.
2. Tea uprant Nebukadnezzar razan sordarank, mon'subidarank, razpalank, montriank, bhanddariank, nitidarank, vokilank ani prantanchea sogllea odhikariank zoma zaunk ani Nebukadnezzar razan ubarlolê murtichê Bhettovnnek hajir zaunk apoile.
3. Tedna sordar, mon'subidar, razpal, montri, bhanddari, nitidar, vokil ani prantanche soglle odhikari Nebukadnezzar razan ubarlolê murtichê Bhettovnnek zoma zale ani Nebukadnezzar razan ubarlolê murti fuddeant ube ravle.
4. Magir eka perganvan vhoddlean oxem porgôtt kelem: 'Sonvsarantlea porzamnô, raxttramnô ani veg-vegllea bhasanchea lokamnô! Tumkam ami ho hukum' ghaltanv:
5. tumi korneacho, pirlukecho, vinneacho, trikonnacho, kin'norecho, xingacho ani sogllê torechea vazontrancho avaz aikona fuddem, saxttangim poddun Nebukadnezzar razan ubarlolê bhangarachê murtik tumi bhôztoleat.
6. Zo konn sorpôtt poddona ani murtik bhozona, taka rokddoch eka zolltea ujeachea khornant uddoitole.'
7. Mhonnttôch sogllea lokamnim korneacho, pirlukecho, vinneacho, trikonnacho, kin'norecho, xingacho ani sogllê torechea vazontrancho avaz aikona fuddem, soglleô porza, raxttram ani sorv bhasancho lôk saxttangim poddlim ani Nebukadnezzar razan ubarlolê murtik bhôzlim.
8. Tednanch thodde Kaldeikar Nebukadnezzar raza fuddem aile ani vaitt monan Judevancher add tãnnim firiad keli.
9. Nebukadnezzar razak tãnnim mhollem: 'Mharaza, hozar vorsam tum jieum!
10. Mharaza, tunvem oso êk kaido bhair kaddla ki, jedna korneacho, pirlukecho, vinneacho, trikonnacho, kin'norecho, xingacho ani sogllê torechea vazontrancho avaz konn-ui aikot, tedna tannem saxttangim poddun bhangarachi murti bhôzchi mhonn tunvem kaido bhair kaddla, Mharaza;
11. ani konn-ui saxttangim poddona ani tika bhozona tôr, taka zolltea ujeachea khornant uddouncho.
12. Tôr tunvem Babiloniê prantachea razki kariachi vevostha kãi Judevanchea hatant dil'li asa: te mhollear Shadrak, Meshak ani Abednego; hãnnim, Mharaza, tuji adnia pallunk na; te tujea devanchi chakri korinant, ani tunvem ubarlolê bhangarachê murtik bhôzunk te kobul nant.'
13. Hem aikun, Nebukadnezzarrazacho rag choddlo ani tannem Shadrakak, Meshakak ani Abednegok apounk dhaddle. Tankam rokddech razachea fuddeant haddle.
14. Nebukadnezzaran tankam vicharlem: 'Shadrak, Meshak ani Abednego, mhojea devanchi tumi seva korinant ani hanvem ubarlea tê bhangarachê murtik tumi bhozonant, hem khorem?
15. Atam, korneacho, pirlukecho, vinneacho, trikonnacho, kin'norecho, xingacho ani sogllê torechea vazontrancho avaz tumi aikotoleat tedna, saxttangim poddun hanvem ubarlolê murtik bhôzunk tumi toiar asat zalear, borem asa. Punn tumi tika bhôzunk kobul nant tôr, rokdde tumkam eka zolltea ujeachea khornant uddoitole. Ani tedna, khõicho dêv mhojea hatantle tumkam nivarunk xokot?
16. Shadrak, Meshak ani Abednego, hãnnim Nebukadnezzarak oso portipall kelo: 'Tujea vicharak ami zobab diunchi gorozuch na!
17. Mharaza, ami chakri kortanv to amcho Dev zolltea ujeachea khornantle amkam nivarunk xokta ani tujea-i hatantlo To amkam nivartolo!
18. Punn hem zanno za, raza: To amkam nivarina zait zalear porian, ami tujea devanchi chakri korche nanv, ani tunvem ubarlea tê murtik bhôzche nanv!'
19. Him utram aikun, Nebukadnezzar ekdom' ragavlo; Shadrak, Meshak ani Abednego, hankam polleun, tachem rup sarkench bodòl'lem. To khôrn sodam tapoitale tea-vôn sat pavtti odik tannem tapounk lailo
20. Ani Aplê foujentlea kãi mozbut mon'xank apoun, tannem Shadrakak, Meshakak ani Abednegok bandun zolltea ujeachea khornant uddounk formailem.
21. Tankam tanchea avoronnam, paijamam, muddaxeam ani her vostram soit bandle ani zolltea ujeachea khornant uddoile.
22. Razachi adnia itli khôr asli ani ujeacho khôrn itlo nettan zolltalo, ki Shadrakak, Meshakak ani Abednegok dhôrun vhortale te monis, ujeacho dhôg lagun, lason mele;
23. te teg monis - Shadrak, Meshak ani Abednego zolltea ujeachea khornant bandlole poddle.
24. Ani Devak vakhannun ani Tachi thoknnai korun, ujea modem te bhonvtale.
25. Ujea modem ubo ravun, Azaria oxem vhoddlean magnnem korunk laglo:
26. Sorvespora, amchea purvozanchea Deva, Tuka vakhann'nni ani man-bhovman mellum. Mhoimevont zaum Tujem Nanv sasnnachea sasnnak!
27. Tunvem amchê khatir kel'lea sogttant Tum nitivont, soglleô Tujeô kornniô sotacheô, soglleô Tujeô vattô nitt, soglle Tuje nivadde khore.
28. Tunvem amkam nirmil'lea sogttant ani Jerusaleacher, amchea purvozanchea Povitr Xaracher, Tunvem dileai te nirnnoi nitiche; amchea patkank favo tea mapan Tunvem amkam xikxa dileai.
29. Hôi, ami patok kelam ani Tuka sôddun ami motto guneanv kela; hôi, ami vhodd patok kelam; Tujea adniank ami kan diunk na,
30. teô ami pallunk nant; jem amcheach boreak Tunvem amkam korunk lail'leim, tem ami korunk na.
31. Hôi, jem sogllem Tunvem amcher dhaddlãi, jem sogllem Tunvem amkam favo kelãi, tem khorench Tunvem niti pormannem kelãi.
32. Amchea dusmananchê adhin, Xastr-naslolea lokachê adhin, Dev-dhôrm naslolea mon'xam modlea odik paxtt aslolea mon'xachê adhin, eka khottea razachê adhin, sonvsarantlea sogllea razam-vôn vaittovea razachê adhin, Tunvem amkam kelim-i.
33. Aiz amchem tondd ugddunk amkam hôk'k na, Tuji chakri kortoleanchi ani Tuka bhôztoleanchi gôt mhollear loz ani beman.
34. Sorvespora, Tujea Nanva khatir amkam sodankal sanddum naka;
35. Tunvem mollbachea noketram sarki ani vellê voilê renvechea konniam sarki, hixôb-nasloli sonsôt bhasail'lii tea Tujea ixtta Abrahama khatir, tujea chakra Izakak lagun, ani Tunvem povitr kel'lea Israela pasot, Tuzo korar sôddun dium naka: amkam Tujê kakluti virêt sanddum naka.
37. Sorvespora, sogllea raxttram poros ami atam ek lhan raxttr zaleanv; amchea patkank lagun, sogllê prithumê voir mon'xam atam amchi beporva kortat.
38. Hea kallar amkam konn-eklo fuddari mhonn na, provadi na, raza na, hôm' na, iôdn na, bolidan na, dhump lasop na, Tuka prothom'-follam bhettounk ani Tuji kurpa zôddun gheunk amkam zago na.
39. Punn kenkreanche ani paddkuleanche, hozar dattea-mottea menddreanche, hom' zal'lê porim, amchem khontibhorit kalliz ani khaltem zal'lem mon Tuka manom:
40. hench zaum aichea disa Tujê mukhar amchem bolidan! Ani sogllea kallzan Tuzo pattlav korunk amkam nirmi, kiteak Tujer visvas tthevtat tim kodinch lojek sampoddchim nant.
41. Atam sogllea kallzan Tuzo pattlav korunk, Tujem bhem dhorunk ani Tujench mukhamoll novean sôdunk ami lagtanv.
42. Amkam lojek sampddonk dium naka, punn Tum dulôb ani bhov kaklutchar mhonnun, têch dulobaien ani kaklutin amkam vagoi.
43. Tum ojapanchim kortutvam korit asai, tôr oslench ek ojapanchem kortutv korun amkam sôddoi, ani Tujea Nanvak, Sorvespora, novean mhoima zôddun ghe!
44. Tujea chakrank tras ditat tim gondhollak sampddum, tim lojen bhorom, tanchi soglli podvi nattak zaum, ani tanchi ghottai moddon vochum.
45. Sogllea sonvsara voir mhoimevont Tum ekloch Dev ani Dhoni mhonn tim vollkhunk pavum'.
46. Ho sogllo vêll, tankam ujeachea agtteant uddoil'le te razache chakor petrolan, ddamran, razvan ani kanttiamnim uzo peroit asle.
47. Oxe ujeache zall sumar chovdheat'tor (74) hat khorna voir pavle.
48. Ani, ievtten-tevtten uddon, hea ujeachea zallamnim lagim aslolea Kaldeikarank lhasun uddoile.
49. Punn Sorvesporacho dut ujeachea khornnant Azaria ani tache sangati asle thoim denvun ailo; tannem ujeache zall khorna bhair ghale, 50 ani vareachi ani dovachi zal'lê porim osli xitollai tankam khorna modem funkun pavoili, ki uzo tankam lagunkuch na, ani tãnnim koslich dukh, nhoi mhonn koslech tollmolle, bhôgunk nant.
51. Tea uprant te teg-ui ujeachea khornant thaun Devak vakhannun ani dhin'vasun oxem eka tallean gavunk lagle:
52. Sorvespora, amchea purvozanchea Deva, ami Tuji stuti kortanv: vakhann'nni ani vhoddvik Tuka sasnnachea-sasnnak! Tujem mhoimevont ani Povitr Nanv vhodd zaum': vakhann'nni ani vhoddvik Tuka sasnnachea-sasnnak!
53. Tujê povitr mhoimechea Mondirant ami Tuji stuti kortanv: sogtta-sorvam-vôn vhoddvik ani mhoima Tuka sasnnachea sasnnak!
54. Tujea rajeachea xinvasonar ami Tuji stuti kortanv: sogtta-sorvam-vôn vhoddvik ani mhoima Tuka sasnnachea sasnnak!
55. Somdiracho tthav ghetai To Tum, sogtta-sorvam-vôn vhoddvik ani mhoima Tuka sasnnachea sasnnak!
56. Ontrallachea vistarant ami Tuji stuti kortanv: sogtta-sorvam-vôn vhoddvik ani mhoima Tuka sasnnachea sasnnak!
57. Sorvesporachea sogllea rochnnamnô, Tachi vakhann'nni korat, Taka mhoima diat sasnnachea-sasnnak!
58. Sorvesporachea dutamnô, Sorvesporachi stuti korat, Tachi vakhann'nni korat, Taka mhoima diat sasnnachea-sasnnak!
59. Mollbamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
60. Mollbam voir aslolea sogllea udkamnô, Sorvesporachi stuti korat Tachi vakhann'nni korat, Taka mhoima diat sasnnachea-sasnnak!
61. Sorvesporachea podviamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
62. Suria ani chondrima, Sorvesporachi stuti korat! Tachi vakhann'nni korat! Taka mhoima diat sasnnachea-sasnnak!
63. Mollba velea noketramnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
64. Pausa-pausa, dova-dova, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
65. Varea-vareamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
66. Ujea ani gormê, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
67. Thonddaiê ani gormê, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
68. Dova-dova, hima-tufanamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
69. Hima ani thonddaiê, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
70. Borfa ani hima, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
71. Ratimnô ani disamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
72. Uzvadda ani kallokha, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
73. Zhoglavnneamnô ani kupamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
74. Prithumê, Sorvesporachi stuti kôr! Tachi vakhann'nni kôr, Taka mhoima di sasnnachea-sasnnak!
75. Porvotamnô ani dongramnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
76. Prithver utpon zatolea sogllea rukham-zhaddamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
77. Udkachea zhorimnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
78. Doriamnô ani nodimnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
79. Timaxeamnô ani udkant jietolea sorv pranniamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
80. Mollbachea sogllea suknneamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
81. Sogllea ran'vott ani ghoravea mon'zatimmô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
82. Mon'xanchea putam-dhuvamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
83. Israela, Sorvesporachi stuti kôr! Tachi vakhann'nni kôr, Taka mhoima di sasnnachea-sasnnak!
84. Iadnikamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
85. Sorvesporachea chakramnô, Tachi stuti korat! Tachi vakhann'nni korat, Taka mhoima diat sasnnachea-sasnnak!
86. Jivim aslolea promannik mon'xamnô, kallzant thaun Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
87. Bhoktivont ani khaltea kallzachea mon'xamnô, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak!
88. Ananias, Azarias, Mishael, Sorvesporachi stuti korat! Tachi vakhann'nni korat, Taka mhoima diat sasnnachea-sasnnak! Kiteak Mornnachea chopkeantle Tannem amkam soddoile, zolltea ujeachea khornantle Tannem amkam oddun kaddle, ujea modle Tannem amkam nivarle!
89. Sorvesporak dhin'vasat, kiteak To boro, Tacho maiêmôg togta sasnna-sasnnak!
90. Devanchea Devak bhôztoleamnô, sogllim tumi Tachi stuti korat! Taka vakhannat, Taka dhin'vasat, kiteak Tacho maiêmôg togta sasnna-sasnnak!
91. (24) Nebukadnezzar Raza soglloch thottaklo ani sottkorun ubo zalo. Tannem aplea montriank mhollem: 'Ami tegam mon'xank bandun ujeant uddounk nasle?' Tãnnim razak portipall kelo: 'Khorem, Mharaza!'
92. (25) Tannem fuddem mhollem: 'Punn mhaka choug zann distat: te ujea modem meklle bhonvtat ani tankam koslench vaitt zaina! Ani chovtho mhollear êk devancho put koso dista.'
93. (26) Zolltea ujeachea khornachea tondda-xim ieun Nebukadnezzaran mhollem: 'Shadrak, Meshak ani Abednego, Bhov Vortea Devachea chakramnô, bhair sorat, hanga ieiat!' Tedna ujea modlebhair sorun Shadrak, Meshak ani Abednego aile.
94. (27) Soglle sordar, nitidar, razpal ani razache montri zoma zale; tea tegam mon'xank te polleit ravle: tanchê kuddink uzo mat-punn lagunk naslo; tanchê toklecho êk kens porian lasunk naslo; tanchim vostram ulponk naslim; tanchê bhonvtim laslolea kiteachoch vas mat-punn ie naslo.
95. (28) Nebukadnezzar razan mhollem: 'Shadrak, Meshak ani Abednego hanchea Devachi stuti korat! Kiteak Tannem Aplea dutak pattoilo ani Aplea chakrank nivarle, karonn tãnnim Tacher visvas tthevun razachea hukumachi porva keli na, ani, aplea Deva bhair dusrea khoincheach devachi chakri ani bhozônn korchê poros, apleôch kuddi hogddaunk dileô.
96. (29) Dekhun hanv oso hukum' ghaltam: "Porzamnô, raxttramnô, ani veg-vegllea bhasanchea lokamnô! Tumchê modlim konn-ui Shadrak, Meshak ani Abednego hanchea Devachem bemanan uloitit zalear, hanv tanche sandean'-sande tôddun uddoitolom, ani tanchea ghoranchi fatranchi ras kortolom, kiteak hê toren Aplea bhoktank nivartolo anink dêv na!" '
97. (30) Uprant razan Shadrakak, Meshakak ani Abednegok Babiloniechea prantant unch panvddear choddoile.
98. (31) Ak'khea sonvsarant jietolea somest porzank, sogllea raxttrank ani sorv bhasanchea lokank Nebukadnezzar raza noman korta. Tumchi xanti nondun vochum!
99. (32) Jim ochoriam ani vismitam Bhov Xrêxtt Devan mhojê sovem keleant, tim tumkam porgôttunk mhaka khuxalkai bhògta.
100. (33) Kitlim vortim Tachim vismitam, kitlim bollixtt Tachim ochoriam! Tachem raj sasnnachem raj, Tachi razvôttki sasnnachea-sasnnak togta!
