1. Mhaka adar diunk ani mozbut korunk hanv tacher patietam.
2. Ani atam hea vostum vixim sot tem hanv tuka sangtam. 'Tin nove raza Persient utthtole; êk choutho raza ietolo ani sogllea heram poros girest zatolo, ani jedna to aplê girestkaiek lagun podvedar zatolo, tedna sogllea her Grik rajeancher to zhuz manddtolo.
3. Êk bollixtt raza utthtolo ani eka vhodd raxttracher razvôtt choloitolo ani apnnak zai tem kortolo.
4. Punn ekdam tannem podvi hatant ghetli mhonnttôch, tachea raxttrache kuddke zatole ani mollbachea char-ui vareank tanche vantte poddtole, punn tachê sonstik te vantte mellche nant: tannem raj choloil'lem tê bhaxen te tem cholounche nant, kiteak tachi razpodvi pallam soit umttun kaddtole ani ti dusreanchea tabeant poddtoli, punn tachê sonstichea hatant nhoi.
5. Dokhinnecho raza podvedar zatolo, punn tacho êk razkunvôr odik podvedar zatolo. To aplea raxttra-vôn ek odik vhodd raxttr sthaptolo.
6. Kãi vorsam uprant, te êk korar kortole ani korar thiraunchê khatir dokhinnechea razachi dhuv ut'torichea raza-xim vetoli. Punn thoim tachê dhuvechi xokti togchi na, nhoi mhonn tachi sonsôt-ui togchi na. Hi dhuv, ticho porivar, ticho put ani ticho ghôv, him sogllim poradhin zato-lim. Tea kallar,
7. tichea bapaichê svater, tichea pallantli êk talli bhair sortoli. Hi talli ut'torichea razachê foujecher ani addosacher akromonn kortoli, tachea kottant rigtoli ani taka haroitoli.
8. Ti, mhonngê to novo raza, tanche soglle dev, tancheô murti, tanchim moladik bhangarachim ani rupeachim aidonam lutticho mhal koso Ejiptant vhortolo. Magir to thoddim vorsam ut'torichea razacher akromonn korcho na.
9. Punn ut'torecho raza dokhinnechea razachea rajeacher dhadd ghaltolo ani magir aplea khaxa desant portotolo.
10. Uprant tache put êk vhoddli ani bollixtt fouz ektthaim korun akromonn kortole; tantlo eklo fuddem sortolo, zhuz manddtolo, ani veddho ghalun novean dokhinnechea kottacher akromonn kortolo.
11. Tedna dokhinnecho raza, ragan bhoron, ut'torichea razacher zhuz manddtolo. Ut'torecho raza hixôb nasloli fouz toiar kortolo, punn tachi fouz dokhinnechea razachea hatant harovtoli;
12. foujecho nas zatolo. Zoitivont zala mhonnun gorvan bhoron, to hozaramnim lokak sokla uddoitolo, punn tachem boll chôdd kall togchem na.
13. Ut'torecho raza adlê-vôn vhôdd fouz ektthaim korun portun ietolo, ani thoddea vorsam uprant, to dusrê pavtti adlê-vôn bollixtt fouz ani gorjechea mhalachi purvonn zoma korun aniêk pavtt akromonn korunk fuddem sortolo.
14. Tea kallar, dokhinnechea razacher zhuz korunk zaite zann uprastole. Aplem sopon khorem korchê axen, khaxa tujea loka modle odik zobordost te kolpotole; punn te harovtole.
15. Tedna ut'torecho raza choddun ietolo ani kottamnim ghôtt kell'em xar jikhun gheunk matiechim durgam ubartolo. Dokhinnecheô fouzô xar rakhunk xokcheô nant.
16. Dhadd ghalpi apnnak zai toxem kortolo, konnachean taka addauk zaunchem na. Oxem to Mhoimechea Desant rigun ravtolo ani tachem nisontton korunk taka podvi astoli.
17. Hachê uprant, tachem ak'khhem raj to jikhun gheunk lagtolo, punn uprant dokhinnechea raza kodde to êk korar kortolo ani, tachem raj khala uddounk, tachê lagim aplê dhuvechem logn korun ghetolo; punn hi tachi ievzônn xarthi pavchi na ani hantum taka kosloch faido zauncho na.
18. Tea uprant to doriakinariancher ani zunveancher aple dolle laitolo ani tantlim zaitim apnnak jikhun ghetolo, punn êk senapoti tachi zobordosti sompoitolo, ani tachi soglli zobordosti takach bhogo-xi kortolo.
19. Magir to apleach desachea kottancher nodor ghaltolo, punn thoim adllun khala poddtolo ani portun dixtti porian poddcho na.
20. Tachê svater êk oslo monis utortolo ki zobordosten dôndd gheunk konna-ekleak Mhoimechea Desantlean dhaddtolo; punn thoddea disam bhitôr tacho sotianas zatolo; ho sotianas sobhêmazar nhoi mhonn zhuzant-ui zauncho na.
21. Tachea zagear êk konixtt monis voir choddtolo; taka razacho man mellcho na, punn apnnak zai te upai gheun to apnnak razacho man jikhun ghetolo ani naddun raj zôddtolo.
22. To fouzanchem nibel nisontton kortolo ani tancho nas kortolo, korarachea Kunvracho-i to bhosm kortolo.
23. Aplea koblatam udexim to addgam-naddgam kortolo ani, tache pattlavdar thodde zaun-ui, to odik-odik mozbut zatolo.
24. Apnnak zai toxem, girest prantancher to dhadd ghaltolo, tachea purvozamnim porian korunk na titlem to vaitt kortolo; to tankam lutticho mhal ani dhon-girestkai vantt'tolo, ani thoddo kall tanchea kottam virudh naddbudhi manddtolo.
25. Tea uprant, êk vhôdd fouz gheun, sogllê aplê xoktin ani kalljidarponnan to dokhinnechea razacher add zhuz manddtolo. Dokhinnecho raza êk vhôdd ani bollixtt fouz gheun taka fuddo korunk zhuzak vetolo; punn tacher manddlolea naddbudhim khatir to iesvont zauncho na.
26. Tachê borabôr êkê boxent jevtale tech tachem ghorttann kortole; tachi fouz ximpoddtoli; ani puskoll soinik zhuzant morun poddtole.
27. He dog-ui raza, ekach mezar bostole, ani, dog-ui zann vaittuch monant ievzun, eklo dusreak fotti sangtolo: punn konnachêch ievzonnek ies mellchem na, kiteak tharail'lo vêll ozun pavlo na.
28. Tedna to konixtt raza odik girest zaun aplea desant portotolo, punn tachem kalliz povitr korara add astolem; to apnnak zai toxem kortolo ani aplea khaxa desant portotolo.
29. Nemlolea vellar to novean dokhinnechea desacher akromonn kortolo, punn hê pavtti tacho porinnam' poilê pavtti poros vegllo zatolo.
30. Kiteak mhollear, Kit'tinchim tarvam tachê add vetolim, ani taka haroitolim. To porot vetolo ani povitr koraracher add koddok panvlam martolo, ani adlê bhaxen, jim konn povitr korar sôddun ditat, tankam to mozôt ditolo.
31. Tachi fouz ietoli ani kottbondi kel'lem Devmondir oxud'dh korun sôddtoli. Disa-dispottim sodam bhettouncho iôdn ti thamboitoli ani sotianasacho kanttallo thoim bosoitoli.
32. Jim konn korar môddtat, tankam fuslaun to bhul ghaltolo; punn zo lôk aplea Devak vollkhota, to aplea bhavartant thir-ghôtt ravtolo ani tachê add zhuztolo.
33. Je loka modem zannvaieche fuddari asat, te zaitea zonnank sarki xikovnn ditole; punn thoddokall te tolvarin poddtole ani uzo, pordês ani lutt tankam bhògchem poddtolem.
34. Jedna te khala poddtole, tedna kãi-kãi zonnancho tankam adar melltolo. Punn bhov thoddo; punn tanche zaite pattlavdar khorea monan tanchea bhaga asche nant.
35. Zannvaiechea fuddariam modle porian kãi zann poddtole, ani oxem tantle zaite zann xud'dh, nirmoll, nitoll zatole - Xevottacho kall ie porian, kiteak mhollear nemlolo kall ozun ieuncho asa.
36. Raza apnnak borem dista toxem kortolo. To odik-odik gorvan bhòrtolo ani apunn sogllea devam poros vhôdd mhonn somzotolo. Sangum nozo toslim nindechim utram to devanchea Devacher add uloitolo. Devachea krodhachem map bhoron oto-sôr to iesvont zatolo, kiteak jem kitem tharail'lem asa, tem ghòddtolench.
37. To aplea purvozanchea devanchi porva korcho na, nhoi mhonn bailô môg kortat tea-i devachi porva to korcho na. Khorem mhollear, to khoincheach devachi porva korcho na, kiteak apunn tea soglleam-vôn vhôdd mhonn to apnnakuch lêkhtolo.
38. To hea devanchê svater kil'leanchea devachi puza kortolo ani tache purvoz vollkhonasle tea devak bhangar, rupem, rotnam-mannkam toxench unch molachim danam vopun man ditolo.
39. Eka porkea devachê porjechea adaran to kil'leanchi rakhônn kortolo. Zankam to aple mhonn vollkhun gheta, tankam to vhôdd manan lêkhtolo; zaitea zannancher tankam odhikar ditolo; ani tankam mozuri koxi desache vantte korun ditolo.
40. Xevottacho kall pavtôch, dokhinnecho raza tachê kodde sovostkai korunk sôdtolo. Punn ut'torecho raza roth, ghoddesvar, ani zhuzachim khub tarvam gheun eka tufana vori tacher poddtolo. To sobar desancher dhadd ghaltolo, tankam jikhun ghetolo ani fuddem vetolo.
41. Mhoimechea Desacher-ui to dhadd ghaltolo, ani zaite dês tachea tabeant poddtole. Punn Edom', Moab ani Am'monachea lokantlim urleant tim, tachea tabeantlim sutt'tolim.
42. Anink-ui dês jikhun gheunk to fuddem vetolo; Ejipt porian suttcho na.
43. Tachea hatant poddtolim Ejiptachim bhangarachim ani rupeachim bhanddaram ani tacho sogllo molacho mhal. Libia ani Ethiopia tachê adhin poddtoleô.
44. Tori udenti ani ut'torê thaun pavtoli ti khobor tacher bhirant haddtoli; hea pasot, ragan bhoron, zaitea zannanchem nisontton ani sotianas korunk to vattek lagtolo.
45. Xekim, aplea raiall tthikannache tombu to doriam ani povitr Mhoimechea porvota modem tanntolo. Tori tedna to aplea xevottak pavtolo, ani taka adar diunk konnuch ascho na.'
