1. Jedna Astiages Raza aplea purvozank ektthovlo, tedna tachea xinvasonar boslo Persiecho Sirus.
2. Daniel razachea lagxilea ixttam modem aslo, ani ho taka aplea heram ixttam poros odik man ditalo.
3. Babilonient Bel nanvacho êk kuddo dêv aslo. Taka dôr disa puxtt gonvache charxim litr, challis menddram ani soreache don'xim litter bhettoitale.
4. Sirus Raza hea devak man'talo ani dôr disa taka bhôzunk vetalo. Punn Daniel aplea Devak bhôztalo.
5. Razan Danielak vicharlem: 'Tum kiteak mhonn Bel Devak bhôznaim?' Danielan zobab dilo: 'Mon'xanchea hatamnim kel'lea devank hanv bhôzna. Zannem sôrg ani sonvsar rochleat ani Zo sogllea jivea rochnnan-cho Dhoni, tea jivea Devak hanv bhôztam.'
6. Razan mhollem: 'Toxem zalear, Bel êk jivo dêv mhonn manun ghenaim tum? To dôr disa kitlem jevta-khata ani pieta tem tum pollenaim?'
7. Daniel hanslo. Tannem mhollem: 'Mharaza, fottovom naka: to bhitorlean fokot mati, ani bhailean pitull, ani tannem kednanch kãich khaunk na ani pieunk-ui na.'
8. Hea zobaban raza ragabhorit zalo. Tannem aplea bhottank apoile. Tankam tannem mhollem: 'Hem sogllem jevonn konn khata tem mhaka sangat, na zalear tumi mortoleat. Bel khoreaninch tem khata mhonn mhaka khatri diat, ani tedna hanv Danielak jivexim martolom kiteak tannem tachi ninda kelea.'
9. Danielan mhollem: 'Tum sangtai toxench zaum-di.'
10. Sot'tôr bhott asle, ani tea bhair tancheô bailô ani bhurgim. Danielak gheun raza Belachea devllant gelo.
11. Belachea bhottamnim taka mhollem: 'Ami atam bhair sortanv, ani tum Mharaza, taka jevonn vadd ani soro misôll kôr ani sogllem manddun tachê mukhar ghal. Magir, tuzo khaxa xik'ko marun dar bond kôr. Sokallim tum portun ietoloi tedna, Belan sogllem khaun sompoilem mhonn tum dekhnam zaxi tôr, amkam soglleank tum jivexim marunk lai; na tôr, tea boglantti Danielacho jiv kaddunk lai!'
12. Tankam kosloch husko naslo kiteak tãnnim meza pondchean ek gupit dar toiar kel'lem; tea darantlean te sodam bhitôr sortale ani bhettoil'lim sogllim danam ubarun vhortale.
13. Te bhott gelea uprant ani razan Belak jevonn manddlea uprant,
14. Danielan aplea chakrank gobôr haddunk lailo ani to devllachê ak'kê zomnicher ximpddaunk lailo; hacho govai mhollear ekloch raza aslo. Magir te devllantle bhair sorle, ani dar bond korun ani tacher razacho xik'ko marun te gele.
15. Tê rati, sodanchê bhaxen, bhott aile aplea bailam ani bhurgeam sangatim; tânnim sogllem khaun-pieun sompoilem.
16. Dusrea disa bhov sokallim raza utthlo, ani tachê borabôr Daniel.
17. Razan mhollem: 'Daniel, tea xik'keank konnem hat lavunk na mum?'
18. Tannem zobab dilo: 'Konnench na, Mharaza.' Tedna razan dar ugôddlem ani, rokddech mezar dolle ghalun, to udgarlo: 'Ô Bel deva, bhov vorto tum! Tum konnak fottoinaim!'
19. Punn Daniel aplê vatten hanslo; ani razak anink fuddem vochunk dinastana, tannem mhollem: 'Zomnicher nodor mar ani konnanchim him panvlam polle!'
20. Razan mhollem: 'Hanv polletam tim dadleanchim, bailanchim ani bhurgeanchim panvlam.'
21. Ani ragabhorit zaun, tannem bhottank, tanchea bailam ani bhurgeam borabôr, dhôrunk laile. Tedna tãnnim mezar astalem tem sogllem khaun kaddunk apunn bhitôr sorun ietalim tem gupit dar razak dakhoilem.
22. Razan tancho jiv kaddunk lailo ani Bel devak Danielachea hatant dilo; Danielan Bel devachê murticho ani tachea devllacho bhosm kelo.
23. Êk vhoddlo ar aslo ani Babiloniekaram taka-i bhôztalim.
24. Razan Danielak mhollem: 'Ho-i pitullcho mhonn mhaka sangtoloi kitem? Polle, to jivo asa; to khata pieta; ho êk jivo dêv mhonn tunvem mhonnunkuch zai; tôr bhôz taka.'
25. Danielan zobab dilo: 'Hanv fokot Sorvespora mhojea Devak bhôztam; To ekloch jivo Dev. Ani tum mhaka rojia dixi tôr, Mharaza, torvar vô danddo vaprinastana hea aracho hanv jiv kaddtolom.'
26. Razan portipall kelo: 'Tuka rojia ditam.'
27. Tedna Danielan thoddo damôr, thoddi chorob ani thodde kens gheun tim borabôr xizoun kaddlim, hê misollnneche gulle kele ani te arak khaunk dile; aran te gill'le toxe, far zaun to futtlo. Danielan mhollem: 'Atam gomlem mum kosli vôst ti, tumi Babiloniekaram bhôztat ti?!'
28. Hi khobor aikun Babiloniekaram ekdom' raga-bhorit zalim ani razacher kolpolim. Tãnnim mhollem: 'Raza atam Judêv zalo. Tannem poilo Belacho bhosm korunk dilo ani bhottank jivexim marle; ani atam tannem aracho-i jiv kaddunk dilo.'
29. Mhonnttôch raza-xim vochun tãnnim mhollem: 'Tea Danielak amchê adhin kôr, na tôr ami tuzo ani tujea ghoranneacho jiv kaddtoleanv.'
30. Tãnnim razak itlem boll kelem ki tannem Danielak tanchê adhin korchoch poddlo.
31. Tãnnim Danielak xinvanchê khonddint uddoilo. Thoim to sô dis urlo.
32. Tê khonddint sat xinv asle; tankam dôr disa don mon'xancheô kuddi ani don menddram ditale. Punn xinvamnim Danielak khaunchoch mhonnun, hea sô disamnim tankam dusrem kãich dilem na.
33. Tea disamnim Habakuk provadi Judeiant aslo: to thoddem mas randtalo ani eka panttuleant bhakri môddun ghaltalo. Tem gheun lunvpiank vhorun diunk to xetant vochunk toiar zatalo.
34. Ovchit Sorvesporacho dut tachê kodde uloilo: 'Tum vhortai tem jevonn Babiloniek vhor ani xinvanchê khonddint aslolea Danielak di.'
35. Habakuk provadian oso zobab dilo: 'Saiba, hanvem Babilonia polleunk porian na ani hê khonddichi mhaka kãich khobor na.'
36. Sorvesporachea dutan tachi tokli aplea hatamnim ghetli ani tachea kensank dhôrun aplea svasachea nettan taka Babiloniek pavoilo. Thoim tannem Habakukak khonddichea kanttar dovorlo.
37. Habakukan bob marli: 'Daniel, Daniel, Devan tuka dhaddlam tem jevonn ghe.'
38. Danielan mhollem: 'Deva mhojea,Tunvem mhozo ugddas keloi, ani Tuzo môg kortat tankam Tunvem sanddunk naim.'
39. Daniel utthlo ani jevlo. Sorvesporachea dutan eka khinna bhitôr Habakukak portun tachea khaxa desant vhorun dovorlo.
40. Satvea disa, raza Daniela pasot vilap korunk ailo. Khonddi-xim pavtôch tannem bhitôr nodor marli. Daniel thoim bosun aslo.
41. Raza udgarlo: 'Sorvespora, Danielachea Deva, Tum kitlo mhonn vorto! Tujê bhair anink dêv na!'
42. Tannem Danielak khonddintlo soddounk lailo ani Danielacho nas korun sôdtale tankam khonddint uddounk laile. Tachea dolleam mukhar xinvamnim tankam eka khinna bhitôr girasle.
