1. Hanv, Nebukadnezzar raza, mhojea nivasant sust jietalom, mhojea razvaddeant khuxal aslom.
2. Mhaka ek sopon poddlem ani tea sopnan mhojer vhôdd bhirant aili. Hanv khattir poddlolo astana hanv boroch akantlom: mhojê toklentlean je dixttave hanvem pollele, tãnnim mhaka kampero haddlo.
3. Dekhun hea sopnacho ôrth mhaka sangunk Babilonieche soglle ponddit ektthaim zaunche mhonn hanvem êk hukum' bhair kaddlo.
4. Jadukar, ghaddi, Kaldeikar ani bhut-kaddpi aile, ani hanvem mhojem sopon tankam sanglem, punn tachi somzonni mhaka diunk tanchê lagim ghoddona zalem.
5. Tea uprant Daniel mhojea fuddeant ailo: taka hanvem Belteshazar mhonn mhojea devachem nanv dil'lem ani tacher povitr devancho atmo aslo. Hanvem taka mhojem sopon sanglem.
6. "Hanvem mhollem: 'Belteshazar, mha-jadukara, povitr devancho atmo tujer vosti korun asa mhonn hanv zannom ani kosloch gutt tuka avghôdd nhoi. He mhojea sopnant hanvem pollele te dixttav: tancho ôrth mhaka sang:
7. "Khattier poddlolo astana, hanvem ho drixttav dekhlo: prithvechea mazak hanvem êk rukh dekhlo; to bhov unch aslo.
8. Rukh itlo vaddot gelo ani mozbut zalo, ki tachi tenkxi mollbak tenkli ani prithvechea ximam thaun porian to dixtti poddtalo.
9. Bhov sobit aslim tachim panam ani bhorpur tachim follam; tacher soglleank pavo-xem jevonn aslem. Savzank tachi savlli melltali, mollba velim suknnim tachea khandeamnim asro ghetalim, sogllea pranniank tacher jevonn melltalem.
10. "Hanv khattir poddlolo astana mhojê toklentlean vetale te drixttav hanvem pollele:
11. Tedna êk Rakhonndar, konn-êk devdut, sorgar thaun denvtalo to dixtti poddlo. Vhoddlea tallean to oso aroddlo: 'Rukh katrun uddoi, tache khande kapun kadd, tachim panam kaddun uddoi, tachim follam bhair xevttun mar; zonavoram tachê savllê thaun koddsorun vochum ani toxinch tachea khandeam voilim suknnim.
12. Punn mundd pallam-mullam soit, lokhonddachea ani pitullchea pott'ttean bandun, zomnintuch sôdd. Moidanar pachvea tonna modem tem sôdd. Mollba velea dovan ho monis sarkoch bhizom, ani tonn khatolea mon'zatim bhaxen, to tonn khaum!
13. Mon'xachê motichê ani kallzachê svater mon'zatichi môt ani kalliz taka ieum ani sat vorsam porian hê gotir to urum.
14. Rakhonndaramnim marlolem formonn hem, Devdutamnim porgôttlolo nirnnoi ho! Hê porim Bhov Vorto Dev mon'xanchea rajeam voir sorvodhikar choloita mhonn soglleô jiveô rochnna zanno zaum. Apnnak zai tachea hatant To razodhikar ghalta ani mon'xam modem jim soglleam-vôn lhan asat, tankam To voir kaddta.
15. "Mhaka, Nebukadnezzar razak, poddlolem sopon hem. Atam tum, Belteshazara, tacho ôrth amkam sang, kiteak mhojea rajeantlea eka porian pondditachean tachi somzonni mhaka diunk zalina; punn tujean tem korunk zata, kiteak povitr devancho atmo tujê sovem vosti korun asa." '
16. Daniel, dusrea nanvan Belteshazar, zaito vêll ghaborlo ani gondhollak sampoddlo. Razan mhollem: 'Belteshazar, sopna khatir ani tachea orthak lagun gondhollak sampddum naka.' Belteshazaran zobab dilo: 'Mharaza, hem sopon tuzo dvês kortoleank lagum, ani tacho ôrth tujea dusmanank!
17. Tunvem êk rukh pollelo; to vaddlo ani mozbut zalo ani itlo unch, ki to mollbak pavtalo ani ak'khea sonvsarant dixtti poddtalo.
18. Rukhachim panam sundor distalim ani bhorpur tachim follam; tacher soglleank jevonn gavtalem, savzank tachê khal savlli melltali ani tachea khandeancher mollbavelim suknnim aple gontther kortalim.
19. To rukh mhollear tunch, Mharaza! Tum vaddon vhôdd ani mozbut zalai; tuji vhoddai itli zalea, ki ti mollbak pavlea ani tujem raj sonvsarachea ximam porian vistarlam.
20. Ani razan êk Rakhonndar pollela, sorgar thaun denvlolo êk Devdut; to oxem mhonnttalo: "Rukh katrun uddoi ani tacho bhosm kôr, punn mundd mullam soit thoinch zomnint dovor; lokhonddachea ani pitullchea pott'ttean taka bandun, moidanar pachvea tonna modem taka sôdd; sat vorsam tachê voir bollanddo porian, mollba velea dovan to sarkoch bhizom ani savzam sarki tachi gôt zaum."
21. Hacho ôrth oso, Maharaza; bhov Vortea Devan mhojea dhonia razacher marlolem formonn tem:
22. Mon'xam-somazantlo tuka bhair uddoitole ani savzam modem tuka jieunk poddtolem. Boilam bhaxen tum tonn khatoloi ani mollba voilea dovan tum sarkoch bhiztoloi; sat vorsam porian tuji doxa oxich urtoli. Hachê uprant, Bhov Vorto Dev mon'xanchea rajeam voir razvôttki choloita ani Apnnak zai tachea hatant razodhikar ghalta mhonn tuka gomon ietolem.
23. "Zhaddachem mundd pallam-mullam soit thoinch dovor", hea hukumacho ôrth oso: Dev sogtta-sorvam voir razvôttki choloita mhonn tuka somzon ie porian tujem raj tukach urtolem.
24. Dekhun, Mharaza, mhoji budh borê bhaxen mandun ghe: tujim patkam sôddun ani niti pormannem cholun boreô kornniô kôr, tujea khunank patt korun goribank doia dakhoi, ani hê toren lamb auk ani xantin jieunk tuka favo zaum.'
25. Nebukadnezzar razak hem sogllem ghòddlem.
26. Bara mhoineam uprant, Babilonientlea razvaddeachea pattsar firtana,
27. raza oxem mhonnttalo: 'Vorixtt Babilonia! Raiall nivas zaunk, mhojê vhoddlê xoktin ani mhojê mhoimecho dobazo vaddoun khanvem ti bandun haddlea!'
28. Him utram razachea tonddantlim bhair sortanch, ontralla thaun êk tallo oso aikum ailo: 'Nebukadnezzar raza, tujê vixim oxem formonn asa: Tujem raj tujea hatantlem kaddun ghetlam.
29. Mon'xam-somazantlo tuka bhair uddoitole ani savzam modem tum jietoloi, boilam bhaxen tum tonn khatoloi, ani sat vorsam bollanddo porian hi zatoli tuji doxa. Hachê uprant, Bhov Vorto Dev mon'xanchea rajea voir razodhikar choloita ani Apnnak zai tanchea hatant hem raj ghalta mhonn tuka gomon ietolem.'
30. Ani sanglolem toxem teach farak ghòddlem. Nebukadnezzar razak mon'xam-somazantlo bhair ghalo, ani boilam bhaxen to tonn khatalo. Mollba velea dovan to sarkoch bhizlo; tache kens gonnichea pakam vori lamb-lamb vaddon gele, ani tachim nakttam suknneachea davlam sarkim zalim.
31. To kall bollanddtôch, hanvem, Nebukadnezzaran, mhoje dolle sorgak ubarle; mhojem ginean mhaka portun ailem. Bhov Vortea Devachi hanvem stuti keli. Zo sodam sorvodam jieta, Taka hanvem vakhannlo ani mhoima dili, kiteak Tachem raj sasnnachem raj,Tachi razvôttki togta pinddkechê pinddkent.
32. Prithvecher jietat titleank-ui moluch na; mollbar noketranchi fouz ani prithumer jietat tankam Apnnak borem dista tê bhaxen To manddta. Konnacheanuch Tacho hat addaun dovrunk zaina, vô "Tunvem hem kitem mhonn keleim", oxem Tachê lagim vicharunk zaina.
33. Tea vellar hanv soirannar ailom ani, mhojea rajeachea obhimana khatir, mhozo protap ani tez-ui mhaka porot ailim. Mhojea budhvontamnim ani montriamnim mhozo zoizoikar kelo; mhojem xinvason mhaka portun dilem. Mhoji adli thorai odik vaddon geli.
34. Ani atam hanv, Nebukadnezzarraza, sorginchea Razachi vakhann'nni, stuti ani mhoima gaitam, kiteak sogllim Tachim kamam sotachim, soglleô Tacheô vattô niticheô, ani gorvan choltat tankam sokla uddounk Taka podvi asa.'
