1. Babiloniecho raza Belshazar hachê razvôttkechea poilea vorsa, aplê khattir poddlolo astana Danielak ek sopon poddlem ani tannem dorxonam dekhlim. Tannem aplem sopon boroun kaddlem, ani tachem vornnon oxem:
2. Danielan mhollem: 'Rati dorxonant hanv hem polletalom: Ontralla velim char-ui varim Vhoddlea Somdirak uchamboll kortalim;
3. tea somdirantlim char vhoddlim ani vegllim-vegllim zonvoram bhair sorlim.
4. Poilem xinva bhaxen distalem, punn taka ghonniche paktte asle: hanv polleit astana tache paktte kaddle ani taka zomni velem voir ukôl'lem ani mon'xa bhaxen don pãiancher ubem kelem, ani taka mon'xachem kalliz dilem.
5. Uprant anink ek dusrem zonavor hanvem dekhlem; tem ansvela porim ek bhuz voir korun ubem ravlolem; tachea tonddant tin bori asleô. Taka oso hukum' poddlo: "Utth ani zai titlem mas kha."
6. Hachê uprant hanvem novean pollelem ani bibttea vaga bhaxen anink ek zonavor mhaka dixtti poddlem; tachea kuximnim suknneache char paktte asle; taka char tokliô asleô; ani taka odhikar dil'lo.
7. Uprant, ratchea dorxonamnim anink ek disnnem hanvem pollelem: ek chovthem zonavor hanvem dekhlem; tem bhõikor, bhesurvannem, bhirankull ani ekdom' bollixtt; taka vhoddle lokhonddache dant asle, aplea boliank chabun tem tancho pitto kortalem, ani urlolem aplea pãiam pondak maddoitalem. Heram zonavoram poros tem vegllem aslem ani taka dha xingam aslim.
8. Hanv tea xingank polletana tanchê modlem ek dhakttulem xing bhair sorta tem hanvem dekhlem; haka zago diunk poilea tegank pallam soit ôddun kaddlim; ani hea xingak mon'xa bhaxen dolle asle, ani vhôdd boddai sangpi ek tondd.
9. Hanv oxem polletam astananch aplê svater xinvasonam dovorlim ani konn-eklo Bhov Vondivont Zannto aplea asonar boslo. Tachem nhespa-avoronn hima porim dhovem; tachê tokleche kens nitôll lonvê sarke Tachem xinvason ek ujeachem agttem, ani tachim chakam zollto uzo.
10. Tachê mukhaili êk ujeachi nôd vhanvtali. Hozaranche hozar Tachi seva kortale ani dha hozar pavtti dha hozar Tachê mukhar ube asle. Tedna neaisobha bhòrli ani pustokam ugôddlim.
11. Hanv pollet ravlom: tem xing sangtalem teô boddaiô mhojea kanar sadtaleô, ani hanv pollet astana, tea zonavorak marlem ani tache kuddkean'-kuddke korun tacho bhosm zaunk taka ujeant uddoilem.
12. Heram zonavorancho odhikar kadun ghetlo, punn thoddo nemlolo kall tankam jieunk dilem.
13. Hanv ratchea disnneamnim tellun pollet ravlom, ani mollbachea kupantlean Mon'xacho Put koso konn-eklo ieta to hanvem pollelo. To Bhov Vondivont Zanntea sorxim ailo ani taka Tachê-xim vhelo.
14. Taka dilo odhikar, obhiman ani raiponn; ani Tachê sevek lagleô soglleô porza, sogllim raxtram ani sorv bhasancho lôk. Tacho razodhikar sasnnacho razodhikar, to kednanch sompcho na, ani Tachê razvôttkechem kednanch nisontton zaunchem na.
15. Hanv, Daniel, ekdom' ghaborlom ani mhojê toklentlean gholltalim tea dorxonank lagun hanv samkoch kamplom.
16. Mhonnttôch thoim asloleantlea eklea-xim hanv gelom ani hea sogllea vostum vixim hanvem tachê lagim vicharlem. Zobab diun, tannem mhaka hea vostuncho ôrth dilo:
17. "Him char vhoddlim zonavoram mhollear prithumer upzonche asat te char raza.
18. Razodhikar ghetat te Bhov Vortea Devache bhokt; ani raj sodankal tanchench zatolem, sasnnachea sasnnak.'
19. Tedna hanvem chovtea zonavora vixim vicharlem, karonn tem zonavor heram poros vegllem aslem, ekdom' bhirankull, tache dant lokhonddache ani tachim davlam pitullchim aslim, khavpak melltat titleank-ui tem khatalem, tancho pitto kortalem ani urlam tem aplea pãiam khala maddoitalem.
20. Toxench tachê tokler aslolea dha xingam vixim hanvem vicharlem; ani kiteak anink ek xing upzolem ani poilinchim tin xingam kiteak poddlim, ani hea xingak kiteak dolle asle ani boddai ulovpi tondd, ani hem xing kiteak heram poros huxar distalem - hem sogllem hanvem vicharlem.
21. Bhoktam kodde zhuz kortalem ani tanchê-vôn odik bollixtt mhonn hanvem dekhlolem tem xing hem.
22. Punn xevottak Bhov Vondivont To ailo ani Tannem Bhov Vortea Devachea bhoktam khatir nit korun dili, ani tedna bhoktamnim razodhikar aplea hatant gheuncho vêll pavlo.
23. Tannem oxem mhollem: "Chovthem zonavor mhollear prithumer upzonchem asa tem chovthem raj; hem raj sogllea heram poros vegllem zatolem. Tem ak'khi prithum' girastolem, Tika pãiam tolla maddoitolem ani ticho churo kortolem.
24. Dha xingancho ôrth oso: hea rajeantle dha raza upzotole, ani hanchê uprant anink eklo raza; ho raza adlea razam poros vegllo astolo ani tegam razank sokla uddoitolo;
25. to Bhov Vortea Devachi ninda kortolo ani Bhov Vortea Devachea bhoktank dogdaitolo. Kall ani Somurt to bodlunk sôdtolo, ani Dev Aplea bhoktank tachê adhin kortolo eka kallak, don kallank ani ordea kallak.
26. Punn neaisobha bhòrtoli tedna ti tachê koddlo razodhikar kaddtoli, ani tea razodhikaracho sotianas ani nisontton kortoli.
27. Magir Dev raj, razodhikar ani ontralla khal aslolea sogllea rajeancho dhobazo Bhov Vortea Devachea bhoktank, mhonngê Aplê porjek, ditolo. Tancho razodhikar sasnnak togpacho, ani sogllim somrajeam tanchi seva kortolim ani tankam khaltim zatolim."
28. Dorxonachem vornonn hanga sompta. 'Hanv, Daniel, mhojea monant bhov akantlolo aslom ani hanv dhovso zalom; punn heô vostu hanvem mhojeach monant dovorleô.'
