1. Belshazar razan aplea unch kulliechea mon'xank ek vhoddlem jevonn kelem; êk hozar lôk tea jevnnak aslo, ani tanchê mukhar to soro pieunk laglo.
2. Soro chaktana, Belshazarachea monant oxem ievzolem: tachea bapain, Nebukadnezzaran, Jerusaleantlea Devmondirachea gabhareantlim bhangarachim ani rupeachim patram haddlolim; tea patramnim soro ghalun, aplea sordaram, aplea potinim ani up-potinim borabôr, apunn tantlem pietolo mhonn tannem chintlem; oxem astam, Belshazaran tim patram haddunk lailim.
3. Mhonnttôch, Jerusaleantlea Devmondirachea gabhareantlim luttlolim bhangarachim patram haddlim, ani raza, tache sordar, tacheô potinim ani up-potinim tantum soro ghalun pielim.
4. Tim aplo soro pielim ani aplea bhangarachea, rupeachea, pitullchea, lokhonddachea, lankddachea ani fatrachea devank tãnnim vakhannle.
5. Ovchituch eka mon'xachea hatachim bottam dixtti poddlim ani dip-sthana pattlean razvaddeachê vonntichea chunear borounk laglim; boroitalo to hat razak dixtti poddtalo.
6. Bhirantin bhoron, raza dhovso zalo, tachem penkott ghollghollunk laglem, ani tacheô dimbiô koddkoddunk lagleô.
7. Tannem arddun parkiank, Kaldeikarank ani bhut-kaddpiank ulo marlo. Ani Babiloniechea vidvanank razan mhollem: 'Zo monis hem borovop vachit ani tacho ôrth mhaka sangit, taka hanv zambllea raiall vostran nhesoitolom, tachea golleak bhangarachi sorpolli ghaltolom, ani to mhojea rajeacho karbhar choloitolea tegantlo eklo zatolo.'
8. Razache vidvan soglle fuddeant aile, punn tanchean tem borovp vachunk, nhoi mhonn tacho ôrth razak sangunk, zalem na.
9. Soglloch thorthorun, Belshazar raza odikuch dhovso zalo, ani tache kullivont monis-ui sogllech ghaborle.
10. Razacho ani tachea kullivont mon'xancho avaz aikun, ranni jevnna-vosreant aili. Rannien mhollem: 'Mharaza, tum hozar vorsam jieum! Ghabro naka, nhoi mhonn itlo dhovso zaum naka. Povitr devancho atmo asa toslo êk monis tujea rajeant jieta.'
11. Tujea bapaichea kallar devanchê zannvaiê sarki hea mon'xak ok'kôl, ginean ani zannvai asat mhonnun, taka parkiancho, ghaddiancho, Kaldeikarancho ani bhut-kaddpiancho mukheli kel'lo.
12. Tachem nanv Daniel, ani razan taka Belteshazar mhonn nanv ghal'lem. Daniel oslê ojapanchê budhin bhòrlolo monis mhonnttôch, ani sopnnancho ôrth diunk, têch porim humannim suttavim korunk ani kotthin prosn fôddun diunk taka itli zannvai ani huxarkai asat dekhun, hea Danielak apounk dhadd; soglleacho ôrth to tuka sangtolo.'
13. Danielak Razachea fuddeant haddlo; razan Danielak vicharlem: 'Mhozo bapui raza aslo tedna, tannem Judasa thaun Judev nirvaxitam borabôr haddlolo Daniel nanvacho to tum mum?
14. Devancho atmo tujer vosta mhonn hanvem aikolam, ani tuji ok'kôl, ginean ani ojapanchi zannvai soglleank vollkum aileant mhonn mhaka khobor pavlea.
15. Hem borovop vachunk ani tachi somzonni mhaka diunk, vidvanank ani parkiank mhojê-xim haddle, punn tacho ôrth ugddapo korunk tanchê lagim ghòddlem na.
16. Sopnancho ôrth sangunk ani kotthin prosn suttave korunk tujean zata mhonn mhaka sanglam; mhonnttôch hem borovop vachun tacho ôrth mhaka sangxi zalear, hanv tuka zambllem raiall vostr nhesoitolom, tujea golleak bhangarachi sorpolli ghaltolom ani mhojea rajeacho karbhar choloitoleantlo tum eklo zatoloi.'
17. Tedna Danielan raza mukhar uloun mhollem: 'Tujim dennim tukach dovor ani tujim inamam dusreank di! Mhojean razak borovop vachunk zata ani tacho ôrth-ui fôddun diunk zata.
18. Mharaza, Bhov Vortea Devan tujea bapaik, Nebukadnezzarak, razvôttki dili, ani teach borabôr vhoddponn, kirti ani mhoima.
19. Tannem taka itlo vhôdd kelo ki soglleô porza, sogllim raxttram ani sorv bhasancho lôk bhirantin tachê mukhar kamptalim: apnnak zai tankam to jivexim martalo ani zai tankam vanchoitalo; apnnak zai tankam to voir kaddtalo ani zai tankam sokla denvoitalo.
20. Punn tachem kalliz gorvan bhòrlem ani tachem mon urmottaien ful'lem; tedna Devan taka tachea raiall xinvasona velo nikllai-lo ani tachi mhoima kaddun uddoili.
21. Mon'xam-somazantlo taka bhair ghalo, tachi môt ani kalliz mon'zatichê moti ani kallza sarkim kelim; to zonglli gaddvam borabôr jielo; boilam porim to tonn khatalo; mollba velea dovan tachi kudd sarkich bhizloli. Tedna fokot ekloch Bhov Vorto Dev mon'xam voir razvôttki choloita mhonn ani Apnnak zai tankam raj dita mhonn taka kollon ailem.
22. Punn tunvem, Belshazaran, tachea putan, hem sogllem zanna zaun-ui, tujem mon khaltem korunk naim.
23. Gorvan bhoron, tunvem Sorginchea Dhoniachi porva keli naim, Tachea Mondirantlim patram tunvem tujê mukhar haddlim-i ani tea patramnim soro ghalun tujê borabôr tuje sordar, tujeô potinim ani tujeô up-potinim tantlem pielim: jea devank nodor na, aikunk iena ani kãich somzo-i na, toslea bhangarachea ani rupeachea, pitullchea ani lokhonddachea, lankddachea ani fatranchea devank tunvem vakhannleat. Punn Zo tuzo khud prann Aplea hatamnim samballta ani Zachê svadhin tujem sogllem vaitt-borem asa, tea Devak tunvem mhoima diunk naim.
24. Heach pasot him utram boroileant to hat Tannem dhaddla.
25. Boroil'lem asa tem hem: 'Mene, Mene, Tekel ani Parsin.'
26. Hea utrancho ôrth oso: Mene mhonngê Devan tujê razvôttkeche dis mêzleat ani ti xevottak pavoilea.
27. Tekel mhonngê tuka tagddent ghalun zôkla ani tujem vozon komi poddlem.
28. Parsin mhonngê tujem raj doxim korun Midiani ani Parsi lokank dilam.'
29. Belshazar razachea hukuma pormannem Danielak raiall zambllea vostramnim nhesoilo, tachea golleak êk bhangarachi sorpolli ghali ani rajeacho karbhar choloitolea tegam zannantlo taka eklo kela mhonn porgôtt kelem.
30. Têch rati, Belshazarak, Kaldeikaranchea razak, jivexim marlo,
