1. Persiecho raza Sirus hachê razvôttkechea tisrea vorsa, Danielak (taka dusrem nanv Belteshazar aslem) ek utor porgôtt zalem. Hem utor khorem: tem eka vhodda zhuza vixim. Danielak hea utracho ôrth mell'lo; hea porgôttlolea utrachi eka dorxonant taka somzonni mell'li.
2. Tea disamnim, hanv, Daniel, tin ak'kim satollim prachit korit aslom.
3. Him tin satollim sompo porian, hanvem koslench ruchik jevonn gheunk na, na mhonn masak vôsoreak jib laili na, nhoi mhonn mhaka telan makhlo na.
4. Poilea mhoineachê chovisavê tarker, Tigris hê vhoddlê nhõichê deger hanv ubo aslo tedna,
5. mhoje sobhonvtim polleunk, hanvem mhoje dolle ubarle ani hanvem pollelem tem hem: Sonni-sutachea lugttan nheslolo êk monis aslo, tachea penkttak nibel bhangaracho êk pott'tto aslo;
6. tachi kudd beril rotna bhaxen, tachem tondd zhoglavnnea porim, tache dolle zolltea divttiam sarke, tachea bavlleank ani tonddak chokchokit pitullchi koloi kaddloli asli, tachea talleacho avaz urponjichi bob koxi.
7. Hanvem, Danielan, ekleanuch hem dorxon pollelem; mhojea sangata aslolea mon'xamnim hem dorxon polleunk na. Punn te itle kampunk lagle ki te pollun lipunk gele.
8. Oxem hanv ekloch urlom. Hea xrêxtt dorxonacher dolle ghalun soglli mhoji xokti uddun geli, mhojem tondd bodlon kurup zalem; mhojem boll sogllem virgolem.
9. Hanvem uloitolea eka talleacho avaz aikolo, ani tea talleachea avazan ghunvôll ieun hanv poddlom, mhojem tondd zomnik tenklem.
10. Konnem mhaka hat lailo ani mhojeô dimbiô ani mhoje hat koddkoddunk lagle.
11. Tannem mhaka mhollem: 'Daniel, tum Devachê chôdd opurbaiecho monis; hanv tuka sangunk vetam tim utram chit diun aik; ubo rav; mhaka atam tujê-xim dhaddla.' Jedna tannem him utram mhaka mhonnlim, tedna hanv kampot-kampot ubo ravlom,
12. Tannem mhaka mhollem: 'Daniel, bhieum naka: dorxonacho ôrth somzunk upas-tapas korun tukach Sorvespora mukhar khalto korunk tunvem nichêv ghetloi tea disa thaun Sorvesporan tujea prarthonachim utram aikolim; tujea magnneak lagun hanv hangasôr ailam.
13. Persiechea rajeachea razkunvran ekvis dis porian mhojer virôdh kelo; punn Mikael, mukhel kunvrantlo eklo, mhojea adarak ailo. Persiechea razak fuddo korunk hanvem taka thoim dovorla,
14. ani nimannea disamnim tujê porjek kitem ghòddtolem tem hanv tuka sangunk ailam. Karonn tea disam vixim ek novem dorxon asa.'
15. Tannem mhaka him utram mhollim tedna, ek utor porian mhonnonastana, hanv zomnicher saxttangim poddlom.
16. Tedna mon'xa sarko distolea konn-eklean mhojea onttank hat lailo. Tedna tondd ugddun mhojean ulounk zalem; ani mhojea fuddeant ubo aslolea mon'xak hanvem mhollem:' Mhojea somia, hem dorxon polleun hanv ekdom' khontibhorit zalam, mhojem boll gollgoll'lam.
17. Mhojea somia lagim ulounk tujea sevokak konn bhaxen tankot? Mhaka atam anink boll urunk na ani svas porian mhojean gheunk zaina.'
18. Anink êk pavtt mon'xa sarkea konn-eklean mhaka hat lailo; tannem mhaka ghottai dili.
19. Tannem mhollem: 'Bhieum naka.Tum Devachê chôdd opurbaiecho monis; xanti tujê sovem asum; kalljidar za, ghôtt rav!' Ani to mhojê lagim uloita astana, novean mhaka boll ailem ani hanvem mhollem: 'Mhojea somia, uloi atam, tunvem mhaka ghottai dileai.'
20. (20a) (21a) Magir tannem mhollem: 'Hanv tujê-xim kiteak ailam tem tum zannoi? Sotachea Pustokar boroil'lem asa tem tuka sangunk.(20b) Persiechea razkunvracher add zhuzunk mhaka vochunk zai; tacher hanvem zoit vhortôch, Gresiecho razkunvôr ietolo.
21. (21b) Hea soglleant mhaka adar diunk konnuch na bogor Mikael, tuzo Razkunvôr.
