1. To vêll pavtôch, Mikael, vorto Kunvôr ani tujê porjecho Rakhnno, utthtolo. To vhoddam sonkoxttancho kall zatolo, raxttram utpon zalim tedna thaun kednanch ieunk na toslo. To kall pavtôch, tuji khaxa porza vanchtoli, mhonngê zanchim nanvam Pustokar boroil'lim asat tim sogllim.
2. Dhul'lichea Desant nhidlolim asat tanchê modlim zaitim zannam utthtolim, konn-konn sasnnik jivitak, ani konn-konn loz ani sasnnak togta toslem nirbhag bhôgunk.
3. Xannim tim mollbachea porzolla porim jhigjhigtolim, ani zannim zaiteank promannikponnachi vatt xikoilea, tim noketram porim jhigjhikit zatolim sasnnachea sasnnak.
4. Punn tum, Daniel, him utram gupit dovor, ani Xevottacho kall pavo-sôr hem pustok xik'ko marun dhampun dovor. Zaitim zannam hêvtten-têvtten firtolim, ani khotteponn ozun vaddot vetolem.'
5. Tedna hanvem, Danielan, dolle ubarle ani anink dogam zannank ube aslole hanvem dekhle, eklo nodichê ailê deger ani dusro pelê deger.
6. Tantlea eklean sonni nhesônn ghalun nodichê pelê deger asloleak mhollem: 'Him sogllim ojapam ghoddo porian anink kitlo vêll bollanddtolo?'
7. Sonni nhesônn ghalun nodichê pelê deger aslolean aplo uzvo tosoch davo hat sorga vatten ubarlo ani sasnnak jieta Tachea nanvan oso soput ghetlo: 'Êk kall, ani don kall, ani ordo kall; jedna povitr porjechê podvechi cholta ti mostonni somptoli, tedna heô soglleô vostu ghoddon ietoleô.'
8. Hanvem aikolem, punn hanv kãich somzunk na. Tedna hanvem mhollem: 'Mhojea somia, konn zatolo hea sogttacho porinnam'?'
9. Tannem mhollem: 'Daniel, voch tum atam. Xevottacho kall pavo porian him utram gupit urunk zai ani xik'ko marun dhampun dovrunk zai.
10. Zaitim zannam apnnanchi nitollkai, nirmollai ani xud'dhi zoddunk vavurtolim; noxttim mon'xam noxtteponn korit ravtolim, ani noxtteank hem kednanch somzochem na; xannim tim somzotolim.
11. Disa-dispottim sodam bhettouncho iôdn kaddun uddoitole ani sotianasacho kanttallo ubarun dovortole tê ghoddiê thaun: êk hozar don'xim novod dis.
12. Jim konn êk hozar tin'xim postis dis boro-sôr thir ravtat, tim khorench bhagi!
13. Punn tum voch atam ani xevôtt pavo-sôr visôv ghe; tujem inam' gheunk kallachea xevottak tum utthtoloi.'
