1. Tachê razvôttkechea dusrea vorsa, Nebukadnezzar razak zaitim sopnam poddlim. Haka lagun to gondhollak sampoddlo ani tachi nhid khollun geli.
2. Aplea sopnancho ôrth sangunk razan noxib-parkiank ani jadukarank, ghaddiank ani Kaldeikarank apoun haddle. Te aile ani raza mukhar ube ravle.
3. Razan tankam mhollem: 'Mhaka ek sopon poddlam, ani tem somzo porian mhojea monak thar na.'
4. Kaldeikaramnim razak oso zobab dilo: 'Xrêxtt Raza, hozar vorsam tum jieum. Tujea chakrank tem sopon sang, ani tacho ôrth ami tuka fôddun ditoleanv.'
5. Razan Kaldeikarank mhollem: 'Hanvem oso thir tharav ghetla: mhojem sopon kitem tem parkunk addunk ani tacho ôrth mhaka fôddun sangunk tumchean zaina zait tôr, hanv tumchea kuddinche sandean'-sande toddun uddoitolom ani tumchea ghoranchem nisontton kortolom.
6. Punn, dusrê vatten, mhojem sopon konn tem parkun kaddunk ani tacho ôrth mhaka fôddun sangunk tumchean zait tôr, hanv tumkam dennim, inamam ani vhôdd man ditolom. Mhonnttôch mhojem sopon konn tem parkun kaddat ani tacho ôrth mhaka sangat.'
7. Dusrê pavtti tãnnim razak mhollem: 'Xrêxtt Raza, tunvem tujem sopon tujea chakrank sangchem ani ami tacho ôrth tuka foddun sangtoleanv.'
8. Razan zobab dilo: 'Tumi fokot vêll kaddunk sôdtat mhonn mhaka xidh'd zalem, kiteak koslo tharav hanvem ghetla to tumi zannot.
9. Tumi mhojea sopnacho ôrth mhaka sangina zaxat tôr, tumcher soglleancher ekuch formonn poddtolem. Mhaka fottoitat toslim vankddim-tikddim uloupam korun, vêll kaddpacho tumchê bhitôr ho bhed tumi kela. Tôr vegim mhojem sopon konn tem parkun sangat, ani tedna tacho ôrth tumchean sangunk zata ki na tem mhaka gomtolem.'
10. Kaldeikaramnim razak oso zobabdilo: 'Hea sonvsarant konnacheanuch razacho prosn suttavo korunk zaunchem na ani, tea bhair, oslo prosn khoincheach parkiak, jadukarak vô Kaldeikarak ghalunk khoincheach razak, razpalak vô fuddariak monant ieunchem na.
11. Xrêxtt Raza, tum kortai to prosn itlo avghôdd ki konnuch tuka zobab diunk xokona bogor dèv, punn dèv mon'xam modem ravonant.'
12. Hem aikon razacho rag pettlo ani Babiloniechea sogllea vidvanancher tannem mornnachem formonn marlem.
13. Sogllea vidvanank mornnachem formonn marun hukum' bhair sortôch, Danielak-ui ani tachea sangatiank jivexim marunk tankam sôdunk lagle.
14. Mornnachem formonn poddloleancho jiv kaddpak razacho mukhêl odhikari aslo Ariok. Tôr Ariok Babiloniechea vidvanancho jiv kaddpachê vatter astanach, Daniel taka mellunk gelo. Ariok Babiloniechea vidvanancho jiv kaddpachê vatter aslo. Chotur ani xittuk utramnim Daniel tachê lagim uloilo.
15. Hea raiall odhikariak, Ariokak, tannem mhollem: 'Razan kiteak mhonn oslem koddok formonn marlam?' Tedna Ariokan Danielak soglli gozal sangli
16. ani Daniel razvaddeant kaddun gelo; tem mornnachem formonn lagu korpachem fattim dovor ani sopnacho ôrth razak diunk apnnak sondi di mhonn tannem razak vinonti keli.
17. Magir Daniel ghora gelo, ani Hanania, Mishael ani Azaria hea aplea ixttank kitem ghòddlam tem tannem kolloilem.
18. Babiloniechea vidvanank ghòddlam toxem Daniel-ui ani tache ixtt mornnachea formonnak sampoddna zaunk, tanchi doia korchi ani tea gupit guttacho orth tankam ukto korcho oxem Sorginchea Deva lagim magat mhonn Danielan tankam poratlem.
19. Têch rati eka dorxonant Devan Danielak ho gutt ukto kelo ani Danielan Sorginchea Devak vakhannlo.
20. Danielan oxem mhollem: 'Devachea Nanvak sasnnachea sasnnak vakhann'nni, kiteak To ekloch sogllem zanno ani sogllem korunk xokta!
21. Kall ani rutu Toch choloita. Razank sodrer bosoita ani sodrê voile nikllaita to Toch. Zannarank budhvontkai ani viveki mon'xank ginean dita to Toch.
22. Khôl-khôl liploleô vostu ani gutt Toch ugddapim korta; Kallokhant liplolem asa tem sogllem To boro zanno; ani To Apunnuch uzvaddant asa.
23. Tuka, mhojea purvozanchea Deva, hanv dhin'vastam ani vakhanntam, kiteak Tunvem mhaka zannvai dilii, xokti-i dilii: ami Tuka maglem tachi somzonni Tunvem mhaka dilii; razacho prosn Tunvem amkam kollit keloi.'
24. Razan Babiloniechea vidvanank jive-xim marpachem kam' dil'lem tea Arioka-xim Daniel gelo. Bhitôrvochun, tannem mhollem: 'Babiloniechea vidvanancho jiv kaddum naka. Mhaka razachea mhoreant vhor ani hanv razak tachea sopnnacho ôrth sangtolom.'
25. Vêll ibaddinastana, Ariokan Danielak raza fuddean vhelo. Tannem mhollem: 'Judachea pordexiam modem razak sopnacho ôrth fôddun ditolo êk monis mhaka mell'lla.'
26. Danielak (haka Belteshazar mhonn nanv dil'lem) razan mhollem: 'Mhaka koslem sopon poddlam tem ani tacho ôrth konn to tujean mhaka sangunk zata?'
27. Razak fuddo korun, Danielan zobab dilo: 'Razan fuddem manddlolea guttachem sot khoincheach vidvanan, parkian, jadukaran vô ghaddian sangunk zaunk na;
28. punn sorgar Dev asa ani Toch gutt ukte korta ani Tannench Nebukadnezzar razak nimannea disamnim kitem ghòddtolem tem dakhoun dilam. Tôr tujê khattier tum nhidlolo astana tuka poddlolem tem sopon hem asa ani him asat tujea monantlean firtalim tim dorxonam:
29. Xrêxtt raza, tum tujê khattier astana, tujim chintnam fuddaracher gelim, ani gutt ukte korta tea Devan kitem ghòddchem asa tem tuka tthavem kelem.
30. Ho gutt mhaka-i Tannem ukto kela, hanv dusream-vôn huxar mhonn nhoi, punn hea ekach karonna khatir: tacho khoro somôz razan vollkun gheunchê pasot ani tujim gupit chintnam tunvem somzunchê pasot.
31. Xrêxtt raza, tuka ek dorxon zalem; tunvem pollelãi tem oxem: êk murti, vorixtt ani ekdom' porzollit murti, tujê mukhar ubi asli; ti polleunk bhirankull asli.
32. Hê murtichi tokli nirbhel bhangarachi, hodd'ddem ani bavlle rupeachim, tichem pott ani penkott pitullchim, tichim zangllam lokhonddachim,
33. tiche pãi orde lokhonddache ani orde matieche.
34. Tum oso tellun polletaloi tedna, konnachoch hat lagonastana êk fatôr konsllun ieun tê murticher poddlo ani hea fatran lokhonddache ani matieche pãi fôddun tancho churo kelo.
35. Tedna, gimantlea mollnnechea kholleavoilem barik pol zal'lea bhaxen, title barik lokhonddache, matieche, pitullche, rupeache ani bhangarache kuddkean-kuddke zale. Varean tankam zollim-mollim ximpddaile ani tancho mag porian urunk na. Ani murti fôddlolo to fatôr êk vhoddlo porvôt zalo ani tannem ak'khi prithum' bhòrli.
36. Hem tujem sopon. 'Atam ami razak tacho ôrth ditanv.'
37. Tum mharaza, razanchea raza, tuka sorginchea Devan sorv-odhikar, podvi, xokti ani mhoima dileant.
38. Mon'xank, zonavorank, ontralla veleam suknneank, khoinsor-ui tim jieum, tankam soglleank tujê adhin Tannem keleant ani tea soglleancho tuka raza kela: tum ti bhangarachi tokli.
39. Ani tujê pattlean dusrem ek raj upzotolem, punn tujea rajea itlem ghott nhoi; ani uprant tisrem ek, pitullchem, ani tem ak'khea sonvsarar razvôtt choloitolem.
40. Tea uprant, ek chovthem raj upzotolem, lokhondda itlem okhondd, sogllem fôddun uddoita ani soglleacho churo korta toslea lokhondda sarkem. Zoxem lokhondd soglleache kuddke korta, toxench tem raj poilea rajeanche kuddke kortolem ani tankam fôddun uddoitolem.
41. Orde lokhonddache ani orde matieche pãi tunvem polleleai: te mhollear ek raj, punn tem don rajeamnim fantt'tolem; punn, lokhondd ani mati misôll zal'lim tunvem pollelam toxem, taka ozun lokhonddachi ghottsann astoli.
42. Pãi orde lokhonddache ani orde matieche mhonnttôch, raj ordem ghott ani ordem osokt zatolem.
43. Tea bhair, lokhondd ani mati matiechea aidonamnim misôll zal'lim tunvem polleleãi; mhonngê him don-ui rajeam logna-sombondan misôll zatolim; punn, zoxem lokhondd ani mati sondhunk zainant, toxem tim ekvottlolim urchim nant.
44. Tea razanchea kallar, sorgincho Dev kednanch bhosm zaun vechem na toslem ek raj sthaptolo, ani hem raj dusrê porjechea tabeant poddchem na; zoxem, konnachoch hat lagonastana, dongra velo konsoll'lolea fatran lokhonddacho, pitullcho, matiecho, bhangaracho ani rupeacho churo kelo mhonn tunvem pollelãi, toxem hem raj sogllea adlea rajeancho churo kortolem ani tankam gilltolem, punn tem apunnuch sodankal togtolem. Kitem ghòddchem asa tem vortea Devan razak dakhoilam. Sopon khorem, ani tacho hoch khoro ôrth!'
46. Tedna Nebukadnezzar raza Daniela fuddem saxttangim poddlo; Danielak ek somorponn ani pormollit bolidan bhettounk tannem adnia dili.
47. Razan Danielak mhollem: 'Tuzo Dev khoreaninch devancho Dev, razancho Dhoni ani Gutt ukte Korpi, kiteak tujean ho gutt fôddun tacho ôrth ukto korunk zalo.'
48. Razan Danielak unch podvechea panvddear ubarun dovorlo ani zaitim vhodd molachim dennim taka dilim. Tannem taka Babiloniechea ak'khea prantacho razpal kelo ani Babiloniechea sogllea vidvanancho mukheli.
49. Danielachê magnnê pormannem, razan Babiloniechea prantacho karbhar Shadrak, Meshak ani Abednego hankam dilo; punn khud Daniel razachê sevek razvaddeant ravlo.
