1. Babilonient Jokim nanvacho êk dadlo aslo.
2. Suzan nanvachê êkê bailê lagim to logn zal'lo. Ti Hilkia-chi dhuv asli; ti ekdom' sundôr asli ani Devachê bhirantichi, kiteak
3. ticho bapui ani avoi bhoktivont mon'xam aslim, ani tãnnim aplê dhuvek Moizesachea xastrant xikovnn diun vaddoil'li.
4. Jokim bhov girest aslo; tachea ghorak tenkun êk mollo aslo; ani zaito Judêv lôk tanger ietalo, kiteak sogllea heram poros chôdd taka manan lêkhtalo.
5. Tea vorsa loka modlea dogam malgoddeank vinchun kaddlole ani mon'subidar zaunk nemlole. Oslea mon'xam vixim Sorvesporan mhonnlolem: 'Lokak vatt dakhounk ube zaleat malgodde ani mon'subidar; tanchêch vorvim Babilonient noxtteponn bhitôr sorlam.'
6. Te monis Jokimchea ghara ietale ani koslo-i khottlo suttavo korcho aslo zalear, lôk tanchê mukhar vetalo.
7. Sogllo lôk bhair sorun gelea uprant, sumar donparchea vellar, Suzan aplea potichea molleant bhonvo.
8. Apli bhonvddi marunk ti bhitôr sortali tedna, te dog malgodde dispottim tika polle-tale. Polleun-polleun tanchea kallzant tichi axa vaddonk lagli.
9. Apli budh tãnnim kuxin kaddun dovorli, Sorgak aple dolle lavunk tãnnim porva korunk na, ani promannikponnache nem' te visorle.
10. Te dog-ui tichê kuddichê axen lastale, punn ekameka thaun te apli axa lipoitale,
11. kiteak mhollear tichea vangdda add poddchi apnnank axa asa mhonn uktem korunk tankam loz distali;
12. tori dôr-disa chukonastanam te ticher dolle lavunuch asle.
13. Êk dis, tãnnim ekamekak mhollem: 'Chol, ghara ia, don'parchea jevnnacho vêll zalo.' Oxem mhonnun ek-eklo ap-aplê vatten gelo.
14. Punn dog-ui porot aile ani ekamekachea fuddeant pavle. Apnnem oxem kiteak kelem tem ekamekak atam sangchench poddlem: apnnank Suzanachi axa asa mhonn tãnnim vollkhun ghetlem, ani tika eklich sampddaunk sondi sôdun kaddunk te kobul zale.
15. Mhonnttôch êk boro soêg melltolo mhonn te ravle. Êk dis, sodanchê bhaxen, dogam tornnatteam chakornink apnna borabôr gheun, Suzan aili. Gormecho dis to, ani ti molleant nhavunk sôdtali.
16. Konn thoim naslo, fokot te dog malgodde: ticher dolle ghalun te lipun ravlole.
17. Tinnem chakornink mhollem: 'Mhaka ilem-xem tel ani pormôll gheun ieiat, ani hanv nhatam mhonnosôr molleache darvontte bond korun dovrat.'
18. Apnnank sanglolem toxem tãnnim kelem: molleacho darvontto tãnnim dhamplo, ani, kuxichea eka darantleam portun gharant bhitôr sorun, Suzanan maglolem tem teô haddunk geleô; malgoddeanchi tankam khoboruch nasli, kiteak te lipun ravlole.
19. Teô chakornni bhair sorun geleô toxeô, te dog malgodde thoim ube zale ani tichê pattik lagle.
20. Tãnnim mhollem: 'Polle, molleacho darvontto bond asa, konnuch amkam pollena. Amkam tuji axa asa. Amchi khuxi kôr ani tujê lagim amkam ekvôtt korum-di.
21. Punn tum na mhonnxi zalear, ami dog-ui oxi tujer add govai ditoleanv, ki tujê bora-bôr hanga êk tornnatto aslo ani heach pasot tunvem tujea chakornink bhair dhaddleôi.'
22. Suzanan suskar sôddlo. Tinne mmhollem: 'Khoinchêch vatten hanv vattavo-na: hanv hôi mhonnon zalear, mhaka moronn favo; ani tumkam na mhonnon zalear, tumchea hatantli hanv suttona.
23. Punn Sorvesporachea dolleam mukhar patok korchê poros, guneanva vinnem tumchea hatamnim poddlear mhaka odik borem.'
24. Tedna ti zata titlê vhoddlean arddunk-kirddunk lagli. Te-i dog malgodde bob marunk lagle ani ticho guneanv korunk lagle.
25. Eklo molleacho darvontto ugddunk dhanvlo.
26. Molleant bob zata ti aikun, ghorantlo lôk Suzanak kitem zalam tem polleunk kuxichea darantlean dhanvun ailo.
27. Malgoddeamnim apli kanni sangtôch, chakram sogllim ghuspolim, kiteak Suzana vixim osli khobor kednanch konnem sangunk nasli.
28. Dusrea disa tichea ghova Jokimchea ghorant êk zomat bhòrli. Te dog malgodde aile; aplea noxtteponnan te ekuch chint'tale: tichem moronn magun gheunk.
29. Zomlolea lokak tãnnim mhollem: 'Hilkiachi dhuv ani Jokimchi bail Suzan, hika apoun haddat.' Tika apounk dhaddli,
30. ani ti aili aplea avoibapaichea sangata, toxench aplea bhurgeam ani sogllea soiream borabôr.
31. Suzan polleunk bhov sobit-sundôr asli;
32. tinnem apnnacher êk podd'ddo ghal'lo; tichê sundoraiecher dolle ghalun dhadoxi zaunchê pasot tea noxtteamnim tika podd'ddo kaddunk lailo.
33. Tichim ghorchim sogllim roddtalim, ani toxench tika polleun aslim tim sogllim.
34. Loka modem ube ravun, tea dogam malgoddeamnim Suzanachea mathear aple hat dovorle.
35. Ti apunn roddtali, punn tiche dolle Sorgak lail'le asle kiteak tichem kalliz Devacher thir visvas dovrun aslem.
36. Tedna malgodde ulounk lagle: 'Ami eklech molleant bhonvta astana, hi bail dogam chakornnink gheun aili. Tinnem molleacho darvontto bond kelo ani chakornnink bhair sorunk lailem.
37. Konn-eklo tornnatto liplolo aslo: to tichê lagim ailo ani dogam-i vangdda add poddlim.
38. Ami molleachea eka konnxeak asleanv; thoim thaun hem noxtteponn polleun, tanchê-xim ami dhanvun aileanv.
39. Tankam ami sarkim ektthaim dekhleant, punn tea tornnatteak amchean dhôrunk zalem na kiteak to amchê poros odik ghôtt aslo, ani darvontto ugddun to pollun gelo.
40. Punn hika zalear ami dhôrli ani to konn kai mhonn tika vicharlem.
41. Hem amkam sangunk ti kobul na zali. Hi amchi govaiki.' Zomlolea lokan tanchem sotman'lem, kiteak te lokantle malgodde ani mon'subidar asle. Mhonnttôch Suzanacher mornnachem formonn poddlem.
42. Vhoddlea tallean tinnem mhollem: 'Sasnnachea Deva, soglle gutt Tum vollkhotai, dôr-êk vôst ghòddchê adinch ti Tum vollkhotai.
43. Mhojer add tãnnim lottik govai dilea mhonn Tum zannoi. Tanchea khotteponnan mhojer add ghôddlam tea sogttantli hanv niropra-dhi. Toriastana hanv atam morunk vetam! Tum mhaka morunk ditoloi Ga?'
44. Sorvesporan tichem prarthon aikolem,
45. ani tika marunk vhortalim tednanch, Daniel nanvachea eka tornnattea sovem aslo to povitr atmo Tannem zagoilo.
46. Bob marun to mhonnunk laglo: 'Hê ostorêchea mornnant mhaka vantto na!'
47. Sogllo lôk taka polleunk laglo; tãnnim taka vicharlem: 'Hem tum sangtai tem kitem?'
48. Zomlolea loka modem ubo ravun, tannem oso zobab dilo: 'Israelachea putam-dhuvamnô, tumkam itlem ginean na zalem ki, sarki chovkoxi korinastana ani sot sarkem sôdun kaddinastana, êkê Israelachê dhuvecher tumi mornnachem formonn marlem?
49. Mon'subechea zagear portun vochat, kiteak hãnnim ticher add lottik govai dilea.'
50. Sogllo lôk vegim-vegim thoim portun gelo ani malgoddeamnim Danielak mhollem: 'Amchê modem bosunk ie ani tujea monant kitem asa tem amkam sang, kiteak Devan tuka zannteanchi budh dilea.'
51. Tedna Danielan tankam mhollem: 'Hankam dogãik-ui ekameka thaun bore pois-pois dovrat, ani hanv tanchi chovkoxi kortolom.'
52. Tankam pois-pois kortôch, Danielan tantlea ekleak apoun vicharlem: 'Tum noxtteponnant mhataro zalai ani atam tujea adlea jivitachim patkam tujea mathear choddleant.
53. Sorvesporan mhollam: "Niropradhi ani promannik mon'xak jivexim marcho naim!"; toriastana tum onitin nirnnoi ditai, niropradiank xikxa laitai ani guneanvkarank sôddun ditai!
54. Ti tuka borich sampoddli mum? Tôratam sang amkam: khoinchea zhadda khal tunvem tankam ektthaim dekhlim-i?' Tannem oso zobab dilo: 'Babull zhadda khal.'
55. Danielan mhollem: 'Borem zalem! Tuji fôtt tujeach mathear poddta! Devachea dutan Tachê koddchem formonn ghetlolem asa, ani to tuka katrun tujim ordanch korun uddoitolo!'
56. Tannem taka dhaddlo, ani dusrea malgoddeak apoun taka mhollem: 'Tum Judasachi nhoi punn Kanaan'chi sonsôt! Suropaien tuka bhuloilo, kuddichê axen tujem kalliz noxttem korun sôddlem!
57. Oxench tumi Israelacheam dhuvam lagim kortaleat ani tumkam na mhonnpak tankam ekdom' bhem distalem. Punn hi asa êk Judachi dhuv; tichean tumchem noxtteponn sosunk zaina zalem!
58. Chol atam, sang mhaka: 'khoinchea zhadda khal tunvem tankam ektthaim dekhlim-i?' Tannem oso zobab dilo: 'Sindhur zhadda khal.'
59. Danielan mhollem: 'Borem zalem! Tuji fôtt tujea mathear poddta! Polle, tuka modleanuch katrun uddounk ani tumkam dogãik-ui nattak korunk Devacho dut hatan torsad dhôrun ravta!'
60. Tedna thoim zomlolea lokan vhoddlean bob marun Devak vakhannlo, kiteak To Apnnacher visvas tthevtoleank sôddoita.
61. Magir to lôk tea dogam malgoddeancher portolo, kiteak tanchi fottkiri govaiki tancheach tonddantli Danielan bhair kaddun dakhoili.
62. Moizesachea xastra pormannem, ji xikxa te aplea peleak lavunk sôdtale, tich tãnnim tankam laili. Tankam jivexim marle. Ani oxem tea disa niropradhi bailecho jiv vanchun urlo.
63. Hilkian ani tachê bailen aplê dhuvê Suzana pasot Devache upkar attoile, ani toxench Jokiman ani sogllea tachea soireamnim kelem, kiteak ji ticher add bemoriadichi sakxi dil'li, tantli ti sarkich niropradhi mhonn spoxtt zalem.
64. Tea disa thaun loka modem Danielachi kirti ekdom' vaddli.
