1. Poilem ailolea dorxona uprant, Belshazar razachê razvôttkechea tisrea vorsa, mhaka, Danielak aniek dorxon pavlem.
2. Hanv dorxon tellun aslom ani tem telltana Susak pavlom: Elamachea prantantlo êk kil'lo to; dorxon polletam-polletam, mhakach Ulai nodi-xim ubo aslolo hanvem dekhlo.
3. Hanvem dolle ubarle ani nodi fuddeant ubo aslolo êk menddro hanvem pollelo. Taka don xingam aslim; don-ui lamb, punn ek xing dusrea poros odik lamb aslem; vhoddlem aslem tem dusrem xing.
4. Menddro aplê ostomtek, ut'torek ani dokhinnek toklen akromonn kortalo mhonn hanvem pollelem. Khoincheach zonavorachean taka fuddo korunk zainaslem, tachea hatantlo konnuch suttpacho naslo. Apnnak zai tê bhaxen tannem kelem ani tem odik ghôtt zalem.
5. Hanvem bariksannen pollelem tem hem: eka bokddean ostomtê thaun ieun zomnik tenkonastana ak'kho sonvsar bollandun kaddlo; dolleam modekot bokddeak ek kovtik xing aslem.
6. Zo don xingancho menddro hanvem nodi fuddem ubo aslolo pollel'lo, tachê vatten bokddo gelo ani khôr ragan tachea angar dhanvlo.
7. Tea menddreacher bokddo soglloch ragabhorit dhanvtana, hanv taka polletalom; tannem menddreak dhopttilo ani tachim don-ui xingam môddun uddoilim. Bokddeak fuddo korunk menddreak bolluch naslem; bokddean menddreak zomnir uddoilo ani pãiam ponda mostilo. Bokddeachea hatantlo menddreak soddounk konnuch naslo.
8. Uprant bokddo adim poros ekdom' bollixtt zalo; punn jedna to aplê xoktichê tonkxer nachtalo, tedna tachem vhoddlem xing moddon poddlem ani tachê svater char thor xingam akaxachea char-ui dixamnim upzolim.
9. Hanchê modlea ek xingantlem anink ek dhakttulem xing bhair sorlem; tem dokhinnechê, ut'torechê ani Mhoimechea Desachê vatten vaddot gelem.
10. Tem vaddtam-vaddtam ontrallachea fouzam-xim porian pavlem, ani tannem fouzank ani noketrank xevttun zomnicher uddoilim, ani tankam pãiam tolla mostilim.
11. Foujechea Kunvrachea odhikarak porian tannem fuddo kelo. Disa-dispottim sodam Taka bhettouncho iôdn tannem thamboilo ani Tachea mondirachi buniad tannem môddun uddoili;
12. tannem Tachi fouz-ui aplea tabeant keli; iodnachê svater tannem khotteponn sthaplem ani sot zomnir xevttilem. Xing hea kamant iesvont zalem.
13. Tedna eka devdutak uloitana hanvem aikolo, ani dusro eklo devdut poileak oso vichar kortalo: 'Disa-dispottim sodam bhettounchea iodnachem, kanttallo haddtolea khotteponnachem, pãiam tolla mostill'lea Devmondirachem ani foujechem hem dorxon: kedna porian hea dorxonacho kall togtolo?'
14. Poilean zobab dilo: 'Don hozar tin'xim sanzô ani sokall bollanddun vocho porian; uprant Devmondirache hok'k taka portun melltole.'
15. Hem dorxon pollelea uprant, hanv, Daniel, tacho ôrth somzunk proitn kortalom; tednanch mhojea fuddeant konn-eklo ubo zalo: to monis koso distalo.
16. Ulai Nodi thaun eka mon'xacho tallo hanvem aikolo: 'Gabriel, dorxonacho ôrth taka sang!'
17. Hanv ubo aslom thoim to ailo; to lagim ailo tedna, mhaka vhôdd kampero suttlo ani hanv zomnicher saxttangim poddlom. Tannem mhaka mhollem: 'Mon'xachea puta, hachi somzonni ghe: hem dorxon Xevottachea kalla vixim.'
18. To uloit aslo tedna mhaka ghunvôll aili ani mhojem tondd khala zomnik tenklem. Tannem mhaka hat lailo ani mhojea pãiancher mhaka ubokelo.
19. Tannem mhollem: 'Devan nemlolea Farikponnachea kallachea xevottak jem kitem ghòddchem asa, tachê vixim hanv tuka sangtam.
20. Tunvem pollel'lea menddreachim don xingam mhollear Medieche ani Persieche raza.
21. Kensallo bokddo mhollear Gresiecho raza, tachea dolleam modlem vhoddlem xing mhollear poilo raza.
22. Jem xing tuttlem ani jim char xingam tachê svater upzolim mhollear tea raxttrantlim utpon zatat tim char rajeam, punn tachi ghottai hankam na.
23. Tanchê razvôttkechea xevottak, tanchea patkanchem map bhoron ietolem tedna, gorvan bhòrlolo ani vhoddê naddbudhicho êk raza upzotolo.
24. Tachi podvi vaddot vaddot vetoli, tori ti aplea khaxa kuvetichi nhoi; chintunk zainant tosleô mosloti to ievzun kaddtolo; koslem-i kam' tannem hatant ghetlem tôr, tantum to iesvont zatolo; podvedar mon'xanchem ani bhoktanchem, Devachê porjechem, to ghorttann kortolo.
25. Gineanan to itlo huxar astolo ki sogllea tachea ghatki kornniank ies melltolem. Tachem kalliz odik-odik gorvan bhoron ietolem, ani guptim zaitea lokancho to nas kortolo. Razkunvranchea Razkunvrak porian to fuddo kortolo, punn khoincheach mon'xan taka hat lainastana, tacho nas zatolo.
26. Sanz ani sokall, hanchê vixim jea dorxonachi somzonni tuka dilea, tem khorem, punn tunvem tem gupit dovrunk zai, karonn ozun zaite dis bollanddche asat.'
27. Hem polleun ani aikun, hanv, Daniel, soiranna bhair poddlom; zaite dis hanv piddent aslom. Uprant, razvaddeant kam' korunk hanv utthlom. Hem dorxon hanvem konnak sangunk na, ani tacho ôrth mhaka ozun mellunk naslo.
