1 : ತರುವಾಯ ಸಜ್ಜನನು ನಿಂತುಕೊಳ್ಳುವನು ಧೈರ್ಯದಿಂದ ತನ್ನ ಕಾಡಿದವರ ಮುನ್ನ, ತನ್ನ ಕಾರ್ಯಗಳ ತಿರಸ್ಕರಿಸಿದವರ ಮುನ್ನ.

2 : ಆ ದುರುಳರು ಇದನ್ನು ನೋಡಿ ಭಯಭ್ರಾಂತರಾಗುವರು ಅವನು ಪಡೆದ ಅಪ್ರತ್ಯಕ್ಷ ರಕ್ಷಣೆಯನ್ನು ಕಂಡು ಬೆರಗಾಗುವರು.

3 : ಪಶ್ಚಾತ್ತಾಪಪಟ್ಟು ಆಂತರ್ಯದಲ್ಲಿ ನೊಂದು ನರಳುತ್ತಾ ಹೀಗೆನ್ನುವರು: “ನಾವು ಗೇಲಿಮಾಡಿ, ಅಪಹಾಸ್ಯಕ್ಕೀಡು ಮಾಡಿದ ವ್ಯಕ್ತಿ ಇವನಲ್ಲವೆ?” ಎಂದು.

4 : “ಮತಿಹೀನರಾದ ನಾವು ಇವನ ಜೀವನ ಹುಚ್ಚುತನ ಎಂದೆವು ಇವನ ಅಂತ್ಯ ಗೌರವಹೀನವಾದುದೆಂದು ತಿಳಿದೆವು;

5 : ಆದರೆ ಇವನು ದೇವರ ಕುವರರಲ್ಲೆ ಗಣಿತನಾದುದು ಹೇಗೆ? ಸಂತರಲಿ ಒಬ್ಬನಾಗಿ ಪರಿಗಣಿತನಾದುದು ಹೇಗೆ?

6 : ನಿಜವಾಗಿಯೂ ಸತ್ಯದ ಮಾರ್ಗ ಬಿಟ್ಟು ಹೋದವರು ನಾವೇ ನೀತಿಯ ಜ್ತೋತಿ ಬೆಳಗಲಿಲ್ಲ, ಸೂರ್ಯೋದಯವಾಗಲಿಲ್ಲ ನಮಗೆ.

7 : ನಾವು ಸಂತುಷ್ಟರಾದುದು ಅಧರ್ಮದಲ್ಲಿ, ವಿನಾಶದ ಮಾರ್ಗದಲ್ಲಿ ದೇವರ ಮಾರ್ಗವನರಿಯದೆ ಅಲೆದೆವು ಹಾದಿಗಳಿಲ್ಲದ ಕಾಡಿನಲ್ಲಿ.

8 : ಅಹಂಕಾರದಿಂದ ನಮಗಾದ ಲಾಭವಾದರೂ ಏನು? ಸಿರಿಸಂಪತ್ತು, ಒಣಜಂಬ ತಂದ ಭಾಗ್ಯವಾದರೂ ಏನು?

9 : ಅವೆಲ್ಲವು ಸರಿದುಹೋದವು ನೆರಳಿನಂತೆ ಹಾದುಹೋಗಿಬಿಟ್ಟವು ಗಾಳಿ ಸುದ್ದಿಯಂತೆ.

10 : ಕಲ್ಲೋಲಕಡಲಿನಲಿ ತೇಲಿಹೋದ ಕಪ್ಪಲಂತೆ ಕಣ್ಮರೆಯಾಯಿತಲ್ಲಾ ಮುಂದೆ ಸಾಗಿಹೋದ ಮೇಲೆ ಅದರ ಹಾದಿಯ ಕುರುಹೂ ಸಿಕ್ಕಲಿಲ್ಲ ಅದರ ಅಡಿಮರದ ಗುರುತೂ ಆ ಅಲೆಗಳ ಮಧ್ಯೆ ಕಾಣಿಸಲಿಲ್ಲ;

11 : ಹಾರುವ ಹಕ್ಕಿಯ ರೆಕ್ಕೆ ಬಡಿತಕ್ಕೆ ಗಾಳಿ ಸೀಳಿಹೋಗುತ್ತದೆ ಗಾಳಿ ಮತ್ತೆ ಕೂಡಿಕೊಂಡು ಹಕ್ಕಿಹೋದ ಜಾಡೇ ಕಾಣದಂತಾಗುತ್ತದೆ;

12 : ಗುರಿಗೆ ಬಿಟ್ಟ ಬಾಣದಿಂದ ಗಾಳಿ ಇಬ್ಭಾಗವಾಗುತ್ತದೆ ಕೂಡಲೆ ಕೂಡಿಕೊಂಡು ಬಾಣಹೋದ ಹಾದಿ ಅಗೋಚರವಾಗುತ್ತದೆ;

13 : ಅಂತೆಯೇ, ಹುಟ್ಟಿದೊಡನೆಯೇ ನಾವು ಇಲ್ಲದಂತಾದೆವಲ್ಲಾ ತೋರಿಸಲು ಸದ್ಗುಣ ಯಾವುದರ ಚಿಹ್ನೆಯೂ ನಮ್ಮಲ್ಲಿಲ್ಲ ಅಧರ್ಮದಲ್ಲಿ ನಾವು ಕ್ಷೀಣಿಸಿಹೋದೆವಲ್ಲಾ!

14 : ಗಾಳಿಗೆ ತೂರಿಹೋಗುವ ಹೊಟ್ಟಿನಂತೆ ಬಿರುಗಾಳಿಗೆ ಬಡಿದುಹೋದ ನೊರೆಯಂತೆ ಗಾಳಿಗೆ ಚದರಿಹೋದ ಹೊಗೆಯಂತೆ ಒಂದೇ ದಿನ ತಂಗಿಹೋದ ಅತಿಥಿಯಂತೆ ಮಾಯವಾಗುವುದು ದುರ್ಜನರ ನಿರೀಕ್ಷೆ.

15 : ಸಜ್ಜನರಾದರೋ ಬಾಳುವರು ಸದಾಕಾಲ ದೇವರೇ ಅವರ ಬಹುಮಾನ, ಮಹೋನ್ನತನೇ ಅವರ ಪಾಲಕ.

16 : ರಾಜಭೂಷಣವಾದ ಕಿರೀಟವನು, ಅಂದವಾದ ಮುಕುಟವನು ಪಡೆವರವರು ಸರ್ವೇಶ್ವರನ ಕೈಯಿಂದ ಆತ ರಕ್ಷಿಸುವನವರನು ತನ್ನ ಭುಜಬಲದಿಂದ ಕಾಪಾಡುವನವರನು ತನ್ನ ಬಲಹಸ್ತದಿಂದ.

17 : ಸರ್ವೇಶ್ವರ, ಆಯುಧವಾಗಿಸಿಕೊಳ್ಳುವನು ತನ್ನ ಆಗ್ರಹವನೆ ವೈರಿಗೆ ಮುಯ್ಯಿ ತೀರಿಸಲು ತನ್ನ ಸೃಷ್ಟಿಸಮಸ್ತವನೆ.

18 : ಧರಿಸಿಕೊಳ್ಳುವನು ನ್ಯಾಯನೀತಿಯನ್ನು ತನ್ನ ಕವಚವನ್ನಾಗಿ ಯಥಾರ್ಥ ನ್ಯಾಯ ವಿವೇಚನೆಯನ್ನು ತನ್ನ ಶಿರಸ್ತ್ರಾಣವನ್ನಾಗಿ.

19 : ತೆಗೆದುಕೊಳ್ಳುವನು ಪವಿತ್ರತೆಯನ್ನು ಅಜೇಯ ಗುರಾಣಿಯನ್ನಾಗಿ.

20 : ಮಸೆಯುವನು ತೀಕ್ಷ್ಣವಾದ ಕೋಪವನು ಖಡ್ಗವನ್ನಾಗಿ ಮತಿಹೀನರೊಡನೆ ಹೋರಾಡುವುದು ಸೃಷ್ಟಿ, ಆತನ ಪಕ್ಷ ವಹಿಸಿ.

21 : ಸಿಡಿಲೆಂಬ ಬಾಣಗಳು ಗುರಿಹಿಡಿದು ನೇರವಾಗಿ ತೆರಳುವುವು ಮೋಡವೆಂಬ ಗಡುಸಾದ ಬಿಲ್ಲಿನಿಂದ ಗುರಿಯೆಡೆಗೆ ಹಾರುವುವು

22 : ಆಲಿಕಲ್ಲುಗಳು ಬೀಳುವುವು ಕವಣೆಯ ಕಲ್ಲುಗಳಂತೆ ರಭಸವಾಗಿ ಸಮುದ್ರದಲೆಗಳು ಕೋಪದಿಂದ ಅಪ್ಪಳಿಸುವುವು ಅವರಿಗೆ ವಿರುದ್ಧವಾಗಿ ಹುಚ್ಚುಹೊಳೆಗಳು ಅವರನ್ನು ಕೊಚ್ಚಿ ಕೊಂಡು ಹೋಗುವುವು ಬಲವಾಗಿ.

23 : ಬಿರುಗಾಳಿ ಬೀಸುವುದು ಅವರಿಗೆದುರಾಗಿ ಹೊಟ್ಟಿನಂತೆ ತೂರಿಬಿಡುವುದವರನು ತುಫಾನಾಗಿ. ಈ ಪರಿ ಅಧರ್ಮ ಹಾಳುಮಾಡುವುದು, ಧರೆಯನ್ನೆಲ್ಲಾ ದುಷ್ಟತನ ಉರುಳಿಸುವುದು, ರಾಜಸಿಂಹಾಸನಗಳನ್ನೆಲ್ಲಾ. ಸುಜ್ಞಾನಿಗಳಾಗಿರಲು ರಾಜರುಗಳಿಗೆ ಕರೆ