1. Unchamolachea pormôllit tela poros, borem nanv odik xrêxtt. Zolmachea disa poros, mornnacho dis odik mhotvacho.
2. Porob monoitolea ghorant gelolea poros dukhachea ghorant vochop odik borem; Kiteak thoim mon'xacho xevôtt dista, ani okherek zonn ekleak moronn ravta mhunnon zannovta.
3. Hanxea poros dukh moladik: Dukhest sobhava fattlean sukhest kalliz liplolem asta.
4. Xanneachem kalliz dukhest gharant asta, Pixeachem kalliz moujechea ghorant asta.
5. Eka pixeachem git aikololea poros eka xanneachi xittkavnni aikolear odik faideachi.
6. Pixeachem hanxem ujeachea agttean kantte sorsorlelea bhaxen lasta Ani tem-i polkeponn.
7. Zulumxai eka budvontak piso kortat, ani lonch gheun kalliz boxttota.
8. Zoso ekê vostucho xevôtt tachê survatê poros boro, toxench gorva poros sonsnnikai bori.
9. Sompeponnim ragar zainaka, tujea ragacher tabo dovor. Kallzant rag dovorop pixeponn.
10. Adlea kallar soglleô vostu atanchea poros boreô kiteak asleô? oxem mhunnon naka kiteak, ho prosn zannvaiecho nhoi.
11. Zannvai, hem zannteam koddlean ailolem daiz koxem, suriacho uzvadd polletat tankam ti faideachi.
12. Zoso duddu mon'xachi rakhonn korta, toxich zannvai korta: Punn, zannvaiecho adar oso, ki, zankam ti mellta tankam ti jivit dita.
13. Devachê rochnnecher nihall: Devan bagoilam tem konnanchean nitt korunk zata?
14. Khuxalkaiechea disa khoxi za, Ani tujer oddchonneom ietat tedna ugddas kôr: Fuddem ghoddta tem apnnak onudhan koxem tunvem somzona zanvchê khatir Dev dukh ani sukh dhaddta.
15. Hanvem mhojea upeôg naslolea jivitant pollelam: êk Monis, aplea boreponnant moron veta ani ek noxtto monis, noxtto asunuim jivo urta.
16. Dekhun, choddui boro vô choddui xannom zainaka Tunvem tujem nisontton kiteak korchem?
17. Tosoch choddui noxtto vô choddui piso zainaka, Tuzo kall pavchê adim tunvem kiteak morpachem?
18. Haka veng marun taka sôddum naka kiteak, Devachi bhirant asloleak donuim melltat.
19. Bara raj cholovpeanchea bolla poros, eka zannvaiechea mon'xachean eka xarak adav korum ieta.
20. Sodanch dusreak borem korpi ekdam tori patok korunk naslolo monis sonvsarant mellcho na.
21. Toxench dusre sangtat titleim aikonaka, kednaim tuzo chakor tujem vaitt uloitolo tem tuka aikunk ieunchem na.
22. Kiteak tunvem dusrea lokankui opmanailolo to tuka ugddas astolo.
23. Hem soglem sot mhunnon zannvaien mhaka somzolam, hanv xannom zaunk axelom. Punn tem sot mhojea hata bhair urlem.
24. Fattlo kall hata bhair asa, to konnanchean sôdun kaddunk zata?
25. Punn, khub xikun, nihall kortôch ani zannvai melloitoch, noxtt ek khotteponn ani pisai ek murkheponn mhunnon mhaka kollon ailem.
26. Ostori mornna poros koddu oxem mhaka dislem, ti êk fas, tichem kalliz zall ani tiche hat sanklleô. Zo monis Devachi khoxi korta to tichea chopkeantlo vattoutolo. Ani patkeank ti sampddaita.
27. Upodexôk oxem mhonntta, Eka fattlean ekê vostuchi topasnni korun, nirnnoi gheunk zai.
28. Hanv dusreai prosnache zobab sôdtam: Punn, te mhaka mellonant, Mhozo man favo aslolo hozarant eklo dadlo mhaka meulo. Punn ekui ostori mhaka mellonk na.
29. Polle, mhaka fokot hem sot kollon ailam: Devan amkam ekdom sadhe rochle Punn ami mon'xamnim amkam vankdde ani kusdde korun sôddle.
