1. Dôr-êkê vostuk êk vêll asa, ani sorga ponda dôr-eka kamak êk vêll asa:
2. Êk vêll zolmunk ani êk vêll morunk; êk vêll rovunk ani êk vêll roilolem umttun kaddunk;
3. êk vêll jivexim marunk ani êk vêll boro korunk; êk vêll môddunk ani êk vêll bandunk;
4. êk vêll roddunk ani êk vêll hansunk; êk vêll dukh korunk ani êk vêll nachunk;
5. êk vêll fator bhair uddounk ani êk vêll te novean ektthaim korunk; êk vêll ektthaim zaunk ani êk vêll kuxin sorunk;
6. êk vêll sôdunk, ani êk vêll sanddounk; êk vêll samballunk, ani êk vêll bhair uddounk;
7. êk vêll pinzunk, ani êk vêll xinvunk; êk vêll ogim ravunk, ani êk vêll ulounk;
8. êk vêll môg korunk, ani êk vêll dvês korunk; êk vêll zhuzunk ani êk vêll xantin jieunk.
9. Monis koxtt korta tachem taka kitem mellta?
10. Mon'xakullak Devan êk kherit vavr korunk dil'lo asa to hanv nihalltam.
11. To korta tem sogllem dôr-eka kalla purtem korta. Punn zorui Devan sogllea kallancher mon'xak nodor marunk dilea, torui orombak thaun tem xevttak porian Devan kelam tem vollkhun gheunk mon'xachean nozo.
12. Ami jivim astana, dhadosponna ani sontosa xivai mon'xakullak anink dusrem dhadosponn na mhunnon mhaka somzolam.
13. Ani ami amchea koxttamnim zoddloleô vostu jevtanv, khatanv ani jietanv tedna amkam dhadosponn mellta. Tem ek Devachem dennem.
14. Dev kitem korta tem sodanch togta toslem korta mhunnon mhaka khobor asa. Tantunt kitench choddounk zaina, tantuntlem kitench kaddunk zaina, Apnnak bhienvchê khatir Dev oso vagta.
15. Jem kitem asam, tem adinch aslem, Jem kitem aslem tem adinch asam; Adim ghoddlolem, Dev porot porot ghoddoita.
16. Toxench hanv mollba khala polletam: Nit asunk zai asli, thoim onit asta, Promannik asunk zai aslo thoim khuni asta.
17. Magir hanvem mhakach mhollem: Boreanchi ani khuniachi Dev ekech bhaxen nit kortolo. Kiteak, hanga dôr êk vost tharailolea pormannem, tharailolea vellaruch ghoddttoli.
18. Hanvem mhojê bhitôr chintlem.
19. Kiteak, mon'xachem nirmonn ani zonavoranchem nirmonn ekech torechem: eklo morta tosoch dusroi mortolo. Dogui ekech torecheô mon'zati: Monis mon'zati poros vegllo nhoi. Kiteak, dogaincheai jivitak orth nasta.
20. Te soglle ekach zagear vetat, Sogllem dhullintlean ieta, Sogllem dhullint portota.
21. Mon'xacho jiv voir veta ani zonavorancho jiv sokla zomnint veta mhunnon konn zannam?
22. Aplea koxttanchem follachem dhadosponn bhogop hench borem oxem mhaka dista. Apnnem kelolea vostunk foll mellop hachea poros mon'xakullak anink dusri dhadoskai na, oxem mhaka dista Amchean anink kainch korpak zaina. Amchem jivit sorlea uprant, kitem zatolem tem amchean sangunk zaina.
