1. Hanvem mhojea monant mhollem: 'Borem asa, Hanv mouza bhôgtolom ani khuxalkai kitem dita tem polletolom.' Ani tem-i upeôg naslolem zalem.
2. Oslem hanxem pixeponn mhunnon hanvem chintlem. Hi dhadoskai legit upeôg nasloli. Zannvaiechea aspava khal, tuka kitench upkarona.
3. Hanvem mhojem jivit soreak bhettovpacho nirnnoi ghetlo. Suria pondak bes bore dis koxe kaddop tem sôdun kaddchê khatir, hanvem pixeponnak vengounk ievjilem.
4. Hanvem vhoddleô vostu melloileô, mhaka mahal bandle.
5. Dakanche molle roile, sundor bagi ani torekvar follam diupachim zhaddam thoinsor roilim.
6. Hanvem roilolea molleantlea nennttea zhaddank ximpchê khatir hanvem tolliô bandun kaddleô.
7. Hanvem gulam vikte ghetle, dadle ani bailô. Dusre mhojea gharant zolmole. Mhojea adim Jerusaleak konnachech lagim nasle title gorvanche ani menddreanche hinddui mhojê lagim asle.
8. Hanvem bhangar ani rupem ektthailem, ani hanvem rajvôtt choloilolea rajeancheô ani prantantleô dovloti melloileô, mhaka humedir dovorpak hanvem gavpi, dadle ani bailô haddleô toxench eka dadleachean anvddeunk zatat titleô khospaiô melloileô.
9. Mhojea adim Jerusaleak konnuch mahan zaunk na titlo hanv mahan zalom; torui hanvem mhoji zannvikai samball'lli.
10. Mhojea dolleak zai aslem tem dinastana dovorunk na. Mhojea kallzak hanvem koslench dhadosponn nakarunk na kiteak, mhojea kotthin kamant mhaka dhadosponn mell'lam.
11. Uprant, hanvem kelolea vostuncher ani teô korunk laglolea proitnacher hanvem niall kelo tacho kosloch faido zaunk na mhunnon mhaka somzolem. Ani hea suriachea pondak koslech vostucho faido na mhunnon mhaka somzolem.
12. Magir hanvem xanneponnachea murkhaponnacher ani pixeponnacher hanvem niall kelo. Okherek êk raza adlea razan kelolench kortolo.
13. Jê porim kallokha poros uzvaddant odik melloum ieta, toxench xanneponnan, pixeponnan poros odik mellounk zata.
14. Xannom aple dolle ukte dovorta, Taka apunn khoim veta tem somzota, Punn, piso kallokhant bhonvta.
15. Tankam dogainkui ekuch xevott ravta mhunnon dubav na. Hanvem mhojea monant mhollem, Pixeancho xevôtt zata tosoch mhozoi zatolo Hanv xannom zaun koslo faido zalo? Hem upeôg naslolem mhunnon mhaka somzolem.
16. Xanneancho pixeam poros odik kallo ugddas urona, ani okherek dogaincherui visôr poddtolo. Zaum to xannom vô piso. Dog-ui mortole.
17. Dekhun jivit mhonngê mhaka kãich nhoi. Karonn, tantlea dor vostun mhaka tras haddle tem sogllem samkem upeôg naslelem zalem mhaka jivitacho samko dusvas disunk lagla kiteak, sonvsarant kitem ghoddtta tem soglem upeôg naslolem. Hanv vareachea fattlean dhanvtolea bhaxen zalam.
18. Hanvem kam korun zoddlem tacho mhaka bilkul upeôg na. Karonn, jem kitem hanvem zôddlam, tem hanvem mhojea fattlean ietoleak dovorchem poddtolem.
19. Ani to ghoddiek xannom zait vô piso zait konn zannam? Torui hanvem koxtt korun ani zannvaien, hea sonvsarant jitlem zôddlam, tacho dhoni to zatolo tem sogllem upeôg naslolem.
20. Tea khatir, hanvem itle koxtt kele mhunnon mhaka poschetap dista.
21. Zannvikaien, vidien ani nipunnaien vavr korun-ui monis kosloch vavr korunk nasloleak aplea vavracho fôll sôddta: hem-i ek polkeponn ani ek vhodd vaitt.
22. Khorench votant itlo vavr korun ani itli ghas gheun, mon'xak kiteak upkarta?
23. Kiteak soglle tachê dis dukhinche ani sogllo tacho vavr koxttancho; ratcho legun tachea kallzak visôv na. Hem-i ek polkeponn.
24. Apnnem zôddllam tachem foll khavop pievop ani khuxal ravop, hachea poros anink kainch borem na. Hem-i Devachea hatantlem ieta, oxem mhaka dista.
25. Na zalear, tachea koddlean ailea xivai, konnak kitem khaunk ani dhadoxi zaunk mellta?
26. Apleak mandtat tankam Dev xanneponn, zannvai ani khuxalkai dita. Punn, patkeank to vaur korunk, koxtt kaddunk, zôddunk ani santtoun dovrunk laita. To magir teô vostu, apnnak mandtat tankam dita. Hem-i upeôg naslolem, varea fattlean dhanvlolea bhaxen.
