1. Hea sonvsarantlem anink ek noxtt mhojê nodrê mukhar ailam tem lokak khub kottin lagta.
2. Somoz Dev eka mon'xak soglli girestkai, bhattam-bensam ani man dita. Taka koslich vost unnem nasta. Punn, taka ti khaunk ani bhôgunk sondhi dina, konn eklo porki ieta ani ti bhôgta. Hem samkem nirfoll ani sonsunk zaina tosle upodre.
3. Vô somoz eka mon'xak xembôr bhurgim aslim. To khub vorsam jielo, ani, aplea mhatarponnar pavlea uprant legit zôr taka jivitantleô boreô vostu bhôgunk mevleô nant ani melea uprant êk somadhi taka mellonk na, tôr tachea poros aplea avoichea kusveant melolem bhurgem bhair sorta tem legit odik dhadoxi oxem mhaka dista.
4. Tem nirfollantlean ieta ani kallokhant veta, Ani tachem nanv kallokhantuch purovta.
5. Taka kednanch suriacho uzvadd dislona. Vô taka jivit kitem tem koll'llem na. Punn, okherek taka visôv mell'llo.
6. Don hozar vorsam jielo astannaim, jivitantleô boreô vostu jieunk ani bhôgunk mellunk nant, hea mon'xa poros, tachem noxib odik borem. Okherek te dog-ui ekach zagear vochonant?
7. Monis aplea potta khatir vavurta, punn tachem pott kednanch bhorona.
8. Eka pixea poros êk xannom monis kitlo vortea molacho? Eka goribak, jivitak koso fuddo korunk zai tem xikop gheun koslo faido zata?
9. Tem vareak dhôrunk tachea fattlean dhanvtolea vori nirfoll: Axechea koxttamnim choddfoddlolea poros, aplea lagim kitem asa tantunuch khoxi zavop odik faideachem.
10. Khub kalla adim tharailolea pormannem dôr vost ghoddta: Aplea poros bollixtt asa taka konnancheanuch nitik ubo korunk zaina.
11. Jitlo vêll ami bhasabhas kortanv, titlem odik nirfoll zata. Tacho koslo faido zata?
12. Hea savllê vori sortolea mottvea jivitan, apnnak kitem borem tem koxem somzotolem? Tachea fattlean, suria pondak, kitem ghoddtolem tem taka konn sangtolo?
