1. Poilea Korarant sevadhormacheô formavnniô asleô ani toxench ek povitr-sthan, punn tem sonvsarantlem povitr-sthan.
2. Êk tombu bandlolo aslo, tachea poilea bhagant dovorlolo aslo êk zhumbôr, ek mez ani Devak bhettoil'le undde: hea tombuk "Povitr Sthan" mhonnttat.
3. Dusrea bhagant, podd'ddea uprant, "Porom' Povitr Sthan" vô "Gabharo" mhonnlolo anink êk tombu bandlolo aslo.
4. Hantum bhitôr dhump zollounk bhangarachi vedi asli ani sogllea vattamnim bhangaran nettoil'li korarachi pett; hê pettent aslem man'na bhôrlolem ek bhangarachem pettul, panam futtloli Aaronachi bet ani koraracheô fatriô.
5. Pettê vôir Devachem bhogsonnem ghevpachi êk svat asli, ani mhoimevont Dev thoim hajir asa mhonn dakhounk pakotte aslole devdut hê svatê voir aple pakotte vistartale. Punn hea soglleachi barkaien khobor kaddcho ho vêll nhoi.
6. Heô vostu hê bhaxen manddloleô astana, aple sevadhormik kaide pallunk iadnik dôr-disa poilea tombunt bhitôr sortat.
7. Punn dusrea tombunt, porom'-iadnik ekloch provês korta, ani tem-i zalear vorsak êkuch pavtt. To rogot gheun bhitôr sorta ani aplea patkam khatir ani nennarponnan porjen kel'lea patkam khatir tem bhettoita.
8. Oxem, hea sonvsarantlea Gabhareacho tombu ozun togtalo titlo-i kall sorginchea Gabhareachi vatt ukti zaunk nasli mhonn Povitr Atmo dakhoun dita.
9. Hem sogllem atanchea kallachi êk khunna; tachea nemam pormannem Devak somorpitat tea danank ani iodnank bhozpianchim ontoskornnam sopurnn korchi podvi na.
10. Heô soglleô formavnniô kuddichea jivitak lagu zatat tosleô: khannam, pinneam ani kudd nitoll korpacheô veg-veglleô riti; he nem' Devan sogllem nittaier haddi-sôr choltat.
11. Punn ieunchim aslim tea denneancho Porom'-Iadnik koso Krist ailo ani odik vortea ani odik sopurnn Tombuntlean Tannem provês kelo; ho Tombu mon'xamnim bandlolo nhoi, mhonngê hê rochnnecho nhoi.
12. Toxench To bokddeanchem vô paddkuleanchem rogot gheun bhitôr vochunk na; punn Aplench rogot gheun Tannem êkêch pavtti Gabhareant provês kelo ani sasnnik taronn amkam zôddlem.
13. Bokddeanchem ani paddkuleanchem rogot ani laslolê paddiecho gobôr oxud'dh asloleancher xitoddaun, tim tancho mhêll kaddun tankam dharmik nemam pormannem xud'dh kortat; oxem zalear,
14. Kristachem rogot kitlem odik gunnvont zaunchem na?! Tannem sasnnik Atmea vorvim nixkollonk boli koxi Apnnakuch Devak bhettoilo; mhonnttôch, ami jivea Devak bhôzchê khatir, tem Tachem rogot kitlem odik amchim ontoskornnam mornnadik kortubantlim xud'dh korchem na?!
15. Adlea korarachea kallar kel'lea opradhantli suttka diunk Jezu melo; Devan apoil'leank bhasail'lem sasnnik daiz mellchê khatir, To Novea Koraracho Modêst zalo.
16. Zoim moronn-potr kel'lem asa, thoim tem potr korun dovorlo to monis mela mhonn ruzu korchi goroz asa.
17. Moronn-potr korta to jivo aso-sôr tem potr vhevarant ghalunk zaina; fokot tea mon'xachea mornna udexim tem potr vhevarant ghalunk zata.
18. Heach khatir, poilo korar-ui rogta vinnem sthapunk na.
19. Tôr, Moizesan Somurtiche soglle kaide ak'khê porjek vachlea uprant, tannem paddkuleanchem ani bokddeanchem rogot ghetlem, tantum ilem udok misoll kelem, ani tambddi lonv ani xitoddeachi thalli gheun tem Pustokacher toxench sogllê porjecher xitoddaun mhollem:
20. "Devan tumchê kodde korar korunk tharaila: tea korarachem rogot hem."
21. Têch porim, Moizesan tombucher ani sevadhormachea sogllea aidonancher tem rogot xitoddailem.
22. Ani somurti pormannem chodd-chodd vostunchi xud'dhavnni rogot vaprun zata ani rogot vikrailea xivai bhogsonnem na.
23. Atanch sangleat teô vôstu sorginchea vostuncheô proti, ani teô hê bhaxen xud'dh korunk zaiaslêo mhonnttôch, sorginchea vostum pasot xud'dhavnni korunk tea-vôn odik vortea bolidananchi goroz.
24. Mon'xamnim kel'lo Gabharo khorea Gabhareachem fokot ek chitr: oslea Gabhareant Krist bhitôr sorunk na; To khorem mhollear khud sorgar bhitôr sorlo ani oso To atam amchê khatir Deva mukhar ubo zalo.
25. Porom'-iadnik vorsachea-vorsa aplem nhoi tem rogot gheun Gabhareant provês korta; oxem Kristak Apli bhettovnni bogor-bogor korchi goroz na;
26. na tôr, sõnvsar rochla tê meren Tannem zaitê pavtti sõschem poddtolem aslem. Punn atam, kallam-iuganchê sompadnnek, patok kaddun udounk To dixtti poddlo ani hea khatir êkêch pavtti Tannem Apnnacho iôdn kelo.
27. Mon'xam êk pavtt mortat ani tea uprant tanchi zhôddti zata;
28. toxench somestanchim patkam kaddun uddounk Kristan êkêch pavtti Apnnakuch somorpun dilo; dusrê pavtti To dixtti poddtolo, patok kaddunk nhoi, punn Tachi vatt polleun astoleank taronn diunk.
