1. Tôr atam hi sakxidaranchi urpônz eka vhodda porzollit kupa vori amkam veddho ghalun asa mhonn ami polletanv. Mhonnttôch aplea bharan amkam chepun dovorta tem sogott ami sôddun dium-ia, bhov korun patok, kiteak tem amkam ghott chikttota. Ami dhanvunk suru kelam: urlea tê vattechea xevottak porian thiraien dhanvot ravum-ia.
2. Jezucher amche dolle lavun dovrum-ia, kiteak To amchea bhavarthacho Fuddari ani Sompadnnar. Apnnak sukh mellchem aslem tachê svater, loz mhonn pollenastana, Tannem khursachem moronn sõslem, ani atam To Devachea xinvasonachea uzveak bosla.
3. Tannem koxê bhaxen Apnnacher add patkiancho virôdh sõslo tem niallat, ani pattim sorum nakat punn kalljidar zaiat.
4. Patkacher add zhuztana, tumkam ozun rogot varoi porian zhuzunk poddunk na.
5. Tumi Tachim bhurgim dekhun ,tumkam dhir divpak Dev tumkam kitem sangta tem visorleant tumi? Him Tachim utram: "Mhojea puta, Sorvespor tujeô chuki tuka dakhoita tednam, tum Taka chit di; ani To tuka zupatti dita tednam, tujem mon moddonk dium naka.
6. Kiteak zancho Sorvespor môg korta, tankam xist laita, ani zankam Apleô put-dhuvô mhonn lêkhta, tankam to xikxa dita."
7. Dev tumkam Aplim bhurgim koxim vagoita mhonn somzun, tumi xist xikchê khatir xikxa sõsnnikaien gheiat. Bapain xikxa diunk naslolim konn tôri bhurgim astit?
8. Dusrea bhurgeam porim tumkam Tachi xikxa poddona zalear, tumi Tachim khaxa bhurgim nhoi: tumi oniz bhurgim.
9. Amche soimbache khaxa bapui amkam xikxa ditale ani tôri ami tankam man ditaleanv; tôr, amkam Jivit mellpak, amchea sorginchea Bapaik kitlo odik ami man diunk favo na zait?
10. Amche soimbache bapui, hea thoddea disanchea jivita pasot, apnnank borem distalem tea pormannem, amkam xikxa ditale; punn Dev, amkam Aplê povitrtaient vantto diunk aitim korchê khatir, kitem khoreponnim amkam faideachem tem polleun amkam xikxa dita.
11. Xikxa poddta tea vellar ti khuxalkaiechi vôst nhoi, punn budh xiklolim mon'xam Devak man'ta toslea jivitachim xantichim follam bhôgunk pavtat.
12. Tôr tumchê thoklole hat voir ubarat ani tumchim koddkoddtolim dompram ghott korat,
13. ani nitt rostear tumchim panvlam ghalun fuddem vochat; oxem kuntt'ta to donko nikllon vecho na, punn adlem boll taka melltolem.
14. Sogllea mo'nxam kodde xantin cholunk vavrat, ani tumchem jivit khorê bhoktichem zaum-di, kiteak tichê virêt konnachean Sorvesporak polleunk zaina.
15. Devachi doiallai konnakuch chukona zaunk chotraien cholat. Tumchê modem koddsannicheô kombriô vaddona zaunk chotrai dhôrat: teô tras ditat ani zaitea zannanchim monam aplea vikan kusoitat.
16. Tumchê bhitôr pozddim vô Ezau porim sonvsari monachim konnuch aschim nhoi. Tannem eka jevnnachê bodlek malgoddea putache aple hok'k vikle.
17. Ani uprant to aplea bapaicho axirvad gheunk sôdtalo tednam, bapain taka portilo mhonn tumi zannont; dukamnim roddun porian tannem to maglo, punn bapaicho tharav bodlunk tachean ghòddlem na.
18. Oronneant Israel-porjek zal'lem toxem, sanspunk zatat toslea vostum-xim tumi ieunk nant: Sinai Dongrar aslo toso, hanga zollto uzo na, kallôkhandhar na, tufan na,
19. turturecho sad na, gaztolea talleacho avaz-ui na. Tednam ho Devacho tallo aikotoleamnim apnnank anink ek porian utor aikunk naka mhonn nettan sanglem.
20. Karonn Devan oso kaido ghal'lo: "Êk mon'zat porian dongrak afuddlear tika fatramnim marchi". Oslo khôr kaido tanchean sõsun gheunk zainaslo.
21. Ani tem dorxon itlem bhirankull aslem, ki Moizesan mhollem: "Hanv ttharea bhielam, hanv koddkoddtam!"
22. Punn tumi Sion Dongrar, jivea Devachea xarant, pavleant: hem sorginchem Jeruzalem: hanga hixôb-naslole devdut Utsovak zomlole asat;
23. hi polleiat Devachea malgoddea putam-dhuvanchi Povitr-Sobha: tanchim nanvam sorgar boroil'lim asat. Tumi khorench Deva sorxem aileant, ak'khea mon'xakullachea Mon'subidara sorxem. Tannem sopurnnaiek pavoileant tea Devak manovlolea mon'xanchea otmeam sorxim tumi pavleant.
24. Tumi Jezu-xim aileant: To Novea Koraracho Modêst; Tachem vikrail'lem rogot amkam xud'dh korta ani Abelachea rogta-vôn vhodda bollan amchê khatir Devak ulo korta.
25. Mhonnttôch chotrai dhôrat: Dev tumchê kodde uloita tednam Taka kan dinastana ravum nakat. Devacho sondêx sonvsarant porgott'talo tachem aikunk na tim tachê khastik chukunk nant; toxem tôr sorgar thaun amchê lagim uloita Taka ami kan dinanv zalear, koxim mhonn ami sutt'toleanv?
26. Tachea tallean tednam prithum' kampoili; ani atam Tannem oxi bhas dil'li asa: "Hanv anink ekdam prithumuch nhoi punn ak'khi srixtti kampoitolom."
27. "Anink ekdam" hea utranchi somzonni oxi: kampoil'leô vôstu, teô rochloleô dekhun, nanch zatoleô, ani kampunk zainant teô vôstu oxeôch urtoleô.
28. Amkam kampounk zaina toslem raj dil'lem asa. Dekhun dhin'vaxi zaum-ia ani, adoran ani bhoktin, Devak man'ta tê bhaxen Taka bhozum-ia.
29. Kiteak amcho Dev mhollear bhosm korta toslo zollto uzo.
