1. Mhonnttôch, Devan povitr kel'lea bhavam-bhoinnimnô, tumam-somestank Devan sorginchea sukhak apoileant; dekhun Jezucher tumchem lokx dovrat; To ami uchartanv tea bhavarthacho Devan patthoil'lo Porom'-Iadnik.
2. Moizes Devachea ak'khea Ghoranneant Taka visvaxi aslo toso, To-i Apnnak nemla Taka visvaxi ravlo.
3. Ghor bandta tea mon'xak ghora poros chôdd man favo. Têch porim Jezuk Moizesa-vôn vorto man favo.
4. Khorench, khoinchea-i ghorak tacho bandpi asa, punn soglleô vôstu bandun haddleat to mhollear Dev.
5. Moizes, chakôr koso, Devachea Ghoranneant visvaxi ravlo, ani fuddarak Dev sangtolo aslo tea vostunchi govaiki diun to uloilo, hem khorem.
6. Punn Krist, visvaxi Put koso, Tachea Ghoranneant odhikar choloita. Aminch tem Ghorannem; ekuch mat visorchem nhoi: amkam obhiman haddta to bhorvanso kalljidarponnan ami samballunk zai.
7. Dekhun, Povitr Atmo mhonntta toxem, Aiz tôri Tacho tallo tumi aikat!
8. Fiturechea disa oronneant tumchea purvozamnim kel'lem toxem, tumchim kallzam nibor korum nakat.
9. Tednam challis vorsam-bhôr Mhojim kortuvam dekhleant astana, tãnnim Mhoji porikxa korunk sôdli.
10. Tea pasot, hê pinddkecho Mhaka kanttallo ailo. ani Hanvem mhollem: 'Tanchim kallzam sodanch vankddi vatt dhôrtat. Mhojeô vattô vollkhunk tankam khuxi na!'
11. Mhojea ragachea vellar ho soput Hanvem ghetlo: 'Hanvem bhasail'lea somadhanachea desant tim kodinch bhitôr sorchim nant.'
12. Bhavam-bhoinnimnô, onbhavarthponnachem noxttem kalliz jivea Deva thaun amkam pois korta. Tôr tumchê bhitôr oslea kallzachim konnuch asona zaunk chotraien bhonvat.
13. Portench zalear, tumchê bhitôrlim konnuch patkak bhulon nibor kallzachim zaina zaunk, voir sanglato "AIZ", mhonngê aicho dis, chalu aso porian, tumi ekamekak disan'dis dhir diunk zai.
14. Kiteak Kristachim ami bhagidaram zaleanv; ekuch mat monant dhôrchem: zo survatek thaun amkam visvas aslo, to ami xevottak porian thirponnim samballunk zai.
15. Povitr Pustok oxem sangta nhoi? Aiz tôri Tacho tallo tumi aikat! Fiturechea disa tumchea purvozamnim kel'lem toxem, tumchim kallzam nibor korum nakat!
16. Devacho tallo aikolo ani tôri Tacher kolpolim tim konn? Moizesan Ejiptantlim bhair kaddun vhelim tim sogllim nhoi?
17. Konnacho Devak challis vorsam porian kanttallo dislo? Patok kelem ani oronneant morun poddlim tanchoch Taka kanttallo ailo nhoi?
18. "Hanvem bhasail'lea somadhanachea desant tim kodinch bhitôr sorchim nant": Oso Devan soput ghetlo tednam, konnachi khobor kortalo To? Tacher kolpol'lim tanchi nhoi?
19. Mhonnttôch, tim ovisvaxi zalim dekhun, tanchean bhitôr sorunk zalem na mhonn ami polletanv.
