1. Khorench, mon'xanchê vôtin Devachi seva korunk, patkanchea bhogsonnea khatir danam ani iodn somorpunk dôr-êk porom'-iadnik loka modlo kaddlolo ani nemlolo asta.
2. To apunnuch sogllea vattamnim osokt dekhun, nennarponnant jietat ani vatt chukun geleant tanchê thaim to dulobaien vagunk xokta.
3. Ani porjechea patkam khatir to iodn bhettoita têch porim, aplêch osoktaiê pasot-ui tannem iodn bhettounk zai.
4. Porom'-iadnik zauncho ho man konnachean apnnakuch gheunk zaina: Aaronak dilem toxem, Devan taka apovnnem diunk zai.
5. Têch porim Kristan Porom'-Iadnik zaunchi mhoima Apnnench Apnnak gheunk na; punn Devan Taka oxem mhollam: "Tum Mhozo Put, Hanvem Tuka aichea disa zolm dila."
6. Toxench anink êkê svater Devan Taka oxem mhollam: "Melkizedeka porim, konn adlo-fuddlo nastana, Iadnik Tum sasnna-sasnnak!"
7. Aplea sonvsarantlea jivitant Jezun vhoddlean bob marun ani dukam golloun, Devak magnnim ani prarthona bhettoilim, kiteak Taka mornnantlo nivarunk Devak tank asli;
8. Ani Devacho Put zaun-ui, apleam koxttam-dogdam vôrvim sodam Devachê khuxek khalto zaunk To xiklo.
9. Ani Devan Taka sompadnnek pavoilea uprant, khalteponnan Apli khuxi kortolea soglleank To sasnnik soddvônnecho Karonn zalo,
10. ani Devan Taka Melkizedeka porim Porom'-Iadnik mhonnun pacharlo.
11. Hê vixim zaitem sangchem asa; punn kitem-i somzunk tumi zodd monachim zaleant dekhun, tachi-i somzonni tumkam diunk kotthin.
12. Khorench, atam porian dusreak xikovnn diunk purtim zaunk tumkam zaito vêll mell'lla; tôri anink konnem tumkam Devachea utranchi mullavi xikovnn novean diunchi goroz asa.
13. Konnak dud pieunchi goroz asa tôr, taka ozun dudachem ball mhonnche; kitem borem kitem vaitttem taka somzona.
14. Vaddlolim mon'xam nibor jevonn jevtat; borea ani vaitta modem ontor vollkhunk tankam obheas ani onnbhôv asa.
