1. Tôr bhavarth mhonngê kitem? Devan bhasail'lea dananchi ami vatt polletana bhavarth amkam hea bhorvanxeant thir dovôrta; ani amkam dixtti poddonant teô vôstu khorench asat mhonn hoch bhavarth amkam poripunn khatri dita.
2. Khoreponnim tanchea bhavarthak lagun Devan amchea purvileank manun ghetlim.
3. Ak'khi srixtti Devan ekach utran rochun haddlea, ani oxem jem kitem dixtti poddta, tem sogllem dixtti poddona tantlem upzon ailam: hem sogott bhavarthak lagun ami somzunk pavtanv.
4. Bhavarthak lagun Abelan Kainachea iodna-vôn vorto iôdn Devak bhettoilo ani hea bhavarthan taka Devan Apnnak manovlolo kelo, kiteak khud Devan tachi bhettovnni manun ghetli. To melo zalear legun, bhavartha vorvim to ozun uloita.
5. Bhavarthak lagun Devan Enokak mornnantlo vattaun uklun vhelo, ani to konnakuch mellunk na, kiteak Devan taka ubarun vhelo. Karonn, taka uklun vhorchê adim, Enok Devak manovlolo monis mhonn Povitr Pustok sangta.
6. Bhavartha virêt konnacheanuch Devak manonk zaina, kiteak Deva-xim vetoleamnim Dev asa mhonn ani Apnnak sôdtoleank To inam' dita mhonn bhavarth dhôrunk zai.
7. Bhavarthak lagun Noahn oxem kelem: ozun dixtti poddunk nasloleô vostu Devan taka gomoilea uprant, tannem Devachi xiddkavnni bhoktin manun ghetli, ani aplea ghoranneak vattaunchê khatir tannem tarum bandlem. Aplea bhavarthan tannem sonvsaracher khastichem formonn marlem; ani jem Devak manovlolim zaunchem bhag bhavartha vorvim mon'xank mellta, tea bhagacho Noah daiji zalo.
8. Bhavarthak lagun Abraham' apunn daiz koxem gheuncho aslo tea desant vochunk apnnak apoil'lea Devak khalto zalo; ani khoim veta tem nokllo zaun-ui to vattek laglo.
9. Bhavarthak lagun to Devan taka bhasail'lea desant porko koso jielo. Devachê têch bhasavnneche daiji zal'lea Izaka ani Jakoba borabôr tannem tombumnim biradd kelem.
10. Karonn to Devan ievjil'lea ani Devanuch ghôtt buniadir bandlolea xarak ravtalo.
11. Bhavarthak lagun Sara porian utar piraiechi zaun-ui avoi zaunk pavli, kiteak Dev Aplê bhasavnnek visvaxi ravtolo mhonn tika khatri asli.
12. Heach khatir, mel'leam modem vochpachê piraiek pavlolea ekach mon'xa thaun mollba veleam noketram itli ani vellê velê renvechea mezunk zainaslolea konniam porim sonsôt utpon zali.
13. Him sogllim bhavarth dhôrun melim. Devan bhasail'leô vostu tim bhôgunk pavlim nant, punn pois thaun teô polleun tim sontoslim, ani sonvsarant apunn porkim ani iatrekaram mhonn tãnnim ukteponnim sangun dilem.
14. Oxem uloitat tim aplo khaxa dês apunn ozun sôdit asat mhonn dakhoitat.
15. Tanchem dhean-mon apunn sôddun aileant tea desacher naslem; aslem zalear, thoinsôr portun vochunk tanchean borem zatalem.
16. Punn tim odik vortea desak axetalim, sorginchea desak otrektalim; dekhunuch Dev Apnnak tãnnim aplo Dev mhonn ulo marunk diunk pattim sorona, kiteak Devan tankam ek xar toiar kelam.
17. Bhavarthak lagun Abrahaman, Devan tachi porikxa keli tednam, Izaakak vôpun dilo. Devan bhasavnniô kel'leô teô Abrahamak kel'leô ani takach Devan sanglolem: "Tujem nanv fuddem vhortoli ti sonsôt Izaaka vorvim utpon zatoli." Tôri astana, to aplea ekleach putachem bolidan korunk kobul zalo.
19. Mel'leank legun novean jivont korunk Devak xokti asa mhonn Abrahamak visvas aslo, ani Izaakak tannem mel'leantloch porto ghetlo mhonn êkê bhaxen mhonnum-ieta.
20. Bhavarthak lagun Izaakan fuddarak ieunchim aslim tim dennim Jakobak ani Ezauk mellchim mhonn tankam aploa xirvad dilo.
21. Bhavarthak lagun Jakoban morchê adim Juzechea dôr-eklea putak aplo axirvad dilo ani aplê boddiecher poddon tannem Devak bhôzlo.
22. Bhavarthak lagun Juzen, mornnachê tornnir aslo tednam, Israelacheô put-dhuvô Ejiptantleô bhair sortoleô mhonn ugddas kelo ani aplea haddanchem kitem-kat korchem tea vixim kaido ghalo.
23. Bhavarthak lagun, Moizes zolmotôch, tin mhoine porian tachea avoi-bapain taka lipoun dovorlo. To sobit-sundôr ballôk mhonn tãnnim dekhlem ani patxaiachea hukumachi tankam bhirant disli na.
24. Bhavarthak lagun Moizesan, danddgo zatoch, apnnak Faraohchê dhuvecho put mhonnlolo saf naka zalem.
25. Thoddo kall sonvsari sukh bhôgun aplea ontoskornnacher patkacho bhar gheunchê bodlek, Devachê porjê vangdda koxtt-dogd sõsunk tannem vinchun kaddlem.
26. Tache dolle fuddlea inamacher lail'le asle dekhun, Krista pasot kosle-i attevitte sõsunk Ejiptachê girestkaiê-vôn vortem bhag mhonn tannem manun ghetlem.
27. Bhavarthak lagun patxaiachea ragachi bhirant dhôrinastana Moizes Ejiptantlo bhair sorlo; dixtti poddona tea Devak dekhlolê porim to thir ravlo.
28. Bhavarthak lagun tannem Pask somarombhlem ani, aplê porjê modem malgoddeank Bhosm-Kornnaran hat laina zaunk, tanchea darancher tannem rogot xitoddaunk lailem.
29. Bhavarthak lagun tãnnim Tambddo Doria suki zomin zal'lê porim utrailo; punn Ejiptkar toxench korunk sôdtana buddun mele.
30. Bhavarthak lagun porjen sat dis kottam bhonvtonnim bhonvadde marlea uprant, Jerikechim kottam moddon poddlim.
31. Bhavarthak lagun, ti xindôll bail Rahab, bhediank tinnem borê bhaxen ghetle dekhun, onbhavarthiam borabôr morunk na.
32. Anink-ui hanvem sangchi goroz asa? Gideon, Barak, Samson, Jefta, toxench David, Samuel ani provadi, hea soglleanchi khobor korunk laglear, mhaka vêll ascho na.
33. Bhavarthak lagun tãnnim raxttram jikhun ghetlim, Devak man'ta toslea jivitachi chal tãnnim dhôrli, ani Devan bhasail'lem tem tankam mell'llem. Tãnnim xinvanchim tonddam dhamplim,
34. ujeachim agttim paloilim, ani zhuzant te torsadin morun poddunk nant. Te osokt asle, punn ghott zale, zhuzant bollixtt zale ani porkea fouzank tãnnim pattim dhanvddaileô.
35. Kãi bailank tanche ghov mornnantle jivont zaun porte mell'le. Thoddea zannamnim, apli suttka sôddun diun, odik borea jivitak punorjivont zaunchê khatir moro porian koxtt-dogd bhôgle.
36. Kitlea zannamnim kenddnniô ani sotteancho mar khelo, ani dusrea kitlea zannank khoddeasankllimnim bandlim ani bondkhonnint uddoilim.
37. Tankam fatrailim, tankam khorvontin chirlim, torsadin tancho jiv kaddlo. Xellianchea ani bokddeanchea chama bhair ang pangrunk tankam anink kãi naslem. Lacharponnant, halupodreamnim ani dogdogamnim tim aple dis kaddtalim.
38. Khorench him mon'xam sonvsarak favo naslim. Nirvaxi zaun tim oronneamnim ani dongrancher bhonvtalim ani zomnichea bhuimaramnim ani koddeamnim jietalim.
39. Hea soglleamnim bhavarthak kedi mhonn vir-bhoktanchi sakxi dili! Tôri Devan bhasail'lem tem tankam mellunk na;
40. kiteak amchê khatir Devan odik vorti ievzônn tharailea: tim sogllim fokot amchê borabôr sopurnnaiek pavlolim Tachi khuxi.
