1. Ami sangun aileanv tantlem chodd mhotvachem mhollear hem: amkam asa to Porom'-Iadnik sorgar Bhov Vortea Devachea xinvasonachea uzveak boslolo asa.
2. Toch Gabhareacho ani mon'xamnim nhoi punn khud Devan bandlolea osôl-khorea Tombucho Muniari.
3. Dôr-êk porom'-iadnik danam ani iodn somorpunk sthaplolo asa; hea-i Porom'-Iadnika lagim kitem-i tôri somorpunk asunk zai.
4. Ani Jezu sonvsarant Somurti pormannem iadnik porian nhoi, kiteak Somurtin formail'lim danam bhettounk dusre iadnik asat;
5. hancho sevadhorm sorginchea sevadhormachi fokot ek chitr ani savlli. Oxench Moizesa sombondim ghòddlem: Moizes Tombu tannunk vetalo tednam, Devan taka sanglem: "Dongrar tuka dakhoil'lo tea nomunea pormannem sogllem chotraien kôr."
6. Tôr atam, jitlo Jezu odik xrêxtt Koraracho Modêst, titlem odik xrextt muniarponn Taka dil'lem asa; ho Korar odik vortea bhasavnniancher sthaplolo asa.
7. Khorem mhollear, tea poilea korarak koslich khôdd nasli zalear, dusrea anink korarachi koslich goroz aschi nasli.
8. Tôr tea lokacho guneanv korun Dev tumkam oxem sangta: "Polleiat, Hanv Israelachea Ghorannea kodde ani Judachea Ghorannea kodde êk novo korar kortolom, osle dis ietat - uloita to Sorvespor!
9. Tanchea purvozank tanchea hatak dhôrun Ejipt desantlim hanvem bhair kaddlim, toslo ho korar zauncho na. Tim Mhojea korarak visvaxi ravlim nant ani hea pasot Hanvem tankam sôddun dilim - uloita to Sorvespor!
10. Te dis pavtôch, Israelachea Ghorannea kodde Hanv korar kortolom to oslo: - mhonntta Sorvespor - tanchea monant Hanv Mhoje kaide ghaltolom, ani tanchea kallzancher Hanv teo boroitolom. Ani Hanv zatolom tancho Dev ani tim zatolim Mhoji porza.
11. Sorvesporachi vollokh korun ghe', oxem mhonnun xezarian vô xezarnin aplea xezariak vô xezarnik ani bhavan vô bhoinnin aplea bhavak vô bhoinnik anink xikounchi goroz poddchi na: Hanv aplo Dev mhonn tumchê modlim sogllim Mhaka vollkhotolim vhodd-vhodd toxim lhan-lhan mon'xam,
12. Kiteak Hanv tanche oprad bhôgxitolom ani tanchea patkancho anink ugddas korcho na."
13. Novea eka korarachi khobor korta mhonnttôch, to poilo korar Devan rôd'd kelo. Tôr jem kitem pornnem zalem ani zache dis bhòrle, tem xekim nanch zaunk pavta.
